តម្លៃប្រេងឆៅនៅទីផ្សារអង់គ្លេសនៅថ្ងៃចន្ទដើមសប្ដាហ៍នេះ បានកើនឡើងដល់ ៥៨សេន បន្ថែមទៀត នាំឲ្យតម្លៃប្រេងកើនដល់៨៨ដុល្លារ៧០សេនក្នុងមួយធុងបារ៉ែល។ បើក្រឡេកមើលទៅប្រេងឆៅនៅទីផ្សារអាមេរិកវិញ បានកើនឡើង ៥៧ សេនបន្ថែមទៀត នាំឲ្យតម្លៃប្រេងមានដល់ ៨៥ដុល្លារ៧១សេនក្នុងមួយបារ៉ែល។
តម្លៃប្រេងនៅទីផ្សារទាំងពីរនេះ បានកើនឡើងមក៥ សប្តាហ៍ជាប់ៗគ្នាហើយ ហើយកាលពីសប្តាហ៍មុនមានការកើនឡើងប្រហែល ២% ដែលជាកម្រិតខ្ពស់បំផុតគិតចាប់តាំងពីខែតុលា ឆ្នាំ ២០១៤មក។ ហើយបើគិតជាមធ្យម ក្នុងដើមឆ្នាំ២០២២នេះ តម្លៃប្រេងឆៅបានកើនឡើងជាង ១០% ដោយសារមានការបារម្ភអំពីការរឹតបន្តឹងការផ្គត់ផ្គង់។ អ្នកវិភាគទីផ្សារប្រេង បានអះអាងថា វិនិយោលើទីផ្សារប្រេងនៅតែមានការព្រួយបារម្មណ៍ ដោយសារតែបញ្ហាហានិភ័យតំបន់ភូមិសាស្ត្រនយោបាយរវាងរុស្ស៊ី និងអ៊ុយក្រែន ក៏ដូចជានៅមជ្ឈិមបូព៌ា ខណៈពេលដែលអង្គការនៃប្រទេសនាំចេញប្រេង(OPEC+) ក៏បន្តបរាជ័យក្នុងការឈានដល់គោលដៅទិន្នផលប្រេងរបស់ខ្លួន ។
អត្ថបទគួរអាន
អ្នកវិភាគបន្ថែមថា ការរំពឹងទុកតម្លៃប្រេងនឹងកើនឡើងថែមទៀតនៅសហរដ្ឋអាមេរិក ចំពេលអាកាសធាតុត្រជាក់ក៏បានបន្ថែមសម្ពាធលើតម្លៃប្រេងផងដែរ។
អង្គការ OPEC+ ដែលរួមមានប្រទេសរុស្ស៊ី និងអ្នកផលិតផ្សេងទៀត កំពុងខិតខំដើម្បីឈានដល់គោលដៅបង្កើនទិន្នផលប្រេងរបស់ខ្លួនឲ្យបាន ៤០ម៉ឺនបារ៉ែលមួយថ្ងៃ។ ទោះយ៉ាងណា អ្នកវិភាគទីផ្សារប្រេង មើលឃើញថា តាមការរំពឹងទុកដែលសមាជិក អង្គារ OPEC+ ដូចជាអារ៉ាប៊ីសាអូឌីត និងរុស្ស៊ី ទំនងជារក្សាគោលនយោបាយបច្ចុប្បន្ននៃការកើនឡើងទិន្នផលបន្តិចម្តងៗ ដើម្បីរក្សាតម្លៃប្រេងឆៅ ឲ្យនៅចន្លោះពី ៨៥ ទៅ ៩០ ដុល្លារក្នុងមួយធុងបារ៉ែល ។
ដោយឡែក សហរដ្ឋអាមេរិក ស្តុកប្រេងបានបន្តធ្លាក់ចុះក្នុងរយៈពេលមួយខែចុងក្រោយនេះ ខណៈដែលក្រុមហ៊ុនថាមពលបានកាត់បន្ថយការខួងបូមយកប្រេងនៅសប្តាហ៍នេះជាលើកដំបូងក្នុងរយៈពេល ១៣ សប្តាហ៍កន្លងមកនេះ៕
None
