អាស៊ានប្រកាន់យកការចរចា និងមិនសងសឹក ចំពោះការដំឡើងពន្ធរបស់អាម៉េរិក
ក្រុមប្រឹក្សាសហគមន៍សេដ្ឋកិច្ចអាស៊ាន (AECC) បានកោះប្រជុំលើកទី២៥ របស់ខ្លួនដោយពិភាក្សាលើប្រធានាបទគន្លឹះចំនួន១១ ក្នុងគោលបំណងពង្រឹងកិច្ចសហប្រតិ…
ប្រភពច្បាស់ការបានទម្លាយឱ្យដឹងថា ក្រុមហ៊ុនយក្ស Foxconn របស់តៃវ៉ាន់ ស្ថិតក្នុងចំណោមអ្នកដេញថ្លៃទិញយកក្រុមហ៊ុនដំឡើងបន្ទះឈីបសិង្ហបុរី UTAC Holdings ក្នុងតម្លៃរហូតដល់ប្រមាណ៣ពាន់លានដុល្លារ។ ប្រភពខាងលើដែលសុំលាក់អត្តសញ្ញាណដោយសារពាក់ព័ន្ធនឹងព័ត៌មានសម្ងាត់ បានឱ្យដឹងទៀតថា ក្រុមហ៊ុនមូលធនឯកជន Wise Road Capital មានមូលដ្ឋាននៅទីក្រុងប៉េកាំង ប្រទេសចិន ដែលជាក្រុមហ៊ុនមេរបស់ UTAC បានជួលធនាគារវិនិយោគអាម៉េរិក Jefferies ឱ្យដំណើរការលក់អាជីវកម្មនេះ ហើយរំពឹងថា នឹងទទួលបានការឱ្យថ្លៃដំបូងនៅត្រឹមដំណាច់ខែឧសភា នេះ។
ទោះជាយ៉ាងណា ទាំងក្រុមហ៊ុន Foxconn និងធនាគារអាម៉េរិក Jefferies បានបដិសេធមិនធ្វើអត្ថាធិប្បាយទេជុំវិញបញ្ហានេះ ចំណែកឯក្រុមហ៊ុនបុត្រសម្ព័ន្ធ UTAC និងក្រុមហ៊ុនមេ Wise Road ក៏មិនបានឆ្លើយតបភ្លាមៗចំពោះសំណើសុំការអត្ថាធិប្បាយដែរ។
ការផលិតបន្ទះឈីបទូទាំងពិភពលោក ត្រូវបានហ៊ុមព័ទ្ធដោយក្តីព្រួយបារម្ភអំពីសន្តិសុខជាតិ និងការប្រកួតប្រជែងផ្នែកបច្ចេកវិទ្យាក្នុងរយៈពេលប៉ុន្មានឆ្នាំចុងក្រោយនេះ ជាពិសេសរវាងសហរដ្ឋអាម៉េរិក និងមហាយក្សចិន។
ជាយូរណាស់មកហើយ ដែលបណ្ដាក្រុមហ៊ុនផលិតបន្ទះឈីបបានពឹងផ្អែកលើខ្សែច្រវាក់ផ្គត់ផ្គង់ផលិតកម្មក្នុងពិភពលោក ប៉ុន្តែពេលនេះ សហរដ្ឋអាម៉េរិក កំពុងប្រឹងប្រែងរឹតបន្តឹងធ្វើយ៉ាងណាទប់ស្កាត់មិនឱ្យមហាយក្សចិន ទទួលបានបន្ទះឈីបកម្រិតខ្ពស់ និងឧបករណ៍ផលិតបន្ទះឈីបដ៏ទំនើបក្រោមហេតុផលថា បន្ទះឈីបកម្រិតខ្ពស់ និងឧបករណ៍ផលិតបន្ទះឈីបដ៏ទំនើបទាំងនោះនឹងផ្តល់ផលប្រយោជន៍ដល់យោធារបស់ប្រទេសចិន ដែលទីក្រុងប៉េកាំង បដិសេធថា មិនមែនជាការពិត៕
ដោយ: តែម សុខុម
