កម្ពុជា ទទួលបានភ្ញៀវទេសចរបរទេសជាង២លានដុល្លារនៅ៥ខែឆ្នាំនេះ ខណៈព្រលានយន្តសៀមរាបអង្គរមានអ្នកដំណើរហោះហើរជាមធ្យមប្រមាណ២ពាន់នាក់ក្នុង១ថ្ងៃ

ឯកឧត្តម ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យអាកាសចរស៊ីវិល បានគូសបញ្ជាក់ថា នៅក្នុងរយៈពេល៥ខែដើមឆ្នាំ២០២៤ មានភ្ញៀវទេសចរបរទេសជាង២លាន៦សែននាក់ បានធ្វើដំណើរឆ្លងកាត់ព្រលានយន្តហោះអន្តរជាតិទាំង៣របស់កម្ពុជា។ ចំនួននេះមានការកើនឡើងប្រមាណ២២% បើធៀបនឹងរយៈពេលដូចគ្នាកាលពីឆ្នាំមុន តែមានការធ្លាក់ចុះជាង៨% បើធៀបនឹងរយៈពេលដូចគ្នាកាលពីឆ្នាំ២០១៩ ដែលជាពេលមិនទាន់មានការផ្ទុះការឆ្លងរីករាលដាលនៃជំងឺកូវីដ-១៩។

បើតាមការអះអាងរបស់ឯកឧត្តម ស៊ីន ចាន់សិរីវុត្ថា ព្រលានយន្តហោះអន្តរជាតិសៀមរាបអង្គរ នៅក្នុងរដូវកាលសម្បូរភ្ញៀវ ឬ high season កន្លងទៅមានអ្នកដំណើរចេញ-ចូលអាកាសយានដ្ឋាននេះជាមធ្យមពី២៥០០ ទៅ ២៦០០នាក់ ក្នុង១ថ្ងៃ និងមានជើងហោះហើរទ្វេទិសជាមធ្យមប្រមាណជាង៤០ជើងក្នុង១ថ្ងៃ ប៉ុន្តែនៅក្នុងរដូវកាលខ្សត់ភ្ញៀវទេសចរ ឬ low season នេះ មានអ្នកដំណើរចេញ-ចូលអាកាសយានដ្ឋាននេះជាមធ្យមពី២០០០ ទៅ២២០០នាក់ក្នុង១ថ្ងៃ និងមានជើងហោះហើរទ្វេទិសជាមធ្យមប្រមាណ៣២ជើងក្នុង១ថ្ងៃ។

មន្ត្រីជាន់ខ្ពស់រូបនេះបន្តថា ក្នុងចំណោមភ្ញៀវទេសចរបរទេសទាំងនេះភាគច្រើនហោះមកពីបណ្តារប្រទេសអាស៊ាន និងពីប្រទេសចិន ខណៈភ្ញៀវចម្រុះជាតិសាសន៍អាស៊ីមាន៧៥% និងអឺរ៉ុប២៥%។ បច្ចុប្បន្នអាកាសយានដ្ឋានអន្តរជាតិសៀមរាបអង្គរ មានក្រុមហ៊ុនអាកាសចរណ៏ចំនួន១១កំពុងហោះហើរចរញ-ចូល ក្នុងនោះមានក្រុមហ៊ុនអាកាសចរណ៏អន្តរជាតិ ចំនួន៩ និងក្រុមហ៊ុនអាកាសចរណ៏ក្នុងស្រុកចំនួន២។ បើតាមការអះអាងរបស់ឯកឧត្តម ស៊ីន ចាន់សិរីវុត្ថា នៅប៉ុន្មានខែចុងក្រោយនេះ ចំនួនអ្នកដំណើរតាមផ្លូវអាកាសមានការធ្លាក់ចុះបន្តិច បើធៀបទៅនឹងខែមុន (រវាងខែមិថុនា ធៀបនឹងខែឧសភា) ចំនួនអ្នកដំណើរមានការធ្លាក់ចុះប្រមាណជិត៨%៕