ប្រព័ន្ធទូទាត់ BRICS Pay គឺជាគម្រោងដ៏សំខាន់បំផុតរបស់ប្លុកប្រទេស BRICS ដែលមានសមាជិកស្ថាបនិកចំនួន៥ប្រទេសរួមមានប្រេស៊ីល រុស្ស៊ី ឥណ្ឌា មហាយក្សចិន និងអាហ្វ្រិកខាងត្បួង ក្នុងកិច្ចខិតខំប្រឹងប្រែងរបស់ខ្លួន ដើម្បីធ្វើបដិដុល្លារនីយកម្ម ឬឈប់ប្រើប្រាស់ប្រាក់ដុល្លារអាម៉េរិកសម្រាប់ការទូទាត់ពាណិជ្ជកម្មអន្តរជាតិ។
ប្លុកប្រទេស BRICS ដែលជាសម្ព័ន្ធសេដ្ឋកិច្ចដ៏ធំមួយបានប្រឆាំងជាយូរមកហើយចំពោះឥទ្ធិពលគ្របដណ្ដប់លើសលប់នៃប្រាក់ដុល្លារអាម៉េរិកនៅក្នុងប្រព័ន្ធហិរញ្ញវត្ថុពិភពលោក ហើយប្រព័ន្ធទូទាត់ថ្មី BRICS Pay ដែលផ្អែកលើបច្ចេកវិទ្យា Blockchain នេះអាចធ្វើឱ្យប្លុកប្រទេស BRICS ងាកចេញពីប្រាក់ដុល្លារអាម៉េរិកកាន់តែងាយស្រួល។
លោកស្រី អែលវីរ៉ា ណាប៊ូលីណា (Elvira Nabiullina) ទេសាភិបាលធនាគារកណ្ដាលរុស្ស៊ី ធ្លាប់បានអះអាងមុននេះថា មានប្រទេសចំនួន១៥៩បានបង្ហាញចំណាប់អារម្មណ៍ទទួលយកប្រព័ន្ធទូទាត់ថ្មី BRICS Pay នេះ នៅពេលលវាត្រូវបានសម្ពោធដាក់ឱ្យប្រើប្រាស់ជាផ្លូវការ។
រហូតមកទល់ពេលនេះ គេមិនដឹងច្បាស់ពីចំនួនប្រទេសចូលរួមក្នុងគំនិតផ្ដួចផ្ដើមបង្កើតប្រព័ន្ធទូទាត់ថ្មី BRICS Pay ឱ្យពិតប្រាកដនៅឡើយទេ។ ទោះជាយ៉ាងណា តាមការព្យាករ បណ្ដាប្រទេសដែលមានបំណងចូលជាសមាជិកនៃប្លុកប្រទេស BRICS នឹងត្រូវអនុវត្តតាមគោលដៅសំខាន់ៗរបស់ប្លុកនេះ ដោយរួមទាំងការផ្ដោតលើការធ្វើបដិដុល្លារនីយកម្មរបស់ប្លុកនេះផងដែរ។
នៅក្នុងឆ្នាំ២០២៣ កន្លងទៅ ប្លុកប្រទេស BRICS បានស្វាគមន៍ការដាក់បញ្ចូលប្រទេសជាសមាជិកបន្ថែមជាលើកដំបូងមិនធ្លាប់មានរបស់ខ្លួនក្នុងរយៈពេលជាង២ទសវត្សរ៍មកនេះ ដោយក្នុងនោះរួមទាំងប្រទេសអេមីរ៉ាតអារ៉ាប់រួម អេហ្ស៊ីប អ៊ីរ៉ង់ និងអេត្យូពីផងដែរ។
ទន្ទឹមនេះ ប្រទេសតួកគី ដែលជាសមាជិកមួយរបស់អង្គការបក្សសម្ព័ន្ធយោធា NATO
វេណេហ្ស៊ុយអេឡា នីហ្សេរីយ៉ា ម៉ាឡេស៊ី និងប្រទេសថៃ ដែលជាកូនជឹងរបស់សហរដ្ឋអាម៉េរិក ក៏សុទ្ធតែមានបំណងចូលរួមជាសមាជិកនៃប្លុកប្រទេស BRICS ដែរ៕
