ក្រោយដំណើរទស្សនកិច្ចទៅកាន់ប្រទេសចិន លោក ម៉ាក្រុង បានបង្ហាញពីទំនោរគាំទ្រទីក្រុងប៉េកាំង ដោយលើកឡើងថា អឺរ៉ុបមិនគួរដើរតាមគោលនយោបាយរបស់សហរដ្ឋអាមេរិក លើជម្លោះដែនកោះតៃវ៉ាន់នោះទេ ពោលគឺសហភាពអឺរ៉ុបគួរតែជៀសវាងនាំយកបញ្ហាដែល«មិនមែនជារបស់អឺរ៉ុប»មកដាក់ខ្លួន។
ថ្លែងនៅក្នុងសភាអឺរ៉ុប លោកស្រី វ៉ុន ដ័រ លីយេន បានប្រាប់ទៅកាន់សមាជិកសភាថា៖ «គោលនយោបាយអឺរ៉ុបដ៏រឹងមាំមួយ ចំពោះចិន ប្រាកដណាស់គឺត្រូវពឹងផ្អែកលើការសម្របសម្រួលគ្នាយ៉ាងតឹងណែនរវាងសមាជិក និងស្ថាប័នអឺរ៉ុប ហើយត្រូវមានឆន្ទៈជៀសវាងល្បិចកលបំបែកបំបាក់និងចាក់រុក»។
លោកស្រីបានបន្តថា៖ «យើងបានឃើញល្បិចកលនេះក្នុងមួយរយៈចុងក្រោយថ្មីៗនេះ។ ដូចនេះ វាដល់ពេលហើយសម្រាប់អឺរ៉ុប ក្នុងទប់ស្កាត់វិញ ពោលគឺការសាមគ្គីគ្នាជាធ្លុងមួយ»។
អត្ថបទគួរអាន
បន្ថែមពីនេះ ប្រធានគណៈកម្មការអឺរ៉ុបរូបនេះក៏បានបញ្ជាក់ម្តងហើយម្តងទៀតថា រដ្ឋជាសមាជិកទាំង ២៧ ប្រទេស កាត់បន្ថយការពឹងផ្អែកលើធនធានសំខាន់ៗរបស់ប្រទេសចិនដែលបាននិងកំពុងពង្រីកឥទ្ធិពលកាន់តែខ្លាំង ប៉ុន្តែក៏មិនត្រូវកាត់ផ្ដាច់ទាំងស្រុងនូវទំនាក់ទំនងផ្នែកសេដ្ឋកិច្ចនិងទីផ្សារដ៏ធំទូលំទូលាយនៃប្រទេសយក្សមួយនេះទេ។
ចំពោះបញ្ហាកោះតៃវ៉ាន់ លោកស្រីបានចង្អុលបង្ហាញថា៖ «គោលនយោបាយចិនតែមួយរបស់អឺរ៉ុបគឺមានតាំងពីយូរយារមកហើយ។ យើងសូមអំពាវនាវម្តងហើយម្តងទៀត ឱ្យមានសន្តិភាពនិងស្ថិរភាពនៅច្រកសមុទ្រតៃវ៉ាន់ ហើយយើងក៏ប្រឆាំងដាច់ខាតចំពោះការផ្លាស់ប្តូរស្ថានភាពជាឯកតោភាគី ជាពិសេសដោយប្រើកម្លាំង»។
ពិតមែនហើយ ការលើកឡើងកាលពីសប្តាហ៍មុនរបស់ប្រធានាធិបតីបារាំង បានបង្កការរិះគន់យ៉ាងចាស់ដៃពីសំណាក់ប្រទេសជាសមាជិកអឺរ៉ុប ជាពិសេសពីរដ្ឋនៅភាគខាងកើតនៃសហភាពនេះ ដែលមើលឃើញសហរដ្ឋអាមេរិកថាជាអ្នកធានាសន្តិសុខស្នូលរបស់ពួកគេ នៅចំពោះមុខសម្ព័ន្ធភាពជិតស្និទ្ធរវាងចិននិងរុស្ស៊ី ដែលកំពុងធ្វើសង្គ្រាមឈ្លានពាននៅអ៊ុយក្រែន។
បើទោះបីជាយ៉ាងណាក៏ដោយ ជំហររបស់លោក ម៉ាក្រុង ត្រូវបានអ្នកខ្លះយកមកបកស្រាយថា លោកមាន«គម្រោងសម្ងាត់» ជាមួយចិនក្នុងការនាំយករុស្ស៊ី និងអ៊ុយក្រែន មកចូលតុចរចាឱ្យទាល់តែបាននៅក្នុង«រដូវក្តៅខាងមុខនេះ»។
ប៉ុន្តែ លោក តូបបៃអឺស អែលវូដ (Tobias Ellwood) ប្រធានគណៈកម្មាធិការជ្រើសតាំងសម្រាប់ការពារជាតិអង់គ្លេស បានហៅគម្រោងនេះថា«គ្រោះថ្នាក់» ខណៈលោក អៀន ដាន់ឃេន ស្មីត (Iain Duncan Smith) អតីតមេដឹកនាំគណបក្សអភិរក្សនិយម បានប្រៀបប្រដូចលោកម៉ាក្រុងទៅនឹង «ពស់នៅក្នុងស្មៅ»៕
