ក្រោយប្រើកម្លាំងយោធាពិសេសវាយឆ្មក់ចូលចាប់ប្រធានាធិបតីវេណេស៊ុយអេឡា និងភរិយាបានសម្រេចកាលពីថ្ងៃទី៣ ខែមករា ប្រធានាធិបតីអាម៉េរិក លោក ដូណាល់ ត្រាំ បានប្រកាសថា អាម៉េរិកនឹង គ្រប់គ្រងប្រទេសវេណេស៊ុយអេឡា ហើយនឹងបញ្ជូនក្រុមហ៊ុនអាម៉េរិក ទៅជួសជុលហេដ្ឋារចនាសម្ព័ន្ធប្រេងដែលចាស់ទ្រុឌទ្រោមនៅក្នុងប្រទេសនេះ។ ការប្រកាសរបស់លោក ត្រាំ នេះបានទាញទម្លាក់តម្លៃប្រេងឆៅនៅលើទីផ្សារអន្តរជាតិ ឱ្យធ្លាក់ចុះនៅដើមសប្តាហ៍នេះ ព្រោះមានការរំពឹងទុកថា ប្រេងឆៅរបស់វេណេស៊ុយអេឡា ដែលជាប្រទេសមានស្តុកប្រេងច្រើនជាងគេបំផុតនៅលើពិភពលោក នឹងត្រូវបានបញ្ចេញទៅកាន់ទីផ្សារកាន់តែច្រើនបន្ថែមទៀត។
លោក ជីអូវាន់នី ស្តូណូវូ (Giovanni Staunovo) អ្នកវិភាគទីផ្សារនៅក្រុមហ៊ុន UBS ជឿជាក់ថា ក្រោយប្រេងរបស់ប្រទេសវេណាស៊ុយអេឡា ត្រូវបានបញ្ចេញទៅកាន់ទីផ្សារពិភពលោក នោះនឹងធ្វើឱ្យតម្លៃប្រេងចុះថោក។ តែយ៉ាងណាក៏ដោយ ដើម្បីអាចឱ្យប្រេងរបស់វេណេស៊ុយអេឡាអាចបញ្ចេញទៅកាន់ទីផ្សារបានកាន់តែច្រើន ទាមទារឱ្យប្រទេសនេះបោះទុនវិនិយោគអភិវឌ្ឍន៍ហេដ្ឋារចនាសម្ព័ន្ធប្រេងបន្ថែមទៀត ព្រោះក្រោយរងទណ្ឌកម្មតាំងពីឆ្នាំ១៩៩៩ មក បច្ចុប្បន្នប្រេងនៅវេណេស៊ុយអេឡា អាចបូមបានប្រមាណ១លានបារ៉ែលក្នុង១ថ្ងៃប៉ុណ្ណោះ ខណៈកាលមុនអាចបូមបានប្រមាណ៣,៥លានបារ៉ែលក្នុង១ថ្ងៃ៕
ដោយៈ សរ សុជាតិ
