![វិវាទឧបត្ថម្ភធន](https://cdn.cambonomist.com/media/images/chn_chrnhaoy.2e16d0ba.fill-960x540.jpg)
មហាយក្សចិន ដែលមានសេដ្ឋកិច្ចធំបំផុតទី២របស់ពិភពលោក បានប្ដឹងទៅអង្គការពាណិជ្ជកម្មពិភពលោក កាលពីចុងខែមីនា បន្ទាប់ពីរដ្ឋបាលរបស់ប្រធានាធិបតីអាម៉េរិក លោក ចូ បៃឌិន បានអនុម័តច្បាប់កាត់បន្ថយអតិផរណាជាច្បាប់ដ៏ទូលំទូលាយមួយ ដែលផ្តល់ឥណទានពន្ធក្នុងទំហំរាប់ពាន់លានដុល្លារ ដើម្បីជួយដល់អ្នកប្រើប្រាស់ទិញរថយន្តអគ្គិសនី និងក្រុមហ៊ុននានា ដើម្បីផលិតថាមពលកកើតឡើងវិញ ខណៈដែលសេតវិមាន ព្យាយាមកាត់បន្ថយការបំភាយឧស្ម័នកាបូនិចនៅក្នុងវិស័យថាមពលរបស់អាម៉េរិក។
ក្រសួងពាណិជ្ជកម្មចិនបានចេញសេចក្តីថ្លែងការណ៍ថា ប្រទេសចិនមិនទាន់បានឈានដល់ដំណោះស្រាយជាមួយសហរដ្ឋអាម៉េរិក តាមរយៈការជជែកពិភាក្សា ដែលនឹងជួយការពារសិទ្ធិ និងផលប្រយោជន៍នៃឧស្សាហកម្មរថយន្តអគ្គិសនីរបស់ខ្លួននៅឡើយទេ ទើបជំរុញឱ្យខ្លួនស្នើឱ្យអង្គការពាណិជ្ជកម្មពិភពលោកជួយដោះស្រាយ។
ក្រសួងពាណិជ្ជកម្មចិនបានអះអាងថា ច្បាប់កាត់បន្ថយអតិផរណារបស់សហរដ្ឋអាម៉េរិក មិនរាប់បញ្ចូល ឬមានវិសាលភាពគ្របដណ្ដប់លើផលិតផលពីបណ្ដាប្រទេសជាសមាជិករបស់អង្គការពាណិជ្ជកម្មពិភពលោកដូចជាប្រទេសចិន ជាដើមនោះឡើយ ហើយច្បាប់នេះបានបង្កើតនូវរបាំងពាណិជ្ជកម្ម និងជំរុញឱ្យការចំណាយលើអន្តរកាលថាមពលបៃតងហក់ឡើងកាន់តែខ្ពស់។
ទន្ទឹមនេះប្រទេសចិន បានជំរុញឱ្យសហរដ្ឋអាម៉េរិក គោរពតាមច្បាប់របស់អង្គការពាណិជ្ជកម្មពិភពលោក និងបញ្ឈប់ការបំពានលើគោលនយោបាយឧស្សាហកម្មរបស់ខ្លួនដែលធ្វើឱ្យខូចកិច្ចសហប្រតិបត្តិការអន្តរជាតិលើបម្រែបម្រួលអាកាសធាតុ៕
ដោយ: តែម សុខុម