ចំនួនរោងចក្រសហគ្រាសរបស់ចិន ដែលរើទីតាំងផលិតកម្មរបស់ខ្លួនទៅកាន់ប្រទេសវៀតណាម បានកើនឡើងចាប់តាំងពីឆ្នាំ២០១៨ នៅពេលដែលលោក ដូណាល់ ត្រា ចាប់ផ្ដើមដំឡើងពន្ធជាលើកដំបូងលើទំនិញនាំចូលរបស់ចិន។ អ្នកស្រី វីននី ឡាំ (Winnie Lam) ដែលជាទីប្រឹក្សាធុរកិច្ចមានមូលដ្ឋាននៅទីក្រុងហូជីមិញ ប្រទេសវៀតណាម បានលើកឡើងថា វៀតណាម នៅតែបន្តទទួលបានអត្ថប្រយោជន៍នៅឡើយពីការកាន់អំណាចអាណត្តិទី១របស់លោក ដូណាល់ ត្រាំ ពីឆ្នាំ២០១៧ ដល់ឆ្នាំ២០២១ ហើយអ្នកស្រីមិនដឹងថានិន្នានេះនឹងបន្តយូរប៉ុនណាទៀតឡើយ ហើយក៏មិនច្បាស់ថា អាណត្តិទី២ របស់លោក ដូណាល់ ត្រាំ នឹងជះផលប៉ះពាល់ដល់ពាណិជ្ជកម្មពិភពលោកបែបណានោះដែរ។
សូមបញ្ជាក់ថា លោក ដូណាល់ ត្រាំ នឹងត្រូវវិលត្រលប់ទៅកាន់សេតវិមានជាថ្មីជាផ្លូវការក្នុងខែមករា ឆ្នាំ២០២៥ ជាមួយនឹងការសន្យាថា នឹងដំឡើងពន្ធយ៉ាងតិច៦០% លើទំនិញនាំចូលរបស់ចិន ហើយកាលពីពេលថ្មីៗនេះ លោក ក៏បានប្រកាសដែរថា លោកនឹងដំឡើងពន្ធ១០% លើទំនិញទាំងអស់របស់ចិន ភ្លាមៗនៅថ្ងៃដំបូងដែលលោកចូលកាន់តំណែង។
លោក ជែក ង្វៀន (Jack Nguyen) នាយកប្រតិបត្តិក្រុមហ៊ុន InCorp និយាយថា ក្នុងមួយសប្ដាហ៍ លោកជួយក្រុមហ៊ុនចិនពី១ទៅ២ផ្លាស់ប្ដូរទីតាំងផលិតកម្មពីប្រទេសចិនមកកាន់ប្រទេសវៀតណាម ដោយសារតែបញ្ហាប្រឈមផ្នែកសេដ្ឋកិច្ចរបស់ប្រទេសចិន ដែលលោករំពឹងថា និន្នាការនេះនឹងបន្តប៉ុន្មានឆ្នាំទៅមុខទៀត។
ក្រុមហ៊ុន Dezan Shira and Associates បានឱ្យដឹងថា ប្រទេសចិន គឺជាអ្នកវិនិយោគធំបំផុតទី១លើគម្រោងថ្មីៗនៅប្រទេសវៀតណាម ក្នុងរយៈពេល៧ខែដំបូងនៃឆ្នាំ២០២៤ នេះ ដែលមានចំណែកគ្របដណ្ដប់រហូតដល់ទៅ២៩,៧%នៃការវិនិយោគផ្ទាល់ពីបរទេស (FDI) សរុបក្នុងប្រទេសនេះ៕
ដោយ: តែម សុខុម
