លោក ដូណាល់ ត្រំា បញ្ជាឱ្យរៀបចំផែនការកាត់បន្ថយបុគ្គលិកទ្រង់ទ្រាយធំ

លោក ដូណាល់ ត្រាំ ប្រធានាធិបតីសហរដ្ឋអាម៉េរិក បានធ្វើឱ្យពិភពលោកមានការភ្ញាក់ផ្អើលទៀតហើយ ដោយលោកបានបញ្ជាឱ្យទីភ្នាក់ងាររដ្ឋាភិបាលសហព័ន្ធរបស់សហរដ្ឋអាម៉េរិក ធ្វើការឱ្យជិតស្និទ្ធជាមួយទីប្រឹក្សាកំពូលរបស់ខ្លួន គឺលោក អេឡិន ម៉ាស់ ក្នុងកាត់បន្ថយកម្លាំងការងាររបស់សហព័ន្ធដោយកំណត់អត្តសញ្ញាណបុគ្គលិករដ្ឋាភិបាល ដែលអាចត្រូវបញ្ចប់ការងារ និងមុខងារដែលអាចត្រូវបានលុបចោលទាំងស្រុងពីក្របខណ្ឌតែម្តង។ ពាក់ព័ន្ធនឹងការសម្រេចចិត្តនេះ អ្នកវិភាគបានអះអាងថា លោក ត្រំា កំពុងដឹកនាំកិច្ចខិតខំប្រឹងប្រែងដើម្បីកាត់បន្ថយអ្វីដែលលោកធ្លាប់បានមើលឃើញថា ជាកាកសំណល់របស់រដ្ឋាភិបាល។

ពាក់មួកដែលមានអក្សរ Make America Great Again ឬធ្វើឲ្យអាម៉េរិកអស្ចារ្យម្តងទៀត មហាសេដ្ឋីមានជាងគេនៅលើពិភបលោក អេឡិន ម៉ាស់ ទោះបីមិនមែនជាមន្ត្រីរដ្ឋាភិបាលសហព័ន្ធ តែត្រូវបានលោក ដូណាល់ ត្រាំ តែងតាំងឱ្យដឹកនាំស្ថាប័នប្រសិទ្ធភាពរដ្ឋាភិបាល និងផ្តល់សិទ្ធិអំណាចក្នុងការរុះរើផ្នែកខ្លះនៃរដ្ឋាភិបាល ដើម្បីកាត់បន្ថយការចំណាយ។

កំពូលមហាសេដ្ឋីរូបនេះ បានអះអាងថា សហរដ្ឋអាម៉េរិក មិនបណ្តោយឱ្យមានការិយាធិបតេយ្យសហព័ន្ធស្វយ័តទៀតនោះទេ ហើយលោកបានហៅការិយាធិបតេយ្យ​នេះថា ជាសាខាទីបួនរបស់រដ្ឋាភិបាលដែលមិនស្របតាមរដ្ឋធម្មនុញ្ញ។ លោក ម៉ាស់ ដែលជាស្ថាបនិក និងនាយកប្រតិបត្តិក្រុមហ៊ុន Tesla និងក្រុមហ៊ុនបណ្តាញសង្គម X បានលើកទឹកចិត្តឲ្យក្រុមមន្រ្តីរបស់លោកធ្វើប្រតិបត្តិការយ៉ាងសម្ងាត់។

អ្នកវិភាគបានលើកឡើងថា បទបញ្ជាប្រតិបត្តិនេះ គឺជាកិច្ចខិតខំប្រឹងប្រែងចុងក្រោយបំផុតរបស់ លោក ត្រាំ និងលោក ម៉ាស់ ដើម្បីបង្រួម និងតម្រឹមរដ្ឋាភិបាលសហរដ្ឋអាម៉េរិកជាមួយនឹងអាទិភាពគោលនយោបាយរបស់លោក ត្រាំ។ លោក ម៉ាស់ និងលោក ត្រាំ បានអះអាងថា ពួកគេទាំងពីរកំពុងខិតខំធ្វើយ៉ាងណាសន្សំប្រាក់ឲ្យបានយ៉ាងហោចណាស់១ទ្រីលានដុល្លារ តាមរយៈការខិតខំប្រឹងប្រែង ដើម្បីកំណត់អត្តសញ្ញាណ និងការក្លែងបន្លំ រួមទាំងការខ្ជះខ្ជាយនៅក្នុងរដ្ឋាភិបាល ដែលមានទំហំ១៥% នៃការចំណាយសរុបរបស់សហព័ន្ធ៕

ដោយៈ សរ សុជាតិ