អនុរដ្ឋមន្ត្រីក្រសួងពាណិជ្ជកម្មថៃ លោក ណាពីនថន ស្រីស៊ុងផាង (Napintorn Srisunpang) បាននិយាយថា ក្រសួងពាណិជ្ជកម្មថៃ បានស្នើសុំបន្ថែមម៉ោងធ្វើការនៅប៉ុស្តិ៍ត្រួតពិនិត្យម៉ូហាន (Mohan) នៅតាមព្រំដែនជាមួយនឹងប្រទេសឡាវ ដោយដោយបន្ថែមម៉ោងធ្វើការចាប់ពីម៉ោង៥.៣០ល្ងាច ទៅម៉ោង៨.៣០យប់។
លោក ណាពីនថន បានអះអាងថា ភាគីថៃ បានពិភាក្សាជាមួយនឹងមន្ត្រីគយនៅតាមច្រកព្រំដែនជាច្រើន និងបានពន្យល់ប្រាប់ពួកគេថា ផ្លែទុរេនថៃ គ្មានប្រើសារធាតុគីមី Basic Yellow 2 (BY2) ឬក៏សារធាតុ Cadmium ដែលអាចធ្វើឲ្យអ្នកទទួលទានប្រឈមនឹងការកើតជំងឺមហារីកនោះទេ។ ដូច្នេះប្រទេសថៃ បានជំរុញឱ្យបុគ្គលិកគយបង្ហាញលទ្ធផលទាំងនេះទៅឱ្យរដ្ឋាភិបាល ក្រុងប៉េកាំង និងបានស្នើសុំឱ្យកាត់បន្ថយពីតម្រូវការត្រួតពិនិត្យយ៉ាងតឹងរឹង១០០% មកនៅត្រឹមតែ៣០%វិញ។
ក្រសួងពាណិជ្ជកម្មថៃ ក៏បានប្រគល់ភារកិច្ចឱ្យនាយកដ្ឋាននៃការលើកកម្ពស់ពាណិជ្ជកម្មអន្តរជាតិ និងការិយាល័យពាណិជ្ជកម្មថៃ ប្រចាំទីក្រុងប៉េកាំង ឲ្យបន្តតាមដានស្ថានភាពនេះ។
ក្នុងពេលកន្លងមក ការនាំចូលផ្លែទុរេនមកពីប្រទេសថៃ មានត្រឹមតែ៣០% ប៉ុណ្ណោះ ដែលត្រូវបានធ្វើតេស្តរកសារធាតុពុល ប៉ុន្តែចាប់តាំងពីខែមករាមក រាល់កុងតឺន័រទាំងអស់ត្រូវឆ្លងកាត់ការត្រួតពិនិត្យរកសារធាតុពុល BY2 និង Cadmium ដោយមន្ទីរពិសោធន៍នៅប្រទេសថៃ បូករួមទាំងការត្រួតពិនិត្យពេញលេញនៅពេលទៅដល់ព្រំដែនចិន ផងដែរ។
អត្ថបទ៖ សុខ មង្គល
