របាយការណ៍ស្ទង់មតិមួយបានបង្ហាញគួរឱ្យភ្ញាក់ផ្អើលថា ការរអាក់រអួលដំណើរការអាជីវកម្មក្នុងអាស៊ាន ធ្វើឱ្យខាតបង់២,៥លានដុល្លារ ក្នុងមួយម៉ោងដែលខ្ពស់ជាងការខាតបង់ជាមធ្យមរបស់ពិភពលោករហូតដល់ប្រមាណ៣២%ឯណោះ។ ការស្ទង់មតិដែលធ្វើឡើងទៅលើអ្នកជំនាញផ្នែកបច្ចេកវិទ្យាជាង១,៧០០នាក់មកពីប្រទេសចំនួន១៦នេះបានបង្ហាញថា ការរអាក់រអួលដំណើរការអាជីវកម្មទូទាំងពិភពលោកលើកលែងតែអាស៊ាន បានបង្កការខាតបង់ជាមធ្យម១,៩លានដុល្លារអាម៉េរិក ក្នុងមួយម៉ោង។
របាយការណ៍ដដែលបានបន្តថា អ្នកឆ្លើយ៨០%មកពីសិង្ហបុរី និយាយថា ពួកគេអាចដោះស្រាយការរអាក់រអួលដំណើរការអាជីវកម្មបានឆាប់រហ័សជាងមុន បន្ទាប់ពីប្រើប្រាស់ឧបករណ៍តាមដាន ដែលនេះជាតួលេខខ្ពស់បំផុតក្នុងចំណោមប្រទេសទាំងអស់ដែលត្រូវបានស្ទង់មតិ។
ក្រុមវិស្វករក្នុងតំបន់អាស៊ាន ចំណាយប្រមាណ៣០%នៃពេលវេលារបស់ពួកគេ ឬ ជាមធ្យម១២ម៉ោងក្នុងមួយសប្ដាហ៍នៅក្នុងការដោះស្រាយបញ្ហារអាក់រអួលដំណើរអាជីវកម្ម។ មូលហេតុចម្បងនៃការរអាក់រអួលអាជីវកម្មដោយឥតបានព្រៀងទុកនៅក្នុងរយៈពេល២ឆ្នាំចុងក្រោយនេះ គឺការគាំងបណ្ដាញដែលមាន៣៥% បញ្ហាជាមួយភាគីទី៣ ឬ អ្នកផ្ដល់សេវាកម្ម Cloud មាន២៩% និងបញ្ហារអាក់រអួលដែលបង្កឡើងដោយមនុស្សមាន២៨%។
ការរអាក់រអួលដំណើរការអាជីវកម្មកើតមានជាញឹកញាប់ ដោយ១ភាគ៣នៃក្រុមហ៊ុនក្នុងតំបន់អាស៊ាន ជួបប្រទះបញ្ហារអាក់រអួលរៀងរាល់សប្ដាហ៍៕
ដោយៈ សរ សុជាតិ
