បើតាមអ្នកជំនាញ មានមូលហេតុធំៗពីរដែល ធ្វើឲ្យការការនាំចេញអង្ករកើនឡើងនៅដើមខែដំបូងនៃឆ្នាំនេះ ទី១គឺ កំណើននាំចេញអង្ករទៅចិនក្រោយមានការចុះកិច្ចព្រមព្រៀងលើកូតានាំចេញអង្ករថ្មី និងទី២ គឺសហគមន៍អឺរ៉ុបបានលែងយកពន្ធលើអង្ករកម្ពុជាតទៅទៀត ដែលវាបានជំរុញឱ្យការនាំចេញអង្ករទៅទីផ្សារនេះ ក៏មានការកើនឡើងខ្ពស់គួរឲ្យកត់សម្គាល់ផងដែរ។
បើតាមសហព័ន្ធស្រូវអង្ករកម្ពុជា នៅក្នុង ខែមករា ឆ្នាំ២០២២ កម្ពុជាសម្រេចបានការនាំចេញអង្ករប្រមាណ៥ម៉ឺន៣ពាន់តោន ទៅកាន់ទីផ្សារអន្តរជាតិ គិតជាទឹកប្រាក់ជិត៣៦លានដុល្លារ ទៅកាន់គោលដៅទីផ្សារចំនួន៣៤ ដែលក្នុងនោះ ប្រទេសចិន និងតំបន់ស្វយ័តហុងកុង ជាទីផ្សារនាំចេញធំជាងគេរហូត៥៨%នៃការនាំចេញអង្ករសរុប។ ខណៈការនាំចេញអង្ករទៅទ្វីបអ៊ឺរ៉ុប មាន២៣%,តំបន់អាស៊ាន១១% និងទីផ្សារដទៃមាន៥%។ ទន្ទឹមនឹងនេះ នៅខែមករា កម្ពុជា ក៏បាននាំចេញស្រូវ ជាង២៧ម៉ឺនតោន បន្ថែមទៅទីផ្សារអន្តរជាតិ ដែលគិតជាទឹកប្រាក់ប្រមាណ៦០លានដុល្លារ។
អត្ថបទគួរអាន
បើទោះបីជាការនាំចេញអង្ករកើនឡើង ប៉ុន្ដែ អ្នកជំនាញក្នុងវិស័យស្រូវអង្ករ បានគូសបញ្ជាក់ថា រហូតមកដល់ពេលនេះ ជំងឺកូវីដ១៩ នៅតែបន្តគំរាមកំហែង និងធ្វើឱ្យការនាំចេញអង្កររបស់កម្ពុជា ទៅកាន់ទីផ្សារអឺរ៉ុប នៅតែជួបបញ្ហា ដូចជា ខ្វះមធ្យោបាយដឹកជញ្ជូន និងថ្លៃដឹកជញ្ជូនថ្លៃជាដើម។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា បានគូសបញ្ជាក់ដូច្នេះថា ការនាំចេញអង្ករទៅចិនកាន់តែមានសន្ទុះកើនឡើង ដោយសារអង្ករកម្ពុជា ដែលបានចុះហត្ថលេខាជាមួយចិន នាពេលកន្លងមក ត្រូវបានបញ្ចេញនៅដើមឆ្នាំ២០២២ ដើម្បីចាប់ផ្ដើមអនុវត្តកិច្ចសន្យាកូតានាំចេញថ្មី។ លោកបន្តថា ការបញ្ចប់លើការយកពន្ធលើអង្ករកម្ពុជាពីសំណាក់សហភាពអឺរ៉ុប នាពេលថ្មីៗនេះ ក៏ជាឱកាសជំរុញឱ្យការនាំចេញអង្ករមានការកើនឡើង ផងដែរ។
សូមបញ្ជាក់ថា សហព័ន្ធបានកំណត់ផែនការសម្រាប់ការនាំចេញអង្ករឱ្យបានប្រមាណ ៨០ម៉ឺនតោន នៅឆ្នាំ២០២២នេះ ខណៈដែលនៅឆ្នាំ២០២១ កម្ពុជា បាននាំចេញអង្ករ ទៅកាន់គោលដៅសរុបចំនួន៥៦ប្រទេស និងតំបន់ ក្នុងបរិមាណជាង៦១ម៉ឺនតោន គិតជាទឹកប្រាក់មានប្រមាណ ៤១៨លានដុល្លារអាមេរិក៕
None
