រឿងរ៉ែនីកែល ធ្វើឱ្យព្រឹទ្ធសមាជិកអាម៉េរិកប្រឆាំងការចុះ FTA ជាមួយឥណ្ឌូនេស៊ី

ព្រឹទ្ធសមាជិកសហរដ្ឋអាម៉េ​រិក បានប្រឆាំងនឹងការចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយប្រទេសឥណ្ឌូនេស៊ី ក្រោយបារម្ភប្រទេសនេះមានការទទួលបានអត្ថប្រយោជន៍ដោយប្រយោលពីការឧបត្ថម្ភធនពាក់ព័ន្ធនឹងរ៉ែនីកែល ដែលបម្រើឱ្យការផលិតរថយន្តអគ្គីសនី ក្រោមកិច្ចសហការរវាងឥណ្ឌូនេស៊ី និងចិន។ ព្រឹទ្ធសមាជិកអាម៉េ​រិកមួយចំនួនបានដាក់លិខិតនេះទៅកាន់ការិយាល័យតំណាងពាណិជ្ជកម្មអាម៉េ​រិក ក៏ដូចជាទៅលោកស្រី ជេណេត យ៉េឡេន (Janet Yellen) រដ្ឋមន្រ្តីរតនាគារជាតិ និងថ្នាក់ដឹកនាំក្រសួងមួយចំនួនទៀត ដើម្បីបញ្ជាក់អំពីក្តីបារម្ភនេះ។

សមាជិកព្រឹទ្ធសភាបានទទួលស្គាល់ថា ឥណ្ឌូណេស៊ី បានដើរតួនាទីជាយុទ្ធសាស្ត្រនៅក្នុងតំបន់ឥណ្ឌូប៉ាស៊ីហ្វិក និងមានសក្តានុពលក្នុងការក្លាយជាដៃគូតាមរយៈក្របខ័ណ្ឌសេដ្ឋកិច្ចឥណ្ឌូប៉ាស៊ីហ្វិក ដើម្បីវិបុលភាព ប៉ុន្តែប្រសិនបើការពង្រីកត្រូវបានចាត់ទុកថាចាំបាច់ វាគួរតែឆ្ពោះទៅរកប្រទេសដែលមានភាពរឹងមាំលើការងារ សិទ្ធិមនុស្ស និងស្តង់ដាបរិស្ថានខ្ពស់។

ប្រសិនបើការរារាំងនេះដំណើរការដោយមិនអាចឈានដល់ការរកច្រកចេញបាន នោះគឺជា ឧបសគ្គធំមួយសម្រាប់មហិច្ឆតារបស់ប្រទេសឥណ្ឌូនេស៊ី ក្នុងការបង្កើនតួនាទីរបស់ខ្លួនក្នុងនាមជាអ្នកផលិតរ៉ែនីកែលដ៏ធំបំផុតរបស់ពិភពលោក ដើម្បីក្លាយជាមជ្ឈមណ្ឌលដ៏សំខាន់នៅក្នុងខ្សែច្រវាក់ផ្គត់ផ្គង់រថយន្តអគ្គិសនី ខណៈគេដឹងថា នីកែលរួមជាមួយនឹងសាធាតុ លីចូម គឺជាសមាសធាតុសំខាន់នៅក្នុងអាគុយរថយន្តអគ្គីសនី ដែលចិនកំពុងតែធ្វើកិច្ចការនេះ។

កិច្ចព្រមព្រៀងពាណិជ្ជកម្មរវាងអាម៉េរិក និងឥណ្ឌូនេស៊ីបានទទួលសញ្ញាវិជ្ជមាន នៅពេលដែលលោកស្រី កាម៉ាឡា ហារីស (Kamala Harris) អនុប្រធានាធិបតីអាម៉េរិក បានធ្វើទស្សនកិច្ចនៅប្រទេសឥណ្ឌូនេស៊ីក្នុងខែកញ្ញា ឆ្នាំ២០២២៕

ដោយៈ សរ សុជាតិ