លោកស្រី ហ្គីស្តាលីណា បានព្រមានថាព្រឹត្តិការណ៍នៃសង្គ្រាមរុស្ស៊ីឈ្លានពានអ៊ុយក្រែន និង ការបិទទ្វាប្រទេសរបស់ចិននឹងអាចជំរុញឱ្យមានការកាត់បន្ថយការព្យាករណ៍កំណើនសេដ្ឋកិច្ចបន្ថែមទៀត ខណៈមូលនិធិរូបិយវត្ថុអន្តរជាតិ (IMF) កាលពីខែមុនបានកាត់បន្ថយកំណើនសេដ្ឋកិច្ចពិភពលោកជាលើកទី ២ សម្រាប់ឆ្នាំ ២០២២ មកនៅត្រឹម ៣,៦% ដែលទម្លាក់ពីការព្យាករណ៍ពីមុនមាន ៤,៤%។
ទោះជាយ៉ាង លោកស្រីបាននិយាយក្នុងអំឡុងកិច្ចពិភាក្សាមួយនៅឯវេទិកាសេដ្ឋកិច្ចពិភពលោកក្នុងប្រទេសស្វីសថា អ្វីដែលធ្វើឱ្យលោកស្រីព្រួយបារម្ភជាងនេះ មិនមែនជាការធ្លាក់ចុះកំណើនសេដ្ឋកិច្ចសកលមកនៅត្រឹម ៣,៦% នោះទេ ពីព្រោះភាពអវិជ្ជមានសម្រាប់សេដ្ឋកិច្ចពិភពលោកមានវិធីសាស្ត្រជាច្រើនដែលអាចដោះស្រាយបាន។ ក៏ប៉ុន្តែ អ្វីដែលធ្វើឱ្យលោកស្រីព្រួយបារម្ភជាងនេះទៅទៀតនោះ គឺហានិភ័យដែលពិភពលោកនឹងធ្លាក់ចូលទៅក្នុងការបែកបាក់សេដ្ឋកិច្ច និងនយោបាយកាន់តែខ្លាំង ដូចជាការបែងចែកប្លុកពាណិជ្ជកម្ម និង ប្លុករូបិយវត្ថុ ហើយបំបែកបច្ចុប្បន្នភាពនៃអ្វីដែលគេហៅថា សមាហរណកម្មសេដ្ឋកិច្ចពិភពលោកនោះ។
អត្ថបទគួរអាន
លោកស្រី ហ្គីស្តាលីណា បាននិយាយក្នុងអំឡុងប្រជុំដោយបានសង្កត់ធ្ងន់ៗថា វាំងននដែកនៃសេដ្ឋកិច្ច និង ផលប៉ះពាល់នៃសង្គ្រាម នឹងបង្កើតចេញជានិន្នាការនៃការបែកខ្ញែកគ្នានៃចរន្តសេដ្ឋកិច្ចកាន់តែខ្លាំង។ លោកស្រីក៏បានបន្ថែមថា លោកស្រីមានការព្រួយបារម្មណ៍ថា សង្គ្រាមក្តៅនៅអ៊ុយក្រែនមួយនេះ នឹងអាចវិវត្តចូលទៅក្នុងសង្គ្រាមត្រជាក់មួយផ្សេងទៀត។
គួរជម្រាបថា សេចក្តីថ្លែងការណ៍របស់លោកស្រី Kristalina ជុំវិញក្តីកង្វល់ពីបញ្ហាទាំងអស់នេះ មានភាពលេចធ្លោជាខ្លាំងនៅក្នុងកិច្ចប្រជុំប្រចាំឆ្នាំរបស់ធុរកិច្ចពិភពលោក ខណៈមេដឹកនាំពីបណ្តាប្រទេសផ្សេងទៀត ដែលបានចូលរួមក្នុងកិច្ចប្រជុំនេះ ក៏បានធ្វើសេចក្តីថ្លែងការណ៍រួមគ្នាថា ព្រឹត្តិការណ៍នៃការលុកលុយរបស់រុស្ស៊ីលើអ៊ុយក្រែន ដែលស្ថិតក្នុងយុគសម័យនៃសាកលភាវូបនីយកម្មនេះគឺ កំពុងស្ថិតនៅលើហានិភ័យដ៏ធំធេង។
ក្រុមអ្នកជំនាញសេដ្ឋកិច្ច និងគោលនយោបាយ ដែលបានចូលរួមក្នុងវេទិកាសេដ្ឋកិច្ចពិភពលោកនៅប្រទេស្វីស ក៏បានព្រមានដែរថា ចក្ខុវិស័យសេដ្ឋកិច្ចនាពេលនេះ កំពុងស្ថិតនៅក្នុងភាពអាប់អួ ងងឹតសូន្យឈឹងហើយ នៅគ្រាដែលភាពតានតឹងក្នុងតំបន់ និងវិបត្តិជាច្រើនកំពុងកើនឡើងកាន់តែខ្លាំងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
