ការប្រែប្រួលអាកាសធាតុកំពុងធ្វើឱ្យភ្លៀងធ្លាក់មិនទៀង និងព្យុះទីហ្វុងកាន់តែខ្លាំង

យោងតាមការចុះផ្សាយរបស់សារព័ត៌មានធំៗ កោះតៃវ៉ាន់ ប្រទេសហ្វីលីពីន និងចិនជាដើម បានរងគ្រោះដោយព្យុះទីហ្វុងហ្គេមី ដ៏កំណាចបំផុតប្រចាំឆ្នាំនេះនៅក្នុងសប្តាហ៍នេះ ដោយសាលារៀន អាជីវកម្ម និងទីផ្សារហិរញ្ញវត្ថុជាច្រើនបានបិទទ្វារ ខណៈដែលល្បឿនខ្យល់បក់បានកើនដល់ ២២៧ គីឡូម៉ែត្រក្នុងមួយម៉ោងនៅពេលព្យុះទីហ្វុងនេះបានទៅដល់ឆ្នេរសមុទ្រភាគខាងកើតរបស់ប្រទេសចិន ហើយមនុស្សរាប់សែននាក់ត្រូវបានជម្លៀសចេញ នៅមុនពេលព្យុះនេះបានទៅដល់ទីនោះកាលពីល្ងាចថ្ងៃព្រហស្បតិ៍។

ក្រុមអ្នកវិទ្យាសាស្ត្របាននិយាយថា ព្យុះត្រូពិចដ៏កំណាចបំផុតនេះ គឺជាផ្នែកមួយនៃបាតុភូតរលកកម្ដៅកាន់តែខ្លាំងឡើងដោយសារតែសីតុណ្ហភាពកាន់តែឡើងកម្ដៅខ្លាំង។

ក្រុមអ្នកស្រាវជ្រាវដឹកនាំដោយលោក ហ្សាង វ៉ិនសៀ (Zhang Wenxia) នៅបណ្ឌិតសភាវិទ្យាសាស្ត្រចិនបានសិក្សាទិន្នន័យឧតុនិយមជាប្រវត្តិសាស្ត្រ ហើយរកឃើញថា ប្រហែល៧៥% នៃផ្ទៃដីរបស់ពិភពលោកបានកើនឡើងនូវ «ការប្រែប្រួលទឹកភ្លៀង» ឬការប្រែប្រួលកាន់តែទូលំទូលាយរវាងអាកាសធាតុសើម និងស្ងួត។

ក្រុមអ្នកស្រាវជ្រាវបាននិយាយនៅក្នុងទស្សនាវត្ដីវិទ្យាសាស្ត្រមួយថា សីតុណ្ហភាពឡើងកម្ដៅបានបង្កើនសមត្ថភាពបរិយាកាសក្នុងការរក្សាសំណើមដែលបង្កឱ្យមានការប្រែប្រួលទឹកភ្លៀងកាន់តែទូលំទូលាយ។ ក្រុមអ្នកវិទ្យាសាស្ត្រជឿថា ការប្រែប្រួលអាកាសធាតុក៏កំពុងផ្លាស់ប្តូរកម្រិតព្យុះត្រូពិចរួមទាំងព្យុះទីហ្វុងផងដែរ ពោលគឺវាមិនសូវកើតឡើងញឹកញាប់នោះទេ ប៉ុន្តែវាមានកម្លាំងខ្លាំងជាងមុន៕

អត្ថបទ៖ សុខ មង្គល