ការស្ទង់មតិបានរកឃើញថា ឥទ្ធិពលសេដ្ឋកិច្ចរបស់មហាយក្សចិន កាន់តែទទួលបានការស្វាគមន៍

តាមសេចក្តីរាយការណ៍របស់សារព័ត៌មាន Aljazeera បានឲ្យដឹងថា ឥទ្ធិពលសេដ្ឋកិច្ចរបស់ចិន ត្រូវបានទទួលស្គាល់ស្ទើរគ្រប់ទីកន្លែងនៅជុំវិញពិភពលោក គ្រាន់តែថា តើវាត្រូវបានមើលក្នុងផ្លូវវិជ្ជមាន ឬអវិជ្ជមាន គឺអាស្រ័យទៅលើការអភិវឌ្ឍ​សេដ្ឋកិច្ចរបស់ប្រទេស និងការយល់ឃើញខុសៗគ្នារបស់អ្នកដែលផ្តល់ចម្លើយនីមួយៗ។

ការស្ទង់មតិមួយដែលគេធ្វើនៅក្នុងប្រទេសចំនួន៣៥ ដោយមជ្ឈមណ្ឌលស្រាវជ្រាវ Pew Research Center ដែលមានមូលដ្ឋាននៅទីក្រុងវ៉ាស៊ីនតោន បានឲ្យដឹងថា ប្រជាជនដែលរស់នៅក្នុងប្រទេសដែលមានប្រាក់ចំណូលខ្ពស់ ដូចជាសហរដ្ឋអាម៉េ​រិក កាណាដា អូស្ត្រាលី និង ប្រទេសផ្សេងៗសរុប១៨ បានបង្ហាញទស្សនៈ មិនអំណោយផលចំពោះប្រទេសចិន​ជារួមជាមួយមធ្យមភាពវាយតម្លៃដល់ទៅ៧០%។

ផ្ទុយទៅវិញប្រជាជននៅក្នុងប្រទេសដែលមានប្រាក់ចំណូលមធ្យមដូចជាប្រទេសថៃ កេនយ៉ា និងបង់ក្លាដែស និងប្រទេសផ្សេងៗសរុបដល់ទៅ១៧ប្រទេស មានពលរដ្ឋដល់ទៅ៥៦% មើលមកចិននៅក្នុងផ្លូវវិជ្ជមាន។ នៅក្នុងចំណោមប្រទេសទាំងនេះ អ្នកដែលមានទស្សនៈវិជ្ជមានបំផុត គឺប្រទេសថៃ ដែលមានពលរដ្ឋរហូតដល់ទៅ៨០% បានវាយតម្លៃវិជ្ជមានលើមហាយក្សចិន បន្ទាប់មកនីហ្សេរីយ៉ា ដែលមានអ្នកឆ្លើយ៧៥% កេនយ៉ា៧៣% ទុយនេស៊ី៦៨% និងសិង្ហបុរី៦៧%។

នៅសហរដ្ឋអាម៉េ​រិក ពលរដ្ឋចំនួន៧៦% បានបង្ហាញទស្សនៈអវិជ្ជមានចំពោះឥទ្ធិពលសេដ្ឋកិច្ចរបស់ប្រទេសចិន បន្ទាប់មកអាល្លឺម៉ង់៦៩% បារាំង និងកាណាដា៦៨% ក្រៅពីនេះប្រទេស ជប៉ុន កូរ៉េខាងត្បូង និងឥណ្ឌា ក៏មានភាគរយអវិជ្ជមានខ្ពស់ផងដែរ។ ជាមួយគ្នានេះ ពលរដ្ឋសិង្ហបុរី និងម៉ាឡេស៊ី ក៏ជាប្រជាជាតិ ដែលមានប្រជាជនវាយតម្លៃវិជ្ជមានលើតួនាទី និងឥទ្ធិពលនៃសេដ្ឋកិច្ចរបស់ចិន ចាប់ពី៦៧%ផងដែរ៕

ដោយៈ សរ សុជាតិ