វិស័យកសិកម្មជាវិស័យសសរស្ដម្ភមួយក្នុងការជួយទ្រទ្រង់កំណើនសេដ្ឋកិច្ច និងស្បៀងអាហាររបស់កម្ពុជា តែវិស័យនេះហាក់នៅមានកម្រិតនៅឡើយបើធៀបនឹងប្រទេសក្នុងតំបន់ ដោយសារវត្ថុធាតុដើមមួយចំនួនដូចជាជី និងថ្នាំជាដើម ត្រូវបាននាំចូលពីក្រៅប្រទេស។ ជាក់ស្តែងបើយោងតាមរបាយការណ៍របស់អគ្គនាយកដ្ឋានគយ និងរដ្ឋាករ នៅក្នុង១០ខែកន្លងមកនេះ កម្ពុជាបានចំណាយថវិការហូតដល់ជាង៣២២លានដុល្លារ លើការនាំចូលជីកសិកម្មមានការកើនឡើងជាង២២% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែជាង២៦៣លានដុល្លារប៉ុណ្ណោះ។
លោក ហួរ ធីនាង ប្រធានគ្រប់គ្រងទូទៅផ្នែកជីថ្នាំកសិកម្មនៃក្រុមហ៊ុនអង្គរហ្គ្រីន កត់សម្គល់ឃើញថា តម្រូវការប្រើប្រាស់ជីកសិកម្មរបស់ប្រជាកសិករនៅឆ្នាំ២០២៤នេះ ហាក់មានកំណើនខ្ពស់គួរឱ្យកត់សម្គាល់ ដោយសារនៅឆ្នាំនេះតម្លៃផលិតផលកសិកម្មមួយចំនួនហាក់មានតម្លៃល្អប្រសើរ ពិសេសឥទ្ធិពលនៃការកើនឡើងតម្លៃស្រូវកាលពីឆ្នាំមុន បានជំរុញឱ្យកសិករបង្កើនការធ្វើកសិកម្មរបស់ខ្លួននៅឆ្នាំនេះ ជាពិសេសទៅលើដំណាំស្រូវតែម្ដង។ កត្តានេះបានជំរុញឱ្យការនាំចូលជីកសិកម្មរបស់ក្រុមហ៊ុនលោកនៅឆ្នាំនេះ មានការកើនឡើងប្រមាណពី១៥% ទៅ ២០% បើធៀបនឹងឆ្នាំមុន។
បើតាមការអះអាងរបស់លោក ហួរ ធីនាង បើទោះបីជាតម្រូវការមានការកើនឡើង តែតម្លៃជីកសិកម្មនៅឆ្នាំនេះមិនមានការប្រែប្រួលនោះទេ បើធៀបនឹងឆ្នាំមុន និងមិនបានបង្កជាក្ដីបារម្ភដល់កសិករនោះទេ។ ប៉ុន្តែអ្វីដែលជាបញ្ហាប្រឈមសម្រាប់កសិករនោះ គឺការប្រែប្រួលអាកាសធាតុ។ ជាមួយគ្នានេះនៅក្នុងឆ្នាំ២០២៥ ខាងមុខនេះ ក្រុមហ៊ុនអង្គរហ្គ្រីនមានគម្រោងបង្កើនការនាំចូលជីកសិកម្មប្រមាណ២០% បន្ថែមទៀត ក្រោយរំពឹងថា ការធ្វើកសិកម្មរបស់ប្រជាកសិករនៅឆ្នាំក្រោយ នឹងមិនមានការថយចុះនោះទេ និងទំនងជាមានកំណើនជាងមុនផងដែរ។
គួរជម្រាបថា នៅពេញមួយឆ្នាំ២០២៣ កន្លងទៅ កម្ពុជាបាននាំចូលជីកសិកម្ម គិតជាទឹកប្រាក់មានប្រមាណជាង៣២៥លានដុល្លារ មានការកើនឡើងជាង១៧% បើធៀបឆ្នាំ២០២២ ដែលមានចំនួនជាង ២៧៦លានដុល្លារ។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា៕
