ទោះបីជាកញ្ចប់ថវិកា ដែលមានតម្លៃសរុបរហូតដល់ជាង៩៥ពាន់លានដុល្លារនៅមិនទាន់អនុម័តដោយសភាក៏ដោយ មានសេចក្តីរាយការណ៍ថា សមាជិកពឹ្រទ្ធសភា ដែលដឹកនាំដោយគណបក្សប្រជាធិបតេយ្យកំពុងតែពិនិត្យកញ្ចប់ថវិកានេះ។ កញ្ចប់ថវិកាដ៏ច្រើនសន្ធឹកសន្ធាប់នេះ គឺជាកញ្ចប់ថវិកាសម្រាប់ផ្តល់ជំនួយដល់ប្រទេសអ៊ុយក្រែន អ៊ីស្រាអែល បញ្ហានៅសមុទ្រក្រហម និងមូលនិធិគាំទ្រផ្នែកសន្តិសុខដល់ប្រទេសនៅតំបន់ឥណ្ឌូប៉ាស៊ីហ្វិក ខណៈដែលជំនួយផ្នែកមនុស្សធម៌ គឺមានតម្លៃត្រឹមតែជាង៩ពាន់លានដុល្លារប៉ុណ្ណោះ។
តាមឯកសារដែលសារព័ត៌មានធំៗបានបង្ហាញបានឲ្យដឹងថា សហរដ្ឋអាម៉េរិកបានគ្រោងថវិកាសម្រាប់ជួយអ៊ុយក្រែននៅក្នុងសង្រ្គាមប្រឆាំងនឹងការឈ្លានពានរបស់រុស្ស៊ីនៅក្នុងទំហំទឹកប្រាក់សរុបដល់ទៅជាង៦០ពាន់លានដុល្លារ ដោយភាគច្រើននៃជំនួយនេះ នឹងធ្វើឡើងក្នុងទម្រង់ជាអាវុធ និងឧបករណ៍យោធាដែលបានទិញពីក្រុមហ៊ុនការពារជាតិអាម៉េរិក និងដើម្បីស្ដារឃ្លាំងស្តុករបស់អាម៉េរិកឡើងវិញ បន្ទាប់ពីជួយទ្រទ្រង់សង្រ្គាមរយៈពេលពីរឆ្នាំមកនេះ ។
ដោយឡែក សម្រាប់សង្រ្គាមរវាងអ៊ីស្រាអែល និងក្រុមហាម៉ាស់នៅហ្គាហ្សា សហរដ្ឋអាម៉េរិកបានត្រៀមថវិកាជាង១៤ពាន់លានដុល្លារ ខណៈកញ្ចប់ជំនួយជួយការពារ និងទ្រទ្រង់សភាពការណ៍នៅសមុទ្រក្រហមដែលកំពុងតែអុកឡុកដោយក្រុមឧទ្ទាមហ៊ួធី នៅយេម៉ែន គឺមានទំហំ ជាង២ពាន់លានដុល្លារ។ ជាមួយគ្នានេះ អាម៉េរិកបានត្រៀមកញ្ចប់ថវិកាជិត៥ពាន់លានដុល្លារ សម្រាប់ជួយគាំពារសម្ព័ន្ធមិត្តនៅតំបន់ឥណ្ឌូប៉ាស៊ីហ្វិក រួមទាំងកោះតៃវ៉ាន់ផងដែរ។
សម្រាប់ជំនួយមនុស្សធម៌វិញ ក៏មាននៅក្នុងកញ្ចប់មូលនិធិនេះដែរ ដោយអាម៉េរិកបានត្រៀមកញ្ចប់ថវិកាតែជាង៩ពាន់លានដុល្លារប៉ុណ្ណោះ ដើម្បីជួយគាំទ្រលើការផ្តល់អាហារ ទឹក ទីជម្រក ការថែទាំវេជ្ជសាស្រ្ត និងសេវាកម្មផ្សេងៗទៀតដល់ជនស៊ីវិលនៅតំបន់ ហ្គាហ្សា អ៊ុយក្រែន និងប្រជាជននៅក្នុងតំបន់ជម្លោះជុំវិញពិភពលោកផ្សេងទៀត៕
ដោយៈ សរ សុជាតិ
