ប្រសិនបើលោក ដូណាល់ ត្រាំ ធ្វើតាមអ្វីដែលលោកបានសន្យាក្នុងអំឡុងពេលធ្វើយុទ្ធនាការឃោសនាបោះឆ្នោតមែននោះ កំណើនសេដ្ឋកិច្ចរបស់សហភាពអឺរ៉ុប អាចនឹងរងផលប៉ះពាល់យ៉ាងធ្ងន់ធ្ងរ ព្រោះប្រធានាធិបតីអាម៉េរិក ទើបជាប់ឆ្នោតរូបនេះ បាននិយាយម្តងហើយម្តងទៀតថា លោកមានបំណងកំណត់យកពន្ធគយ១០% លើទំនិញអឺរ៉ុប ដែលនាំចូលទៅកាន់សហរដ្ឋអាម៉េរិក។
សារព័ត៌មាន Euro News បានគូសបញ្ជាក់ថា ឧស្សាហកម្មដែកថែប និងឧស្សាកម្មរថយន្តរបស់សហភាពអឺរ៉ុប នឹងរងគ្រោះខ្លាំងជាងគេ ហើយជាពិសេសគឺឧស្សាហកម្មរថយន្តក្នុងប្រទេសអាល្លឺម៉ង់ ដែលមានសេដ្ឋកិច្ចធំបំផុតនៅអឺរ៉ុបតែម្ដង។
សមាគមឧស្សាហកម្មរថយន្តអាល្លឺម៉ង់ (VDA) បាននិយាយថា សហភាពអឺរ៉ុប ត្រូវតែចាត់រាល់វិធានការចាំបាច់ ដើម្បីធានាបានថា ពន្ធគយថ្មីរបស់សហរដ្ឋអាម៉េរិក មិនត្រូវបានដាក់ចេញឱ្យអនុវត្ត។
សូមបញ្ជាក់ថា ឧស្សាហកម្មរថយន្តនៅប្រទេសអាល្លឺម៉ង់ កំពុងជួបការលំបាករួចទៅហើយ ដោយថ្មីៗនេះក្រុមហ៊ុនផលិតរថយន្តខ្នាតយក្ស Volkswagen បានប្រកាសបិទរោងចក្រចំនួន៣។ ការសិក្សាថ្មីមួយបានរកឃើញថា ការងាររហូតដល់ទៅប្រមាណ១៨ម៉ឺន៦ពាន់កន្លែងអាចនឹងត្រូវបាត់បង់ក្នុងឧស្សាហកម្មរថយន្តនៅអឺរ៉ុប ក្នុងរយៈពេលមួយទសវត្សរ៍ក្រោយ នៅពេលដែលឧស្សាហកម្មនេះងាកទៅរកផលិតកម្មរថយន្តអគ្គិសនី៕
ដោយ: តែម សុខុម
