ទីបំផុត ប្រធានាធិបតីកូរ៉េខាងត្បូង លោក យូន ស៊ុកយុល ត្រូវបានព្យួរតំណែង

សភាកូរ៉េខាងត្បូង កាលពីថ្ងៃទី១៤ ខែធ្នូ បានបោះឆ្នោតដោយទទួលបានសំឡេងភាគច្រើនលើសលប់សម្រេចចោទប្រកាន់ប្រធានាធិបតី យូន ស៊ុកយុល ជាផ្លូវការ បន្ទាប់ពីលោកបានប៉ុនប៉ងអនុវត្តច្បាប់អាជ្ញាសឹក ដែលបង្កឱ្យមានចលាចលខ្លាំងបំផុតក្នុងប្រវត្តិសាស្ត្រប្រជាធិបតេយ្យនាសម័យទំនើបរបស់ប្រទេសនេះ និងបង្កការភ្ញាក់ផ្អើលពេញពិភពលោកកាលពីពេលថ្មីៗនេះ។

សភាកូរ៉េខាងត្បូង បានបោះឆ្នោតចោទប្រកាន់លោក យូន ស៊ុកយុល ជាផ្លូវការជាមួយសំឡេង២០៤សំឡេង ខណៈ៨៥សំឡេងបោះឆ្នោតជំទាស់ ហើយក៏មានអនុប្បវាទចំនួន៣សំឡេង និង៨សំឡេងទៀតត្រូវបានចាត់ទុកថាមិនបានការ។

សូមបញ្ជាក់ថា សភាពេញអង្គរបស់កូរ៉េខាងត្បូង មានសំឡេងសរុបចំនួប៣០០សំឡេង ហើយដើម្បីអាចអនុម័តអ្វីមួយបានតម្រូវឱ្យមានសំឡេងភាគច្រើន ពោលគឺ២ភាគ៣ ឬស្មើនឹង២០០សំឡេង។

ពេលនេះលោក យូន ស៊ុកយុល ត្រូវបានព្យួរពីតំណែងហើយ ហើយត្រូវរង់ចាំការសម្រេចផ្ដាច់ព្រ័ត្រដោយតុលាការធម្មនុញ្ញកូរ៉េខាងត្បូង ថាតើត្រូវរក្សាទុកជាបានការដដែល ឬក៏ត្រូវច្រានចោលលទ្ធផលនៃការបោះឆ្នោតរបស់សភា។ ​នៅពេលនេះ នាយករដ្ឋមន្ត្រី ហាន ឌុកស៊ូ (Han Duck-soo) បានចូលកាន់តំណែងជាប្រធានាធិបតីស្តីទី។

គួររំឭកថា លោក យូន ស៊ុកយុល បានធ្វើឱ្យកូរ៉េខាងត្បូង ក៏ដូចសហគមន៍អន្តរជាតិ មានការភ្ញាក់ផ្អើលយ៉ាងខ្លាំងកាលពីល្ងាចថ្ងៃទី៣ ខែធ្នូ កន្លងទៅថ្មីៗនេះ ក្រោយលោកប្រកាសដាក់ប្រទេសក្នុងគ្រាអាសន្ន ហើយបានហៅកម្លាំងយោធាឱ្យចេញមកតាមដងផ្លូវដើម្បីត្រៀមអនុវត្តច្បាប់អាជ្ញាសឹក។ ទោះជាយ៉ាងណា លោកបានដកការប្រកាសដាក់ប្រទេសក្នុងគ្រាអាសន្ននេះចេញវិញនៅរំលងអធ្រាត្រឈានចូលព្រឹកស្អែក បន្ទាប់ពីរដ្ឋសភាបានកោះប្រជុំជាបន្ទាន់ដើម្បីជំទាស់នឹងការសម្រេចរបស់លោក៕

ដោយ: តែម សុខុម