កំពូលមហាសេដ្ឋីអាម៉េរិក លោក ប៊ីល ហ្កេត បានប្រកាសថា លោកនឹងបរិច្ចាគ៩៩%នៃទ្រព្យសម្បត្តិដ៏ច្រើនសន្ធឹកសន្ធាប់របស់លោក ដែលរំពឹងនឹងកើនដល់២០០ពាន់លានដុល្លារនៅត្រឹមឆ្នាំ២០៤៥ ជាពេលដែលមូលនិធិរបស់លោកទាំងអស់នេះគ្រោងបញ្ចប់ប្រតិបត្តិការ។ ស្ថាបនិកក្រុមហ៊ុន Microsoft វ័យ៦៩ឆ្នាំរូបនេះ បានអះអាងថា ទ្រព្យសម្បត្តិភាគច្រើនរបស់លោកនឹងចំណាយលើការកែលម្អសេវាសុខភាព និងការអប់រំនៅទ្វីបអាហ្វ្រិកក្នុងរយៈពេល២០ឆ្នាំខាងមុខ ដើម្បីជួយអភិវឌ្ឍន៍ប្រទេសនៅទ្វីបអាហ្រ្វិក។ ទន្ទឹមនេះ លោកក៏បានជំរុញឱ្យអ្នកច្នៃប្រឌិតវ័យក្មេងនៅអាហ្វ្រិកឱ្យគិតពីរបៀបបង្កើតបញ្ញាសិប្បនិម្មិត (AI) ដើម្បីកែលម្អការថែទាំសុខភាពនៅក្នុងទ្វីបនេះផងដែរ។
ការប្រកាសរបស់មហាសេដ្ឋីរូបនេះធ្វើឡើងចំពេលរដ្ឋាភិបាលសហរដ្ឋអាម៉េរិក ក្រោមការដឹកនាំរបស់ប្រធានាធិបតីអាម៉េរិក លោក ដូណាល់ ត្រាំ បានកាត់ផ្ដាច់ជំនួយដល់តំបន់អាហ្វ្រិករួមទាំងកម្មវិធីមួយចំនួន ដើម្បីព្យាបាលអ្នកជំងឺអេដស៍ ដែលបង្កើនការព្រួយបារម្ភអំពីអនាគតនៃការគាំពារសុខាភិបាលនៅទ្វីបមួយនេះ។
លោក ប៊ីល ហ្កេត បានបញ្ជាក់ថា មូលនិធិរបស់លោកនេះនឹងផ្ដោតសំខាន់លើការគាំពារសុខាភិបាលនៅក្នុងទ្វីបនេះ ហើយនៅទីបញ្ចប់នៃរយៈពេល២០ឆ្នាំខាងមុននេះ មូលនិធិនេះនឹងត្រូវបិទបញ្ចប់ប្រតិបត្តិការរបស់ខ្លួននៅត្រឹមពេលនោះ៕
ដោយ៖ សុខ មង្គល
