ភ្លាមៗក្រោយសកម្មភាពរបស់យោធារុស្សីកាលពីថ្ងៃអង្គារ សហរដ្ឋអាមេរិកបានប្រកាស ហាមប្រាមពលរដ្ឋរបស់ខ្លួនមិនឲ្យធ្វើអាជីវកម្មឡើយនៅ តំបន់ដូណេតក៍ (Donetsk) និង លូហាន់ក៍ (Luhansk) ដែលជាតំបន់កាន់កាប់ដោយក្រុមទាមទារផ្តាច់ទឹកដីនិយមគាំទ្ររុស្ស៊ី។ យ៉ាងណាក៏ដោយ ក្រុមហ៊ុនអាមេរិកមួយចំនួននៅតែមានសកម្មភាពនៅឡើយក្នុងតំបន់ទាំងពីរនោះ។
ដោយឡែកនៅថ្ងៃពុធនេះ លោក ចូ បៃឌិន ថ្លែងចេញពីសេតវិមាន បានថ្កោលទោសទង្វើរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ថាជា ការរំលោភច្បាប់អន្តរជាតិយ៉ាងធ្ងន់ធ្ងរ។ ប្រធានាធិបតីអាមេរិករូបនេះ បានប្រកាសដាក់ទណ្ឌកម្មថ្មីៗ ទៅលើបុគ្គលមានឥទ្ធិពលមួយចំនួនក្នុងជួររដ្ឋាភិបាលក្រុងម៉ូស្គូ និងក្រុមគ្រួសាររបស់ពួកគេ គួបផ្សំនឹងធនាគារសំខាន់ៗចំនួន ២ របស់ប្រទេសរុស្ស៊ីផងដែរ។ ធនាគារដែលរងទណ្ឌកម្មទាំងពីរនោះរួមមាន ធនាគារដើម្បីអភិវឌ្ឍរុស្សី V.E.B និង ធនាគារយោធារបស់រុស្សី។ ទន្ទឹមនឹងនេះ ស្ថាប័នហិរញ្ញវត្ថុរបស់សហរដ្ឋអាមេរិកក៏នឹងត្រូវហាមឃាត់មិនឱ្យដំណើរការប្រតិបត្តិការទូទាត់សម្រាប់ធនាគាររុស្ស៊ីទាំងអស់ ហើយធនាគាររបស់រុស្សីក៏នឹងមិនអាចទទួលបានមូលនិធិពីលោកខាងលិចទៀតផងដែរ។
បន្ថែមពីលើនេះ សហភាពអឺរ៉ុប អាល្លឺម៉ង់ និងចក្រភពអង់គ្លេស សុទ្ធតែបានប្រកាសអំពីគោលដៅដូចៗគ្នា ក្នុងការដាក់ទណ្ឌកម្មផ្នែកហិរញ្ញវត្ថុទៅលើប្រទេសរុស្ស៊ី។ ក្នុងនោះ រដ្ឋាភិបាលអាល្លឺម៉ង់បានសម្រេចផ្អាកដំណើរការគម្រោងបំពង់បង្ហូរឧស្ម័នក្រោមបាតសមុទ្រដែលបញ្ជូនបង្ហូរឧស្ម័នពីតំបន់ស៊ីបេរីរបស់រស្ស៊ីទៅប្រទេសអាល្លឺម៉ង់។ ដោយឡែក មេដឹកនាំសហភាពអឺរ៉ុបក៏បានពិចារណាកំណត់គោលដៅលើអ្នកនយោបាយ និងធនាគាររបស់រុស្ស៊ីជាច្រើនក្នុងទណ្ឌកម្មប្រឆាំងនឹងវិមានក្រេមឡាំងផងដែរ។
អត្ថបទគួរអាន
សូមជម្រាបថា ទណ្ឌកម្មទាំងនេះពីលោកខាងលិច ធ្លាក់មកក្រោយពេលដែល ប្រធានាធិបតីរុស្ស៊ី លោ ពូទីន បានចេញបញ្ជាឱ្យកងទ័ពរុស្ស៊ី ចូលទៅកាន់តំបន់ចំនួនពីរ ដែលបច្ចុប្បន្នកំពុងកាន់កាប់ដោយក្រុមឧទ្ទាមផ្ដាច់ខ្លួននៅភាគខាងកើតប្រទេសអ៊ុយក្រែន ហើយដែលរុស្សីប្រកាសទទួលស្គាល់ឯករាជ្យក្នុងថ្ងៃតែមួយ។ នៅចំពោះមុខបញ្ហានេះ សហរដ្ឋអាមេរិក បានប្រកាសបង្កើនការប្រុងប្រៀប របស់កងទ័ពសម្ព័ន្ធមិត្តណាតូ ដែលមានស្រាប់ក្នុងតំបន់អឺរ៉ុបខាងកើត ហើយសន្យាថា នឹងការពារទឹកដីរបស់ណាតូ មិនឲ្យបាត់សូម្បីតែ ចំអាមនោះឡើយ។ដោយឡែកនៅតំបន់អាស៊ីឯណេះវិញប្រទេសជប៉ុន ក៏បានប្រកាស ដាក់ទណ្ឌកម្មផ្នែកសេដ្ឋកិច្ចពាណិជ្ជកម្ម ប្រឆាំងនឹង រុស្ស៊ី ជុំវិញ បញ្ហា បំពាន ច្បាប់ អន្តរជាតិ ។ រីឯមហាយក្សចិន ដែលជាសម្ព័ន្ធមិត្តជិតស្និទ្ធបំផុតរបស់រុស្ស៊ី មិនបានចូលរួមគាំទ្ររុស្ស៊ីនោះទេ ហើយឥណ្ឌា អឺរ៉ង់ ក៏បានប្រតិកម្មជាមួយលោកពូទីនប្រកាសទទួលស្គាល់ឯករាជ្យដែនដីចង់ផ្តាច់ខ្លួនចំនួនពីរនៅភាគខាងកើតនៃប្រទេសអ៊ុយក្រែន និងបានលើកទ័ពចូលតំបន់នោះផងដែរ។
មន្ត្រីរដ្ឋបាលលោកចូ បៃឌិន ថ្មីៗនេះ ក៏បានជួបពិភាក្សាជាមួយនឹងរដ្ឋាភិបាលអ៊ុយក្រែនផងដែរ ដោយអាមេរិកបានស្នើឲ្យប្រធានាធិបតីអ៊ុយក្រែន គឺលោក វ៉ូឡូឌីមៀ សាឡែនស្គី ចាកចេញពីរដ្ឋធានីកៀវ នៅពេលដែលរុស្ស៊ីបើកឆាកប្រយុទ្ធឈ្លានពានអ៊ុយក្រែន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
