ធនាគារជាតិ ព្យាករថា ការផ្តល់កម្ចីក្នុងប្រព័ន្ធធនាគារនឹងមានកំណើន៦% នៅឆ្នាំនេះ តើអ្នកជំនាញមានការវាយតម្លៃបែបណា?
ធនាគារជាតិនៃកម្ពុជា បានអះអាងថា នៅឆ្នាំ២០២៥ នេះ ប្រព័ន្ធធនាគារនៅកម្ពុជានឹងបន្តអភិវឌ្ឍដោយភាពរឹងមាំ និងបន្តដើរតួនាទីយ៉ាងសកម្មក្នុងការគាំទ្…
លោក ពន របាំង កសិករដាំស្ពៃក្តោបម្នាក់ នៅខេត្តបាត់ដំបង បានអះអាងថា ស្ពៃក្តោបនៅតំបន់លោកបច្ចុប្បន្នបានធ្លាក់ចុះមកនៅត្រឹម៣០០រៀល ក្នុង១គីឡូក្រាមប៉ុណ្ណោះ បើលក់នៅចម្ការផ្ទាល់ ខណៈកាលពីប៉ុន្មានខែមុនអាចលក់បានចន្លោះពី៦០០រៀល ទៅ៧០០រៀល ក្នុង១គីឡូក្រាម។ បើតាមការលើកឡើងរបស់កសិកររូបនេះ តម្លៃស្ពៃក្តោបបច្ចុប្បន្នមិនអាចផ្តល់ប្រាក់ចំណេញដល់រូបលោកនោះទេ។ កសិកររូបនេះបានឱ្យដឹងដែរថា កន្លងមកលោកធ្លាប់ដាំដំណាំកិច្ចសន្យាជាមួយក្រុមហ៊ុនមួយ ប៉ុន្តែមិនបានផ្ដល់ផលចំណេញដល់រូបលោកនោះទេ ដោយសារក្រុមហ៊ុននោះមិនមានបច្ចេកទេសក្នុងការស្ដុកបន្លែទុក ដោយយកទៅម្ដងបន្តិចៗនាំឱ្យផលដំណាំរបស់លោកខូចគុណភាព។
ជាមួយគ្នានេះ លោក ក្រាក សុភាព អ្នកដាំស្ពៃក្ដោបម្នាក់នៅខេត្តបាត់ដំបងដែរនោះ បានគូសបញ្ជាក់ថា តាមរយៈបទពិសោធន៍របស់លោកជាង២០ឆ្នាំមកនេះ បញ្ហាដែលធ្វើឱ្យស្ពៃក្ដោបធ្លាក់ថ្លៃ គឺដោយសារមានការនាំចូលបន្លែពីបរទេសច្រើនពេក ខណៈអ្នកដាំក្នុងស្រុកមានការកើនឡើងជាបន្តបន្ទាប់។
ដោយឡែកលោកស្រី ប៊ូន ច័ន្ទប៉ូលីន អ្នកលក់ស្ពៃក្ដោបមួយរូបនៅខេត្តបាត់ដំបង បានឱ្យដឹងថា តម្លៃស្ពៃក្តោបដែលលោកស្រីប្រមូលទិញពីកសិករមានតម្លៃ៥រយរៀលក្នុង១គីឡូក្រាម និងលក់ចេញវិញក្នុងតម្លៃ១ពាន់រៀល ក្នុង១គីឡូក្រាម ដោយចំណេញអាចផ្តល់ប្រាក់ចំណេញតិចតួចប៉ុណ្ណោះ បន្ទាប់ពីកាត់ថ្លៃចំណាយលើការដឹកជញ្ជូន និងការវិចខ្ចប់។ ស្របពេលដំណាំបន្លែកំពុងជួបបញ្ហាធ្លាក់ថ្លៃ អ្នកលក់ស្ពៃក្តោបរូបនេះសំណូមដល់ប្រជាពលរដ្ឋជួយគាំទ្របន្លែក្នុងស្រុកទាំងអស់គ្នា ដើម្បីឱ្យកសិករមានទឹកចិត្តដាំដុះបន្តទៀត។
ពាក់ព័ន្ធនឹងស្ថានភាពទីផ្សារស្ពៃក្ដោប នៅខេត្តបាប់ដំបងនេះដែរ លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានបញ្ជាក់ឱ្យដឹងថា មូលហេតុដែលធ្វើឱ្យស្ពៃក្ដោបធ្លាក់ថ្លៃនាពេលបច្ចុប្បន្ននេះ ក៏ព្រោះតែកសិករប្រមូលផលស្ពៃក្ដោបដំណាលពេលគ្នា គួបផ្សំគុណភាពស្ពៃក្ដោបនៅឆ្នាំនេះហាក់មិនសូវល្អ ប៉ុន្តែបញ្ហាធ្លាក់ថ្លៃនេះមិនមែនដោយសារការនាំចូលបន្លែពីក្រៅប្រទេសនោះទេ។ យ៉ាងណាមិញលោក ឈឹម វជិរា លើកទឹកចិត្តដល់ប្រជាកសិករគួរងាកមកដាំស្ពៃក្តោបជាលក្ខណៈសហគមន៍ ដើម្បីមានភាពងាយស្រួលក្នុងការជួយអន្តាគមន៍។
គួរជម្រាបថា ទិន្នផលស្ពៃក្ដោបដែលកំពុងជួបបញ្ហាធ្លាក់ថ្លៃនាពេលបច្ចប្បន្ននេះ ជាប្រភេទស្ពៃក្ដោបខ្មែរ ឬហៅម្យ៉ាងទៀតថា KK Cross ដែលមានរស់ជាតិផ្អែម និងស្រួយឆ្ងាញ់ជាងស្ពៃក្ដោបដែលនាំចូលពីក្រៅប្រទេស៕
អត្ថបទដោយ៖ ជា ម៉ារ៉ា
