លោក អួន ស៊ីឡុត ប្រធានសមាគមស្វាយចន្ទីកម្ពុជា ជឿជាក់ថា នៅពេលតំបន់សួនឧស្សាហកម្មស្វាយចន្ទីក្នុងខេត្តកំពង់ធំ លេចចេញជារូបរាង វានឹងដើរតួនាទីយ៉ាងសំខាន់ក្នុងការរួមចំណែកជួយជំរុញការអភិវឌ្ឍវិស័យស្វាយចន្ទី ក៏ដូចជាលើកកម្ពស់សេដ្ឋកិច្ច ព្រោះតាមរយៈសួនឧស្សាហកម្មនេះវានឹងផ្ដល់តម្លៃបន្ថែមជូនដល់កសិករ និងបង្កើតការងារដល់ពលរដ្ឋនៅក្នុងសហគមន៍។ លើសពីនេះក្រុមហ៊ុនដែលវិនិយោគនៅក្នុងសួនឧស្សាហកម្មនេះ ក៏នឹងទទួលបានការលើកទឹកចិត្តពីរាជរដ្ឋាភិបាល ផងដែរ។ ជាពិសេសតាមរយៈសួនឧស្សាហកម្មនេះ វានឹងជួយកាត់បន្ថយការនាំចេញគ្រាប់ស្វាយចន្ទីឆៅទៅក្រៅប្រទេស និងបង្កើនផលិតកម្មកែច្នៃគ្រាប់ស្វាយចន្ទីក្នុងស្រុក។
ពាក់ព័ន្ធតំបន់សួនឧស្សាហកម្មស្វាយចន្ទីក្នុងខេត្តកំពង់ធំនេះ សម្ដេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានគូសបញ្ជាក់ថា រាជរដ្ឋាភិបាល កំពុងរៀបចំគោលនយោបាយបណ្ដុំសួនឧស្សាហកម្មស្វាយចន្ទី ដែលនឹងដំណើរការនៅក្នុងឆ្នាំ២០២៥ នេះ ខណៈគម្រោងនេះធ្វើឡើងដើម្បីប្រមូលផ្ដុំការកែច្នៃគ្រប់ប្រភេទ ដោយមានការគាំទ្រផ្នែកហេដ្ឋារចនាសម្ព័ន្ធផ្សេងៗពីរដ្ឋ។
សូមបញ្ជាក់ថា នៅក្នុងឆ្នាំ២០២៤ កន្លងទៅនេះ កម្ពុជា ផលិតគ្រាប់ស្វាយចន្ទីបានជាង៨៥ម៉ឺនតោន មានការកើនឡើង២៦% បើធៀបនឹងឆ្នាំ២០២៣ ដោយបាននាំចេញទៅទីផ្សារអន្តរជាតិ ប្រមាណជាង៨១ម៉ឺនតោន ក្នុងនោះនាំចេញទៅទីផ្សារវៀតណាម ជាង៧៩ម៉ឺនតោន ដោយគិតជាទឹកប្រាក់ប្រមាណជាង១ពាន់១រយលានដុល្លារ កើនឡើង៣១%។ គិតត្រឹមឆ្នាំ២០២៤ កម្ពុជា មានផ្ទៃដីដាំដុះដំណាំស្វាយចន្ទីសរុបជាង៥៨ម៉ឺនហិកតា។ នេះបើយោងតាមទិន្នន័យរបស់ក្រសួងកសិកម្ម រុក្ខាប្រមាញ់ និងនេសាទ៕
អត្ថបទ៖ បូ ដូឡា
