អគ្គនាយកដ្ឋានពន្ធដារ បានអះអាងថា ការប្រមូលចំណូលពន្ធមានការកើនឡើងនៅដើមឆ្នាំ២០២២នេះ គឺជាលទ្ធផលផ្លែផ្កាដែលបានមកពីការធ្វើកំណែទម្រង់របស់អគ្គនាយកដ្ឋាន ទាក់ទងនឹងការងារប្រមូលចំណូល ស្របពេលដែលវិស័យមួយចំនួន ក៏នៅតែបន្ដមានការលើកលែងពន្ធ ពីរាជរដ្ឋាភិបាលកម្ពុជា ក្នុងបរិការណ៍នៃការស្ដារ និងជំរុញកំណើនសេដ្ឋកិច្ចកម្ពុជាផងដែរ។
អ្នកជំនាញ សេដ្ឋកិច្ចអះអាងថា ការប្រមូលចំណូលរបស់អគ្គនាយកដ្ឋានពន្ធដារ មានការកើនឡើងខ្ពស់នៅខែមករាកន្លងទៅនេះ គឺជាការបង្ហាញឲ្យឃើញពីការស្ទុះងើបឡើងវិញជាបណ្ដើរៗនៃវិស័យសេដ្ឋកិច្ច ខណៈដែលអាជីវកម្មជាច្រើនក៏ចាប់ផ្ដើមមានស្ថានភាពល្អប្រសើរឡើងវិញ បើទោះបីជាវិស័យទេសចរណ៍ នៅបន្ដរងផលប៉ះពាល់ខ្លាំងជាងគេក៏ដោយ។ ទោះយ៉ាងណា អ្នកជំនាញ ក៏មានការបារម្ភផងដែរ អំពីការកើនឡើងនៃមេរោគបំប្លែងថ្មីអូមីក្រុង ដែលកំពុងបន្ដរាតត្បាតនៅកម្ពុជាមួយរយៈចុងក្រោយនេះ ពោលគឺ ប្រសិនបើការរាតត្បាតនៅតែបន្ដកើនឡើងខ្លាំង និងអាចឈានទៅដល់ការបិទខ្ទប់មែននោះ នោះចង់ ឬមិនចង់ផលប៉ះពាល់មកលើសេដ្ឋកិច្ចកម្ពុជានឹងត្រូវតែកើតមានជាថ្មីទៀត។
អត្ថបទគួរអាន
យ៉ាងណាក៏ដោយចុះ នៅដើមខែកុម្ភៈកន្លងនេះ រាជរដ្ឋាភិបាលកម្ពុជា ទើបតែបានសម្រេចបន្ដលើកលែងការយកពន្ធអាជីវកម្មនៅក្នុងវិស័យទេសចរណ៍រយៈពេល៦ខែបន្ថែមទៀត ដោយសារតែវិស័យនេះ ជាវិស័យស្នូលក្នុងការស្ដារសេដ្ឋកិច្ច បន្ទាប់ពីបានរងគ្រោះយ៉ាងដំណំដោយសារតែកូវីដ១៩នាពេលកន្លងមក។ ក្នុងនោះ អាជីវកម្មទេសចរណ៍ដែលត្រូវបានទទួលការលើកលែងពន្ធនេះ គឺសម្រាប់តែអាជីវកម្មទេសចរណ៍ដែលនៅក្នុងរាជធានីភ្នំពេញ ខេ្ត សៀមរាប ព្រះសីហនុ កែប កំពត ក្រុងបាវិត និងក្រុងប៉ោយប៉ែតតែប៉ុណ្ណោះ។
សូមបញ្ជាក់ថា នៅពេញមួយឆ្នាំ២០២១កន្លងទៅនេះ អគ្គនាយកដ្ឋានពន្ធដារ ប្រមូលចំណូលបានដល់ទៅ ជិត២ពាន់៨រយលានដុល្លារ មានការកើនលើសផែនការជាង២៤%។ បើទោះបីជា នៅរយៈពេលជាង២ឆ្នាំមកនេះ កម្ពុជាទទួលរងឥទ្ធពលពីវិបត្តិកូវីដ១៩ក្ដី ប៉ុន្ដែ បើយើងមើលទៅលើតួលេខចំណូលដែលរាជរដ្ឋាភិបាលកម្ពុជាទទួលបានពីអគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករ សរុបបញ្ចូលគ្នា គឺនៅមានក្នុងរង្វង់ជិត៥ពាន់លានដុល្លារនៅក្នុងមួយឆ្នាំ ដែលវាបង្ហាញឲ្យឃើញពីភាពរឹងមាំនៃប្រភពចំណូលរបស់រដ្ឋ និងភាពធន់នៃសេដ្ឋកិច្ចរបស់កម្ពុជាផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
