ឆ្លើយតបជាមួយអ្នកសារព័ត៌មាននៅលើយន្តហោះ Air Force One លោក ដូណាល់ ត្រាំ ប្រធានាធិបតីសហរដ្ឋអាម៉េរិកបានអះអាងថា ប្រសិនបើចិនព្រមចុះកិច្ចព្រមព្រៀងលក់កម្មវិធីវីដេអូខ្លីៗ TitTok របស់ក្រុមហ៊ុន Byte Dance ឱ្យក្រុមហ៊ុនអាម៉េរិក លោកនឹងពិចារណាបន្ធូរបន្ថយពន្ធ ដែលអាម៉េរិកបានដាក់លើទំនិញរបស់ចិន។
កម្មវិធី TikTok ដែលកំពុងរកការគំរាមកំហែងពីអាម៉េរិកឱ្យបិទប្រតិបត្តិការនៅលើទឹកដីសហរដ្ឋអាម៉េរិក នឹងផុតកំណត់ក្នុងការស្វែងរកអ្នកទិញ ដែលមិនមែនជាជនជាតិចិននៅថ្ងៃទី៥ ខែមេសា នេះ។ តែយ៉ាងណាលោក ត្រាំ បាននិយាយថា រដ្ឋបាលរបស់លោកជិតឈានដល់កិច្ចព្រមព្រៀងមួយស្ដីពីការលក់កម្មវិធី TikTok ហើយដោយមានអ្នកវិនិយោគជាច្រើនចូលរួមក្នុងកិច្ចព្រមព្រៀងនេះ។ តែយ៉ាងណាក្រុមហ៊ុន TikTok មិនបានឆ្លើយតបចំពោះការលើកឡើងរបស់លោក ត្រាំ នេះទេ។
ការបញ្ជាក់របស់លោក ត្រាំ នេះបានធ្វើឡើងមួយថ្ងៃបន្ទាប់ពីលោកបានប្រកាសពន្ធមូលដ្ឋាន ១០%លើការនាំចូលទាំងអស់ទៅកាន់សហរដ្ឋអាម៉េរិក និងពន្ធខ្ពស់ជាងនេះលើដៃគូពាណិជ្ជកម្មដ៏ធំបំផុតមួយចំនួនរបស់អាម៉េរិក។ បច្ចុប្បន្នប្រទេសចិនប្រឈមមុខនឹងការយកពន្ធរហូតដល់៥៤%លើទំនិញដែលនាំទៅសហរដ្ឋអាម៉េរិក៕
អត្ថបទ៖ សុខ មង្គល
