លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា កត់សម្គាល់ថា ទីផ្សារទេសចរចិន មកលេងកម្សាន្តកម្ពុជា នៅតែមានកម្រិត ខណៈនៅតាមបណ្ដាប្រទេសមួយចំនួនក្នុងតំបន់ទទួលបានអ្នកទេសចរចិន យ៉ាងច្រើន។
បើតាមការវាយតម្លៃរបស់អ្នកជំនាញក្នុងវិស័យទេសចរណ៍រូបនេះ កត្តាដែលធ្វើឱ្យចំនួនភ្ញៀវទេសចរចិន មកលេងកម្សាន្តនៅកម្ពុជា នៅមានចំនួនតិច អាចដោយសារតែគោលនយោបាយលើកទឹកចិត្តរបស់រដ្ឋាភិបាលនៃប្រទេសទាំងពីរ និងបញ្ហាឧក្រិដ្ឋកម្មអនឡាញ ព្រមទាំងអំពើអនាចារ ដែលកើតមាននាពេលកន្លងមកជាដើម។ ការលូកដៃពីប្រទេសជិតខាងក្នុងការផ្សព្វផ្សាយព័ត៌មានអវិជ្ជមានពីកម្ពុជា ទៅកាន់ពិភពលោក ក៏អាចជាមូលហេតុមួយផងដែរ។
បើយោងតាមការចុះផ្សាយរបស់សារព័ត៌មាន VnExpress ប្រទេសគោលដៅទេសចរណ៍ដ៏ពេញនិយមបំផុតទាំង១០ សម្រាប់ភ្ញៀវទេសចរចិន ក្នុងថ្ងៃឈប់សម្រាក៥ថ្ងៃកន្លងមក រួមមាន ថៃ ជប៉ុន ម៉ាឡេស៊ី កូរ៉េខាងត្បូង សិង្ហបុរី ឥណ្ឌូនេស៊ី វៀតណាម សហរដ្ឋអាម៉េរិក ហ្វីលីពីន និងប្រទេសអូស្ត្រាលី៕
អត្ថបទ៖ បូ ដូឡា
