យ៉ាងហោចណាស់មានគម្រោងអភិវឌ្ឍន៍លំនៅឋានធំៗ៤ ត្រូវបានបើកការដ្ឋានសាងសង់ និងបើកលក់នៅដើមឆ្នាំ២០២៥ នេះ ដែលជាសញ្ញាល្អមួយសម្រាប់វិស័យអចលនទ្រព្យរបស់កម្ពុជា ដែលបានរងភាពរង្គោះរង្គើដោយសារវិបត្តិសកលផ្សេងៗជាច្រើនឆ្នាំកន្លងមកនេះ។ គម្រោងធំៗទាំងនោះ រួមមានទី១, គម្រោងលំនៅឋានប្រណីតរបស់បុរីវិមានភ្នំពេញ របស់លោកអ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប ដែលស្ថិតនៅតាមបណ្តោយផ្លូវ ជា សុផារ៉ា។ គម្រោងនេះត្រូវបានបើកការដ្ឋានសាងសង់នៅថ្ងៃទី១៥ ខែមករា ឆ្នាំ២០២៥។ ទី២, គម្រោងភូមិ មរកត របស់ក្រុមហ៊ុន ប៉េង ហួត ស្ថិតនៅតាមបណ្តោយផ្លូវ៦០ម៉ែត្រ ដែលបានបើកការដ្ឋានសាងសង់នៅថ្ងៃទី២៣ ខែមករា។
ទី៣, គម្រោងពិភពថ្មី ខុនដូ សែនសុខ របស់អ្នកឧកញ៉ា ហុង ពីវ អគ្គនាយកក្រុមហ៊ុនបុរីពិភពថ្មី ដោយគម្រោងខុនដូតម្លៃសមរម្យនេះគ្រោងបើកលក់ជាផ្លូវការនៅថ្ងៃទី២២ ខែកុម្ភៈ។ និងទី៤, គម្រោងលំនៅឋានរបស់ក្រុមហ៊ុន មេគង្គលែន ស៊ីធី ដែលបានបើកការដ្ឋានសាងសង់ប្លុកថ្មីប្រភេទលំនៅឋាន វីឡាឃ្វីន A និងវីឡាឃ្វីន B នៅតំបន់ជ្រោយចង្វារតាមបណ្តោយផ្លូវជាតិ ៦A។
លោក ស៊ា ឆៃលីន នាយកប្រតិបត្តិក្រុមហ៊ុនអចលនទ្រព្យ ឆៃលីន ស៊ា រៀលធី បានចាត់ទុកការបើកការដ្ឋានសាងសង់គម្រោងអភិវឌ្ឍន៍លំនៅឋានរបស់ក្រុមហ៊ុនគ្រាក់ៗ ខាងលើនៅដើមឆ្នាំនេះ ជាការសម្លឹងឃើញឱកាសរបស់អ្នកវិនិយោគនាពេលខាងមុខ ហើយវាជាសញ្ញាបង្ហាញឱ្យឃើញពីស្ថានភាពសេដ្ឋកិច្ច ដែលអាចវិលមករកប្រក្រតីភាពឡើងវិញនៅអំឡុង២ឆ្នាំខាងមុខ។
សូមបញ្ជាក់ថា ពាក់ព័ន្ធនឹងវិស័យអចលនទ្រព្យនេះដែរ រាជរដ្ឋាភិបាលកម្ពុជាតាមរយៈក្រសួងរៀបចំដែនដី និងធនាគារជាតិ បានជួបប្រជុំគ្នាជាមួយស្ថាប័នពាក់ព័ន្ធនានា ដើម្បីសម្របសម្រួលឲ្យអ្នកទិញផ្ទះ ដែលបង់រំលស់ជាមួយម្ចាស់បុរី អាចបង្វែរការបង់រំលស់ជាមួយធនាគារ ដែលមានអត្រាការប្រាក់ទាប។ កត្តានេះ ត្រូវបានអ្នកជំនាញក្នុងវិស័យអចលនទ្រព្យមើលឃើញថា វាគឺជាការជួយសម្រាលបន្ទុករបស់អ្នកទិញ ហើយក៏នឹងជំរុញដល់កំណើនទីផ្សារអចលនទ្រព្យឲ្យកាន់តែមានភាពរស់រវើកជាងមុនផងដែរ៕
អត្ថបទ៖ បូ ដូឡា
