សមាគមស្វាយចន្ទីកម្ពុជា អំពាវនាវឱ្យសមាជិកផ្អាកលក់គ្រាប់ចន្ទីឆៅ ចំពេលតម្លៃធ្លាក់ចុះខ្លាំង

ស្របពេលដែលទិន្នផលស្វាយចន្ទីកំពុងធ្លាក់ចុះ តម្លៃគ្រាប់ស្វាយចន្ទីឆៅបច្ចុប្បន្នវិញ ក៏បានធ្លាក់ចុះយ៉ាងគំហុកផងដែរ ដូច្នេះហើយបានជំរុញឱ្យប្រធានសមាគមស្វាយចន្ទីកម្ពុជា អំពាវនាវឱ្យ សមាជិករបស់ខ្លួនផ្អាកលក់គ្រាប់ចន្ទីឆៅក្នុងអំឡុងពេលតម្លៃធ្លាក់ចុះសិន ដោយត្រូវហាលគ្រាប់ទុករងចាំតម្លៃប្រសើឡើងនៅខែកក្កដា ឬកញ្ញា ខាងមុខ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានគូសបញ្ជាក់ថា បាតុភូតអែលនីណូ បានបង្កផលប៉ះពាល់យ៉ាងខ្លាំងទៅលើផលិតកម្មស្វាយចន្ទីនៅកម្ពុជា នាបច្ចុប្បន្ននេះ ដោយសារអាកាសធាតុក្តៅខ្លាំងលើស​៤០អង្សាសេ បានធ្វើឱ្យស្វាយចន្ទីគាំងផ្កា មិនចេញក្តឹប និងផ្កាក្រៀមខូចជាបណ្តើរៗជាដើម ដែលធ្វើឱ្យទិន្នផលស្វាយចន្ទីនៅឆ្នាំនេះ អាចនឹងថយចុះចន្លោះពី១០% ទៅ ៣០% បើធៀបនឹងឆ្នាំមុន។

បើតាមប្រធានសមាគមរូបនេះ ស្របពេលដែលទិន្នផលស្វាយចន្ទីឆ្នាំនេះធ្លាក់ចុះហើយនោះ តម្លៃគ្រាប់ស្វាយចន្ទីឆៅបច្ចុប្បន្នក៏បែរជាធ្លាក់ចុះយ៉ាងគំហុកផងដែរ។ យ៉ាងណាមិញ ដើម្បីដោះស្រាយនូវបញ្ហាតម្លៃធ្លាក់ចុះនេះ ប្រធានសមាគមស្វាយចន្ទីកម្ពុជា បានណែរនាំដល់សមាជិករបស់ខ្លួនដែលមានលទ្ធភាព គួរហាលគ្រាប់ស្វាយចន្ទីទុករង់ចាំលក់ពេលតម្លៃប្រសើឡើងនៅខែកក្កដា ឬខែកញ្ញាខាងមុខ។

ទន្ទឹមនេះ លោក អួន ស៊ីឡុត បានឱ្យដឹងដែរថា នៅមួយខែដំបូងដើមឆ្នាំ២០២៤នេះ កម្ពុជាបាននាំចេញគ្រាប់ចន្ទីឆៅទៅវៀតណាម កើនឡើង៥០% បើធៀបនឹងរយៈពេលដូចគ្នាក្នុងឆ្នាំ២០២៣។

តែទោះយ៉ាងនេះក្តី លោកអះអាងថា ការកើនឡើងការនាំចេញគ្រាប់ស្វាយចន្ទីទៅវៀតណាមនេះ មិនមែនជាគ្រាប់ស្វាយចន្ទី ក្នុងឆ្នាំ២០២៤ នោះទេ ដោយទិន្នផលនេះសល់ពីចុងខែធ្នូ ឆ្នាំ២០២៣ ប៉ុណ្ណោះ ដ្បិតថា រដូវប្រមូលផលចន្ទីនៅកម្ពុជាភាគច្រើន គឺធ្វើឡើងនៅពាក់កណ្តាលខែកុម្ភៈ។ យ៉ាងណាក៏ដោយចុះ ថ្នាក់ដឹកនាំរូបនេះបានបញ្ជាក់ថា ការធ្លាក់ចុះទិន្នផលស្វាយចន្ទីនៅកម្ពុជា ក៏អាចបង្កើនតម្លៃគ្រាប់កែច្នៃលើទីផ្សារអន្តរជាតិ នាឆ្នាំ២០២៤ នេះផងដែរ។​

ជាមួយគ្នានេះ ដើម្បីរក្សាតម្លៃស្វាយចន្ទី ឱ្យមានស្ថិរភាព សមាគមស្វាយចន្ទីកម្ពុជា ក៏បានបញ្ចុះបញ្ចូលសមាជិករបស់ខ្លួន និងកសិករដ៏ទៃឱ្យបន្ថយ និងរក្សារចម្ការត្រឹម៥០ម៉ឺនហិកតា សម្រាប់តែផ្គត់ផ្គង់ការកែច្នៃក្នុងស្រុក។ ខណៈបច្ចុប្បន្នកម្ពុជា មានរោងចក្រធុនមធ្យមចំនួន៧ និងត្រូវការរោងចក្រធុនមធ្យមនេះចំនួន៣០រោងចក្របន្ថែមទៀត។

ដោយឡែកសម្រាប់សិប្បកម្មកែច្នៃតូចៗវិញ ប្រធានសមាគមស្វាយចន្ទីកម្ពុជា បញ្ជាក់ថា បច្ចុប្បន្នកម្ពុជាមានសិប្បកម្មកែច្នៃតូចៗលក្ខណៈគ្រួសារចំនួន៣៥ ហើយលោកក៏លើកទឹក និងជំរុញឱ្យសិប្បកម្មទាំងនេះក្លាយជារោងចក្រធុនមធ្យមផងដែរនៅពេលខាងមុខ៕