តម្លៃប្រាក់ដុល្លារបានធ្លាក់ចុះ ខណៈរូបិយប័ណ្ណប៊ីតខញកើនឡើងដល់កម្រិតខ្ពស់នៅ២ឆ្នាំមកនេះ

សន្ទស្សន៍តម្លៃប្រាក់ដុល្លារបានធ្លាក់ចុះ០.០៩% មកនៅត្រឹមតែជិត១៥០យ៉េន ក្នុងមួយដុល្លារ ក្នុងការជួញដូរនៅអាស៊ី កាលពីព្រឹកថ្ងៃចន្ទ ខណៈដែលក្រុមពាណិជ្ជករបានវាយតម្លៃពីសុន្ទរកថាដ៏ប្រយ័ត្នប្រយែងរបស់ទេសាភិបាលធនាគារកណ្ដាលជប៉ុន លោក កាហ្សូ អ៊ូដា (Kazuo Ueda) កាលពីចុងសប្តាហ៍មុនថា វាដូចជាលឿនពេកក្នុងការសន្និដ្ឋានថា គោលដៅអតិផរណា របស់ធនាគារកណ្តាលជិតនឹងសម្រេចបានហើយនោះ។

ការធ្លាក់ចុះតម្លៃប្រាក់ដុល្លារនេះដោយសារតែទិន្នផលរតនាគារ បានធ្លាក់ចុះនូវការគាំទ្របន្ថែមសម្រាប់ប្រាក់ដុល្លារដោយទិន្នផលគោលរយៈពេល១០ឆ្នាំ ធ្លាក់ចុះដល់កម្រិតជិត៤,១៨% ជាលើកដំបូងក្នុងរយៈពេល២សប្តាហ៍ ហើយទិន្នផលរតនាគារ មានប្រហែល៤,១៩% នៅថ្ងៃចន្ទនេះ។ ក្រុមអ្នករៀបចំយុទ្ធសាស្រ្ត Westpac បានសរសេរនៅក្នុងកំណត់ត្រាអតិថិជនថា ភាពល្អៀងគ្នាតិចតួចនេះហាក់ដូចជាកំពុងមានការប្រែប្រួលឆ្ពោះទៅរកការសាកល្បងពីកម្រិតដែលគេចង់ដឹងពីការចេញផ្សាយម៉ាក្រូសេដ្ឋកិច្ចសំខាន់ៗនៅក្នុងសប្តាហ៍នេះ ក៏ដូចជាសក្ខីកម្មប្រចាំឆ្នាំមួយរបស់ប្រធានធនាគារកណ្ដាលអាម៉េរិក លោក ជេរូម ផៅវែល ដែលថ្លែងទៅកាន់សភាផងដែរ។

ចំណែករូបិយប័ណ្ណប៊ីតខញវិញ ត្រូវបានជួញដូរចុងក្រោយក្នុងតម្លៃជាង៦ម៉ឺន៣ពាន់ដុល្លារក្នុងមួយ Bitcoin គឺខ្ពស់ជាងការជួញដូរកាលពីថ្ងៃទី៣ ខែមីនា បន្ទាប់ពីបានឡើងដល់តម្លៃជាង៦ម៉ឺន៤ពាន់ដុល្លារ ដែលជាការកើនខ្ពស់បំផុតគិតចា​ប់តាំងពីខែវិច្ឆិកា ឆ្នាំ២០២១ ដែលពេលនោះវាបានឡើងដល់កម្រិតខ្ពស់បំផុតមិនធ្លាប់មានរហូតដល់​ជិត៧ម៉ឺនដុល្លារ៕

អត្ថបទ៖ សុខ ជា