ក្រសួងរ៉ែ និងថាមពល៖ តំបន់អូខ្វាវ ខេត្តមណ្ឌលគីរី អាចមាន «មាសជិត ១លានតម្លឹង» សម្រាប់ការរុករក

អ្នកនាំពាក្យក្រសួងរ៉ែ និងថាមពល បញ្ជាក់ បច្ចុប្បន្ននេះ ក្រសួងកំពុងមានក្តីសង្ឃឹមជាមួយនឹងក្រុមហ៊ុនរុករ៉ែមាសអន្តរជាតិធំមួយនៅតំបន់អូខ្វាវ ខេត្តមណ្ឌលគិរី ដែលអាចនឹងមានសមត្ថភាពរុករករ៉ែមាសបានជោគជ័យនៅកម្ពុជា ខណៈដែលមន្ត្រីជាន់ខ្ពស់រូបនេះ អះអាងថា នៅតំបន់អូខ្វាវនេះ អាចមានមាសប្រមាណជាង ១លានតម្លឹង។

រូបតំណាង (រូបភាព៖ http://golden-inform.ru)

ថ្លែងនៅក្នុងសន្និសីទសារព័ត៌មាន នៅថ្ងៃទី ២១ ខែមេសានេះ ឯកឧត្តម យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពលផងនោះ បានឲ្យដឹងថា ក្រុមហ៊ុនដែលកំពុងដំណើរការស្វែងរុករករ៉ែមាសនៅតំបន់អូខ្វាវនោះ មានឈ្មោះថា រីណៃសេន មីនឺរ៉ល ខេមបូឌា លីមីតធីត (Renaissance Mineral Cambodia limited) គឺជាក្រុមហ៊ុនខ្នាតអន្តរជាតិមួយ ដោយមានការសហការរវាងអូស្រ្តាលី និងកាណាដា ។ ឯកឧត្តម បានគូសបញ្ជាក់ទៀតថា នៅតំបន់អូខ្វាវនេះ មានរ៉ែមាសជិត ១លានអោន ឬស្មើនឹងជិត១លានតម្លឹងមាស។

ឯកឧត្តម យស មុនីរ៉ាត់ បានឡើងយ៉ាងដូច្នេះ « គ្រោង ថាផលិតកម្មរ៉ែមាសនៅអូខ្វាវហ្នឹង ដែលមានបរិមាណសរុប ជម្រករ៉ែទី១ ដែលមាន Reserve (ធនធានបម្រុង) ប្រមាណជាជិត១លានអោន, ១អោន មានប្រមាណ ៣៣ក្រាម (មាស) អញ្ចឹងវាប្រហែល៨ជី ជិតតែមួយដំឡឹង អញ្ចឹងបើយើងនិយាយភាសាសាមញ្ញ នៅកម្ពុជាយើងថាយើងថា ជិត១លានតម្លឹង(មាស)។ ជិត១លានតម្លឹងយើងមានការដ្ឋានទី១នៅអូខ្វាវហ្នឹង»។

ឯកឧត្តម បន្ថែមទៀតថា នៅពេលមានការរុករកនៅជម្រករ៉ែទី១នេះចប់ នោះក្រសួងអាចនឹងអនុញ្ញាតឲ្យក្រុមហ៊ុននេះ រុករកជម្រករ៉ែមាសផ្សេងទៀត នៅតំបន់ក្បែរនោះ ដូច្នេះ ផលិតកម្មរុករករ៉ែមាសនេះ អាចនឹងកើនឡើងថែមទៀត។

ទោះយ៉ាងណា បើតាមមន្ត្រីជាន់ខ្ពស់ក្រសួងរ៉ែ និងថាមពលរូបនេះ ការរុករកមាសមិនមែនជារឿងងាយនោះទេ ពោលគឺរ៉ែមាស ១ ពាន់គីឡូក្រាម អាចរែងចម្រាញ់ចេញជាមាសបានតែប្រមាណ ២ទៅ ៣ក្រាមតែប៉ុណ្ណោះ ហើយបច្ចុប្បន្ននេះ ផលិតកម្មរ៉ែមាសនៅកម្ពុជា គឺនៅមានចំនួនតិចតួចណាស់។

ជាមួយគ្នានេះដែរ ឯកឧត្តម យស មុនីរ៉ាត់ បានបញ្ជាក់ថា បច្ចុប្បន្ន អាជ្ញាបណ្ណសម្រាប់អាជីវកម្មរុករករ៉ែមាសដែលក្រសួងបានផ្តល់ទៅឲ្យក្រុមហ៊ុនមានប្រមាណ ៤០អាជ្ញាបណ្ណ ហើយក្នុងចំណោមនេះ អាជ្ញាបណ្ណរុករករ៉ែមាស នៅមានតិចតួចប៉ុណ្ណោះ និងជាលក្ខណៈទ្រង់ទ្រាយតូច។ ប៉ុន្តែឯកឧត្តមបានបញ្ជាក់ថា «ឥឡូវអ្វីដែលយើងសង្ឃឹម យើងមានអាជីវកម្មរ៉ែមាសធំមួយនៅមណ្ឌលគិរី នៅតំបន់អូខ្វាវ កំពុងតែដំណើរការរលូន ជាក្រុមហ៊ុនខ្នាតអន្តរជាតិ ក្រុមហ៊ុននេះជាក្រុមហ៊ុនអូស្រ្តាលី ហើយក៏សហការផ្នែកហិរញ្ញវត្ថុជាមួយនឹងខាងកាណាដា បានចាប់ផ្តើមដំណើរការសាងសង់ធ្វើផ្លូវចូលអី រួចរាល់ហើយ ហើយកំពុងតែរៀបចំទីតាំងការដ្ឋានជីក»។

ឯកឧត្តម យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ និងជាអ្នកនាំពាក្យក្រសួងរ៉ែ និងថាមពល

អ្នកនាំពាក្យក្រសួងរ៉ែ និងថាមពលបញ្ជាក់ទៀត ក្រុមការងាររបស់ក្រសួង និងអ្នកជំនាញការរបស់ក្រុមហ៊ុននេះ ដែលមកពីក្រៅប្រទេស បានគ្រោងនឹងចុះទៅពិនិត្យដោយផ្ទាល់ដែរ តែត្រូវពន្យារពេលវិញ ដោយសារជំងឺកូវីដ១៩។

ទោះយ៉ាងណា ឯកឧត្តមបានបញ្ជាក់ថា «ពេលនេះក្រុមហ៊ុន រីណៃសេន មីនឺរ៉ល ខេមបូឌា លីមីតធីត(Renaissance Mineral Cambodia limited) កំពុងតែដំណើរការសាងសង់រោងចក្រ និង ហេដ្ឋារចនាសម្ព័ន្ធនានា ដោយការរុករករ៉ែមាស នឹងត្រូវធ្វើឡើងក្នុងពេលឆាប់ៗនេះ»។

សូមជម្រាបថា ការធ្វើអាជីវកម្មរ៉ែមាស មាន២ប្រភេទអាជ្ញាបណ្ណ គឺអាជ្ញាបណ្ណស្វែងរុករក និងអាជ្ញាបណ្ណឧស្សាហកម្មអាជីវកម្ម។ ហើយបើតាមអ្នកនាំពាក្យរូបនេះ តាំងពីឆ្នាំ២០១៣មក ក្រសួងបានធ្វើការដកហូតអាជ្ញាបណ្ណរុករករ៉ែមាសរបស់ក្រុមហ៊ុនជាបន្តបន្ទាប់ ពីជាង ១៤០ក្រុមហ៊ុនមកនៅត្រឹម ៤០ក្រុមហ៊ុនក្នុងពេលបច្ចុប្បន្ននេះ។ ចំពោះមូលហេតុនៃការដកហូតនេះ ដោយសារតែ ក្រុមហ៊ុនបរាជ័យក្នុងការរុករក ប្រតិបត្តិការនៃការរុករកខុសពីគោលការណ៍ច្បាប់ដែលបានដាក់ចេញជាដើម៕

None