លោក ស៊ុយ កុកធាន ប្រធានសមាគមត្រចៀកកាំខ្មែរ រំពឹងថា សំបុកត្រចៀកកាំខ្មែរនឹងមានទីផ្សារ និងតម្លៃកាន់តែល្អប្រសើរ ក្រោយគយចិន បានអនុញ្ញាតឱ្យកម្ពុជា នាំចេញសំបុកត្រចៀកកាំទៅកាន់ទីផ្សារចិន។ តែយ៉ាងណាដើម្បីអាចនាំចេញទៅកាន់ទីផ្សារចិនបានទាមទារឱ្យអ្នកចិញ្ចឹម និងក្រុមហ៊ុនកែច្នៃ វេចខ្ចប់ចុះបញ្ជីនៅអគ្គនាយកដ្ឋានកសិកម្ម និងគោរពតាមលក្ខខណ្ឌភូតគាមអនាម័យ ដែលតម្រូវដោយគយចិន។ តែយ៉ាងណាប្រធានសមាគមរូបនេះហាក់បារម្ភពីសមត្ថភាពផ្គត់ផ្គង់សំបុកត្រចៀកកាំរបស់កម្ពុជា ដល់ទីផ្សារចិន ដោយសារការអភិរក្សសត្វត្រចៀកកាំយកសំបុកនៅកម្ពុជា នៅមានកម្រិតនៅឡើយ។ ការសិក្សាមួយបង្ហាញថា សំបុកត្រចៀកកាំរបស់កម្ពុជា មានគុណភាពល្អជាងបណ្ដាប្រទេសដទៃ ដោយសារនៅកម្ពុជា ពុំទាន់មានការបំពុលបរិយាកាសធ្ងន់ធ្ងរ។ នេះបើតាមការអះអាងរបស់លោក ស៊ុយ កុកធាន។
ដោយឡែក ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) យល់ឃើញថា ការនាំចេញសំបុកត្រចៀកកាំទៅទីផ្សារចិន មិនមែនសុទ្ធតែអាចនាំទៅបានទាំងអស់នោះឡើយ ដោយត្រូវតែមានប្រភពដើមច្បាស់លាស់ និងបានចុះឈ្មោះជាមួយអាជ្ញាធរកម្ពុជា ពិសេសត្រូវរាយការណ៍ទៅភាគីចិន ដែលតម្រូវឲ្យមានវិញ្ញាបនបត្រសុខភាពសត្វ។ ជាមួយគ្នានេះ អ្នកជំនាញរូបនេះ លើកឡើងថា សហគ្រាសដំណើរការផលិតសំបុកត្រចៀកកាំមិនទាន់សម្អាត និងសហគ្រាសផលិតសំបុកត្រចៀកកាំសម្រាប់បរិភោគ ត្រូវតែចុះឈ្មោះជាមួយអាជ្ញាធរគយនៃប្រទេសចិន ហើយដើម្បីអាចចាប់ផ្តើមផលិតផលិតផលសម្រាប់នាំចេញបាន លុះត្រាតែការចុះឈ្មោះបានចាប់ផ្តើមអនុវត្ត។ ជាមួយគ្នានេះ ឧកញ៉ា តែ តាំងប៉ ចាត់ទុកការបើកភ្លើងខៀវឱ្យនាំចេញសំបុកត្រចៀកកាំទៅកាន់ទីផ្សារចិន គឺជាឱកាសក្នុងការជំរុញទីផ្សារសម្រាប់វិស័យត្រចៀកកាំ ហើយវានឹងទាក់ទាញបានអ្នកវិនិយោគកាន់តែច្រើនបន្ថែមទៀត។
បើតាមប្រធានសមាគមត្រចៀកកាំខ្មែរ កម្ពុជា មានសក្ដានុពលខ្ពស់ក្នុងការចិញ្ចឹមសត្វត្រចៀកកាំ ខណៈមកទល់ពេលនេះ ការចិញ្ចឹមត្រចៀកកាំនៅកម្ពុជា អាចមានក្នុងរង្វង់ពី៥ទៅ៧ពាន់ខ្នងអគារ ដែលអាចផ្តល់ផលទឹកមាត់ត្រចៀកកាំ បានប្រមាណ១០០តោនក្នុង១ឆ្នាំ៕
អត្ថបទ៖ បូ ដូឡា
