អ្នកជំនាញវាយតម្លៃថា ការផលិតគ្រាប់ស្វាយចន្ទីនៅកម្ពុជានឹងកើនលើសមួយលានតោនពី៣ទៅ៥ឆ្នាំខាងមុខ
ការដាំស្វាយចន្ទីនៅឆ្នាំនេះ បានកើនឡើងគួរឱ្យកត់សម្គាល់ក្រោយទីផ្សារ និងតម្លៃគ្រាប់ស្វាយចន្ទីមានស្ថិរភាពល្អប្រសើរ។ កំណើនការដាំដុះនេះធ្វើឱ្យអ្នកជំ…
តែយ៉ាងណាមកទល់ពេលនេះ កម្ពុជា ពុំទាន់មានពូជទុរេនផ្ទាល់ខ្លួនណាមួយ ដែលមានឈ្មោះល្បី និងមានគេស្គាល់ឱ្យទូលំទូលាយនៅឡើយទេ ស្របពេលកម្ពុជា ទទួលបានភ្លើងខៀវក្នុងការនាំចេញទុរេនទៅកាន់ទីផ្សារចិន ប្រសិនបើការដាំដុះ និងគុណភាពទុរេនកម្ពុជា អាចឆ្លើយតបនឹងលក្ខខណ្ឌ និងភូតគាមអនាម័យតម្រូវរបស់គយចិន។
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានគូសបញ្ជាក់ថា ក្រសួងកសិកម្មគ្រោងចាប់ផ្ដើមពិនិត្យមើលលើភាពចាំបាច់ក្នុងការធ្វើផលិតកម្មលើពូជទុរេន ដែលមានប្រភពច្បាស់លាស់ និងមានការចុះបញ្ជីត្រឹមត្រូវ និងពិចារណាបង្កើនការស្រាវជ្រាវពូជទុរេនក្នុងស្រុក។ បើតាមមន្រ្តីជាន់ខ្ពស់រូបនេះ បច្ចុប្បន្នដំណាំទុរេនស្ថិតក្នុងប្រភេទដំណាំកំពុងអភិវឌ្ឍន៍នៅឡើយ ហើយកន្លងមកដំណាំប្រភេទនេះ មានការដាំដុះតែក្នុងតំបន់មួយចំនួន និងពុំសូវទូលំទូលាយនោះទេ ព្រោះវាត្រូវការចំណាយទុនខ្ពស់ជាងដំណាំផ្សេង។ យ៉ាងណាមិញឯកឧត្តមសង្កេតឃើញថា ការធ្វើផលិតកម្មទុរេននៅកម្ពុជា មានការផ្លាស់ប្ដូរគួរឱ្យកត់សម្គាល់ក្រោយកម្ពុជា និងចិន បានចុះអនុស្សរណៈ ស្ដីពី ពិធីសារភូតគាមអនាម័យ ដែលអាចបើកផ្លូវឱ្យកម្ពុជា នាំចេញទុរេនដោយត្រង់ទៅកាន់ទីផ្សារចិន។
ជាមួយគ្នានេះ លោក ធឿន ប៊ុនហុង អ្នកបច្ចេកទេសផលិតកម្មដំណាំទុរេន នៃក្រុមហ៊ុនអង្គរហ្គ្រីន ជឿជាក់ថា ក្រោយទុរេនកម្ពុជា អាចនាំចេញដោយត្រង់ទៅកាន់ទីផ្សារចិន នាពេលខាងមុខ នោះផ្ទៃដីដាំដុះដំណាំនេះនឹងមានការកើនឡើងថែមទៀតដើម្បីពង្រីកវិសាលភាពទីផ្សារទុរេនឱ្យកាន់តែធំបន្ថែមទៀត។ អ្នកជំនាញរូបនេះ សង្កេតឃើញថា កសិករដាំទុរេននាពេលបច្ចុប្បន្នមានការយល់ដឹងច្រើនលើផលិតកម្មទុរេន ដែលធ្វើឱ្យទិន្នផលមានការកើនឡើងពី១ឆ្នាំទៅ១ឆ្នាំ។
ដោយឡែក លោក ឃឹម ប៊ុនឡែន ស្ថាបនិក និងជាប្រធានសហគមន៍ចម្ការស្តេចទុរេន កត់សម្គាល់ឃើញថា បច្ចុប្បន្នការដាំដុះដំណាំទុរេននៅកម្ពុជា ហាក់មានទំនោរកើនឡើង ក្រោយកម្ពុជា ទទួលបានភ្លើងខៀវក្នុងការនាំចេញទុរេនដោយត្រង់ទៅកាន់ទីផ្សារចិន។ តែយ៉ាងណាអ្នកជំនាញរូបនេះស្នើដល់រដ្ឋាភិបាល ឱ្យគិតគូរលើការបន្សុទ្ធពូជ ដើម្បីសម្គាល់អត្តសញ្ញាណ ខណៈពូជភាគច្រើនដែលកំពុងដាំដុះបច្ចុប្បន្នមានប្រភពមកពីប្រទេសជិតខាង។
បើតាមការអះអាងរបស់អ្នកជំនាញ ពូជទុរេន ដែលប្រជាពលរដ្ឋចូលចិត្តបរិភោគ និងកសិករកំពុងនិយមដាំដុះបច្ចុប្បន្ន ដូចជា ពូជម៉ុនថង ម៉ូសាងឃីង និងរី៦ ជាដើម ត្រូវបានគេស្គាល់ថា មានប្រភពមកពីបណ្ដាប្រទេសក្នុងតំបន់ ខណៈកម្ពុជា ហាក់ពុំទាន់មានពូជទុរេនណាមួយ ដែលពេញនិយមខ្លាំង និងមានគេស្គាល់ឱ្យទូលំទូលាយនៅឡើយទេ។ សូមបញ្ជាក់ថា ផ្លែទុរេនស្រស់របស់កម្ពុជា ត្រូវបានភាគីគយចិន បើកភ្លៀងខៀវឱ្យនាំចូលទីផ្សារចិន ក្រោមការគោរពតាមលក្ខខណ្ឌ និងភូតគាមអនាម័យ៕
អត្ថបទ៖ បូ ដូឡា
