ក្រសួងទេសចរណ៍ច្រានចោលចំពោះការផ្សព្វផ្សាយដែលថា កម្ពុជាគាំទ្រគំនិតផ្តួចផ្តើមទិដ្ឋាការទេសចរណ៍«៦ប្រទេស គោលដៅ១»

ដើម្បីកុំឱ្យមានការភាន់ច្រឡំ ក្រសួងទេសចរណ៍ស្នើឱ្យសារព័ត៌មានជាតិ និងអន្តរជាតិកែតម្រូវ និងបញ្ឈប់រាល់ការផ្សាយព័ត៌មាន ដែលផ្ទុយពីជំហរពិតប្រាកដរបស់ក្រសួងទេសចរណ៍។

តាមរយៈសេចក្តីបំភ្លឺរបស់ខ្លួន ដែលចេញផ្សាយនៅថ្ងៃទី២២ ខែតុលា ឆ្នាំ២០២៤ នេះ ក្រសួងទេសចរណ៍បានអះអាងថា នៅក្នុងជំនួបពិភាក្សាការងារជាមួយលោក Dusit MANAPAN ទីប្រឹក្សាក្រសួងការបរទេសថៃកាលពីពេលកន្លងទៅថ្មីៗ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ គឺគ្រាន់តែបានកត់សម្គាល់លើគំនិតផ្តួចផ្តើមផ្តល់ទិដ្ឋាការទេសចរណ៍៦ប្រទេសគោលដៅ១ ឬ Six countries, One Destination និងស្នើឱ្យភាគីថៃផ្តល់ឯកសារទស្សនទាន និងឯកសារពាក់ព័ន្ធតាមផ្លូវការទូតតែប៉ុណ្ណោះ។

គួរបញ្ជាក់ថា គម្រោងផ្តល់ទិដ្ឋាការទេសចរណ៍«៦ប្រទេស គោលដៅ១» ដែលផ្តួចផ្តើមដោយអតីតនាយករដ្ឋមន្ត្រីថៃលោក ស៊្រីថា ថាវីស៊ីន កាលពីអំឡុងខែមេសា ឆ្នាំ២០២៤ កន្លងទៅ ដោយគ្រោងរួមបញ្ជូលរវាងប្រទេសប្រ៊ុយណេ កម្ពុជា ឡាវ ម៉ាឡេស៊ី វៀតណាម និងថៃ។ គំនិតផ្តួចផ្តើមនេះត្រូវបានបំផុសឡើងក្នុងគោលបំណង ដើម្បីជួយជំរុញការអភិវឌ្ឍវិស័យទេសចរណ៍ និងសេដ្ឋកិច្ចនៅក្នុងប្រទេសទាំង៦នេះ៕