អ្នកជំនាញក្នុងវិស័យទេសចរណ៍ជឿជាក់ថា ការកើតមានគ្រោះរញ្ជួញដីនៅថៃ វាអាចជាឱកាសមួយសម្រាប់កម្ពុជា ក្នុងការស្រូបទាញភ្ញៀវទេសចរបរទេសឱ្យមកកម្សាន្តនៅកម្ពុជា ជាពិសេសក្នុងអំឡុងពេលនៃពិធីបុណ្យចូលឆ្នាំថ្មីប្រពៃណីខ្មែរតែម្តង ដោយសារបច្ចុប្បន្នមានភ្ញៀវទេសចរបរទេសមួយចំនួនបានបង្វែរការទិញគោលដៅទេសចណ៍របស់ខ្លួនពីប្រទេសថៃ មកកម្ពុជា ជំនួសវិញ។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា កត់សម្គាល់ឃើញថា ក្រោយប្រទេសថៃ រងការរញ្ជួយដីធ្ងន់ធ្ងរជាប្រវត្តិសាស្ត្រមិនធ្លាប់មានកាលពីថ្ងៃទី២៨ មីនា នៅប៉ុន្មានថ្ងៃចុងក្រោយនេះ មានភ្ញៀវទេសចរបរទេសមួយចំនួនបានសម្រុកចាកចេញពីប្រទេសថៃ ចូលមកប្រទេសកម្ពុជា។ ក្នុងចំណោមភ្ញៀវទេសចរបរទេសទាំងនោះ មានភ្ញៀវទេសចរទេសចរមួយចំនួនបានស្នាក់នៅប្រទេសកម្ពុជា ក្នុងរយៈពេលខ្លី និងមួយចំនួនបានបង្វែរការទិញគោលដៅទេសចររបស់ខ្លួនពីប្រទេសថៃ មកប្រទេសកម្ពុជាវិញ។
អ្នកជំនាញរូបនេះចាត់ទុកបញ្ហានេះ វាអាចជាឱកាសមួយសម្រាប់កម្ពុជា ក្នុងការស្រូបទាញភ្ញៀវទេសចរបរទេសឱ្យមកកម្សាន្តនៅកម្ពុជា ជាពិសេសក្នុងអំឡុងពេលកម្ពុជា រៀបចំព្រឹត្តិការណ៍អង្គរសង្រ្កាន្តនាពេលខាងមុខនេះតែម្តង ដ្បិតថា បញ្ហាគ្រោះរញ្ជួយដីនេះ បានជះឥទ្ធិពលមិនល្អដល់ចរន្តភ្ញៀវទេសចរចូលទៅកាន់ប្រទេសថៃ ដោយសារពួកគេបារម្ភខ្លាចមានបញ្ហាអ្វីផ្សេងកើតមានឡើងក្រោយគ្រោះរញ្ជួយដី។
អត្ថបទគួរអាន
ជាមួយគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក ប្រចាំនៅកម្ពុជា ជឿជាក់ថា នៅក្នុងឱកាសពិធីបុណ្យចូលឆ្នាំប្រពៃណីខ្មែរ និងព្រឹត្តិការណ៍អង្គរសង្រ្កាន្តនាពេលខាងមុខនេះ កម្ពុជានឹងទទួលបានភ្ញៀវទេសចរជាតិ និងអន្តរជាតិ ច្រើនជាងឆ្នាំមុនៗ។ ការជឿជាក់បែបនេះ ក៏ដោយសារតែឥទ្ធិពលនៃបញ្ហាគ្រោះរញ្ជួយដីនៅប្រទេសថៃ កាលពីពេលថ្មីៗនេះ បានធ្វើឱ្យមានការលុបចោលការកក់ដំណើរកម្សាន្តទៅក្រៅប្រទេសរបស់ប្រជាពលរដ្ឋមួយចំនួន ដោយពួកគេជ្រើសរើសការដើរកម្សាន្តនៅក្នុងស្រុកជំនួសវិញ។
ដោយឡែក លោកជំទាវ ហ៊ុន ដានី អ្នកនាំពាក្យក្រសួងទេសចរណ៍ ជឿជាក់ថា តាមរយៈការខិតខំពង្រឹងសន្តិសុខសណ្ឋាប់ធ្នាប់ និងការផ្សព្វផ្សាយពីកម្ពុជា ជាគោលដៅទេសចរណ៍មានសុវត្ថិភាព និងផ្តល់ភាពកក់ក្តៅ កម្ពុជានឹងអាចទាក់ទាញភ្ញៀវទេសចរបរទេសចូលមកកម្សាន្តកាន់តែច្រើននៅឆ្នាំនេះ ជាពិសេសនៅក្នុងព្រឹត្តិការណ៍អង្គរសង្រ្កាន្តនៅខេត្តសៀមរាប តែម្តង។ ទន្ទឹមនឹងនេះ ក្រសួងបានណែនាំដល់អ្នកពាក់ព័ន្ធទាំងអស់ឱ្យពង្រឹងគុណភាពផលិតផល សេវាកម្ម និងបដិសណ្ឋារកិច្ចចំពោះភ្ញៀវទេសចរជាតិ និងអន្តរជាតិ ប្រកបដោយភាពកក់ក្តៅ និងស្នាមញញឹម ពិសេសបង្ហាញនូវភាពជាខ្មែរ នៅតាមគោលដៅទេសចរណ៍ទាំងអស់ក្នុងឱកាសបុណ្យចូលឆ្នាំថ្មីប្រពៃណីខ្មែរខាងមុខ។
បើតាមការគូសបញ្ជាក់របស់លោកជំទាវ ហ៊ុន ដានី កម្ពុជា បានដាក់ចេញគោលនយោបាយក្នុងការលើកកម្ពស់វិស័យទេសចរណ៍កម្ពុជា នៅគ្រប់រចនាសម្ព័ន្ធទាំងអស់ ពិសេសទេសចរណ៍នៅតាមសហគមន៍តែម្តង។ ទន្ទឹមនេះ រដ្ឋមន្ត្រីក្រសួងទេសចរណ៍ ក៏បានដាក់ចេញនូវសសរស្ដម្ភមួយចំនួនសម្រាប់កិច្ចសហប្រតិបត្តិការផងដែរ រួមមានកិច្ចសហប្រតិបត្តិការថ្នាក់ជាតិ ថ្នាក់ក្រោមជាតិ ជាលក្ខណៈអន្តរជាតិ ជាមួយវិស័យឯកជន ជាមួយបណ្តាញផ្សព្វផ្សាយ និងជាមួយបុគ្គលកម្នាក់ៗ។ ជាមួយគ្នានេះ លោកជំទាវស្នើឱ្យគ្រប់តួអង្គទាំងអស់ត្រូវចូលរួមជួយផ្សព្វផ្សាយឱ្យបានទូលំលាយនូវពាក្យស្លោក៖ ទេសចរណ៍ដើម្បីទាំងអស់គ្នា ទាំងអស់គ្នា ដើម្បីទេសចរណ៍, ទេសចរណ៍រីកលូតលាស់ក្នុងសន្តិភាព និងបុគ្គលម្នាក់ៗ គឺជាអ្នកផ្សព្វផ្សាយទេសចរណ៍កម្ពុជា ដើម្បីលើកកម្ពស់ និងអភិវឌ្ឍវិស័យទេសចរណ៍កម្ពុជា កាន់តែរីកចម្រើន៕
