ប្រធានាធិបតីបារាំង ព្រមានថា សម្ព័ន្ធប្រទេស G20 ប្រហែលជាជិតដល់ទីបញ្ចប់ហើយ

ថ្លែងនៅឯកិច្ចប្រជុំកំពូល G20 នៅអាហ្វ្រិកខាងត្បូង ដោយគ្មានវត្តមានសហរដ្ឋអាម៉េរិក ចូលរួម ប្រធានាធិបតីបារាំង លោក Emmanuel Macron បានព្រមានថា ក្រុមប្រទេសសេដ្ឋកិច្ចធំៗ G20 ប្រហែលជាជិតដល់ទីបញ្ចប់ហើយ ពោលគឺអនាគតរបស់ G20 កំពុងតែប្រឈមហានិភ័យ​។

លោក Emmanuel Macron បានលើកឡើងពីកត្តាសំខាន់ៗមួយចំនួន ដែលធ្វើឱ្យអនាគតរបស់ G20 កំពុងតែប្រឈមហានិភ័យរួមមាន​៖ ទី១៖ អវត្តមានរបស់សហរដ្ឋអាម៉េរិក ទី២៖ ការបរាជ័យក្នុងការការពារច្បាប់អន្តរជាតិ និង ទី៣៖ អសមត្ថភាពក្នុងការឯកភាពគ្នាលើការដោះស្រាយវិបត្តិភូមិសាស្ត្រនយោបាយធំៗដូចជា សង្គ្រាមនៅអ៊ុយក្រែន ជាដើម។

ប្រធានាធិបតីបារាំង រូបនេះបានសង្កត់ធ្ងន់ថា ពិភពលោកកំពុងត្រដាបត្រដួសក្នុងការរក្សាបទដ្ឋានស្តង់ដា​ និងកិច្ចសហប្រតិបត្តិការរួម។

លោក Emmanuel Macron ដែលនឹងការបញ្ចប់អាណត្តិប្រធានាធិបតីរបស់លោកនៅឆ្នាំ២០២៧ បានធ្វើអត្ថាធិប្បាយរិះគន់កាន់តែខ្លាំងឡើងចំពោះការធ្លាក់ចុះកិច្ចសហប្រតិបត្តិការរបស់ពិភពលោក។

គួររំឭកថា ប្រធានាធិបតីបារាំង លោក Emmanuel Macron ធ្លាប់បានរិះគន់អង្គការបក្សសម្ព័ន្ធយោធា NATO ថា ងាប់ខួរក្បាលដូចមនុសុ្សរុក្ខជាតិ (Brain Dead) ដែលចង់សំដៅថាអសមត្ថភាពធ្វើអ្វីមិនកើត ហើយបានអំពាវនាវជាយូរមកហើយឱ្យមានការការពារអឺរ៉ុប ឱ្យកាន់តែរឹងមាំ ប៉ុន្តែប្រទេសបារាំង ច្រើនជាបានសម្ដី បានត្រឹមតែផ្ដល់គំនិត និងគ្មានសកម្មភាពច្បាស់លាស់នោះឡើយ៕

ដោយ: តែម សុខុម