ទីក្រុងមូស្គូបាននឹងកំពុងវាយប្រហារមីស៊ីលដោយកំណត់គោលដៅលើហេដ្ឋារចនាសម្ព័ន្ធថាមពល ដែលបានធ្វើឱ្យអ៊ុយក្រែនក្លាយជាប្រទេសស្ទើរតែគ្មានអគ្គិសនីប្រើប្រាស់ ស្របពេលដែលសីតុណ្ហភាពកំពុងធ្លាក់ចុះត្រជាក់នៅរដូវរងា។
នាយកប្រចាំតំបន់របស់ WHO លោក Hans Kluge បានប្រាប់ក្រុមអ្នកយកព័ត៌មានថា ការខូចខាតកំពុងមានឥទ្ធិពលលើប្រព័ន្ធសុខាភិបាលអ៊ុយក្រែន ដោយលោកព្រមានថា «រដូវរងានេះនឹងប៉ះពាល់ ក៏ដូចជាគំរាមកំហែងដល់អាយុជីវិតមនុស្សរាប់លាននាក់នៅអ៊ុយក្រែន»។ បើតាមមន្ត្រីជាន់ខ្ពស់របស់អង្គការ WHO រូបនេះ មានប្រជាជនអ៊ុយក្រែនរហូតដល់ទៅជាង ៣លាននាក់បានចាកចេញពីផ្ទះរបស់ពួកគេ ដើម្បីស្វែងរកកន្លែងកក់ក្តៅ និងជម្រកសុវត្ថិភាព។
ជាមួយគ្នានេះ ប្រធានក្រុមហ៊ុនផ្តល់ថាមពលដ៏ធំមួយក្នុងប្រទេសអ៊ុយក្រែនបាននិយាយកាលពីថ្ងៃចន្ទថា ប្រជាជនអ៊ុយក្រែនទំនងជារស់នៅជាមួយនឹងការដាច់ភ្លើងយ៉ាងហោចណាស់រហូតដល់ចុងខែមីនា ឆ្នាំ២០២៣ ស្របពេលដែលរដ្ឋាភិបាលបានចាប់ផ្តើមការជម្លៀសប្រជាជនពីទីក្រុងខឺសុនទៅកាន់តំបន់ផ្សេងទៀត។
អត្ថបទគួរអាន
ទន្ទឹមនឹងនេះដែរ អ៊ុយក្រែនបាននិយាយថា ខ្លួនបានរកឃើញកន្លែងធ្វើទារុណកម្មរុស្ស៊ីចំនួនបួននៅក្នុងទីក្រុង Kherson ភាគខាងត្បូង ដែលកងកម្លាំងរបស់ទីក្រុងម៉ូស្គូបានដកចេញកាលពីដើមខែនេះ ក្នុងនោះបានបន្សល់ទុកនូវការបំផ្លិចបំផ្លាញប្រៀបបានដូចជាទីក្រុងខ្មោច។ រដ្ឋអំណាចទីក្រុងកៀវ បានចោទប្រកាន់កងទ័ពទីក្រុងម៉ូស្គូថាបានកម្ទេចហេដ្ឋារចនាសម្ព័ន្ធសំខាន់ៗដូចជាស្ថានីយ និងប្រព័ន្ធផ្គត់ផ្គង់ទឹក និងអគ្គិសនីក្នុងតំបន់នោះ។
ការិយាល័យនៃប្រធានរដ្ឋអាជ្ញាអ៊ុយក្រែនបាននិយាយនៅក្នុងសេចក្តីថ្លែងការណ៍មួយថា «រួមគ្នាជាមួយមន្រ្តីប៉ូលិស និងអ្នកជំនាញរដ្ឋអាជ្ញា បានធ្វើការត្រួតពិនិត្យទីតាំងចំនួន ៤ ដែលក្នុងអំឡុងពេលនៃការគ្រប់គ្រងដោយកងទ័ពម៉ូស្គូបានឃុំខ្លួនមនុស្សដោយខុសច្បាប់ និងធ្វើទារុណកម្មពួកគេយ៉ាងឃោរឃៅ»។
ផ្ទុយទៅវិញ វិមានក្រឹមឡាំងបានចេញមុខបដិសេធ និងបានចោទប្រកាន់បកទៅអ៊ុយក្រែនវិញថា បានធ្វើទារុណកម្មលើកងទ័ពរុស្ស៊ី ហើយខ្លួននឹងស្វែងរក និងផ្តន្ទាទោសអ្នកដែលបានសម្លាប់ទាហានរុស្ស៊ីរាប់សិបនាក់យ៉ាងឃោរឃៅ។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកយកព័ត៌មានថា «ដោយគ្មានការសង្ស័យ រុស្ស៊ីខ្លួនឯងនឹងស្វែងរកអ្នកដែលប្រព្រឹត្តឧក្រិដ្ឋកម្មនេះ និងយកមកផ្តន្ទាទោសឱ្យបាន»។
ទោះជាយ៉ាងណា អ៊ុយក្រែនបានបដិសេធថា កងកម្លាំងរបស់ខ្លួនមិនបានសម្លាប់អ្នកទោសសង្គ្រាមនោះទេ ហើយទាហានទាំងនោះ ត្រូវបានបាញ់សម្លាប់បន្ទាប់ពីតដៃមិនចុះចាញ់។ ដោយឡែក បើតាមការពិនិត្យមើលដោយអង្គការសហប្រជាជាតិបានឱ្យដឹងថា ទាំងភាគីអ៊ុយក្រែន និងរុស្ស៊ី គឺបានប្រព្រឹត្តអំពើទារុណកម្មនេះ៕
