លោក កេន លូ អគ្គលេខាធិការសមាគមរោងចក្រកាត់ដេរកម្ពុជា បានប្រាប់ខេមបូណូមីស តាមទូរស័ព្ទថា ហេតុផលចម្បង ដែលធ្វើឲ្យ ការនាំចេញរបស់កម្ពុជា នៅក្នុងវិស័យកាត់ដេរ នៅឆ្នាំ២០២០ បានការថយចុះប្រមាណជិត ១០%នេះ គឺ ដោយសារតែបញ្ហាឆ្លងរីករាលដាលនៃជំងឺកូវីដ-១៩។
ដោយឡែក នៅក្នុងឆ្នាំ២០២១នេះវិញ លោក កេន លូ បញ្ជាក់ថា មិនទាន់អាចប៉ានស្មាននៅឡើយនោះទេ ដោយសារបញ្ហាកូវីដ-១៩ នៅមិនទាន់បានធូរស្បើយទាំងស្រុង ព្រោះបណ្តាប្រទេសនៅតំបន់អឺរ៉ុប និងអាមេរិក ដែលកម្ពុជាត្រូវនាំទំនិញទៅគឺនៅមានបន្តរីករាលដាលដដែល។
គួរបញ្ជាក់ថា កាលពីឆ្នាំ២០១៩កន្លង កម្ពុជា បាននាំចេញផលិតផលវាយណភណ្ឌកាត់ដេរ និងសម្លៀកបំពាក់ និងសម្ភារៈធ្វើដំណើរ នៅក្នុងទំហំ ទឹកប្រាក់ប្រមាណ ៩ពាន់៣រយលានដុល្លារ បើប្រៀបធៀបឆ្នាំនឹងឆ្នាំ២០១៨ កើនឡើង១១%។
អត្ថបទគួរអាន
សូមបញ្ជាក់ថា នៅឆ្នាំ២០២១នេះ វិស័យកាត់ដេរ ពិសេសការនាំចេញ ផលិតផលធ្វើដំណើរទៅកាន់សហរដ្ឋអាមេរិក ក៏កំពុងជួបប្រឈមនឹងបញ្ហាមួយទៀតដែរ ដោយសារតែប្រព័ន្ធអនុគ្រោះពន្ធទូទៅ GSP ដែលផ្ដោយដោយអាមេរិក ត្រូវបានផុតរលត់សុពលភាព កាលពីថ្ងៃទី ៣១ ខែធ្នូ ឆ្នាំ២០២០ មិនទាន់បានបន្ដឡើងវិញនៅឡើយទេ។ ប្រការនេះ បានតម្រូវឲ្យផលិតផលសម្រាប់ការធ្វើដំណើរទាំងអស់របស់កម្ពុជា ដែលនាំចេញទៅអាមេរិកត្រូវបង់ពន្ធនាំចូលរហូតដល់ប្រព័ន្ធអនុគ្រោះពន្ធរបស់អាមេរិកមួយនេះ ត្រូវបានផ្ដល់សុពលភាពឡើងវិញ។
បើទោះបីយ៉ាងណា អ្នកនាំចូលទំនិញទៅអាមេរិក អាចនឹងទទួលបានប្រាក់ពន្ធ ដែលខ្លួនបានបង់នោះ ត្រឡប់មកវិញ នៅពេលដែលការផ្ដល់ភាពអនុគ្រោះពន្ធ GSP នឹងត្រូវបន្ដផ្ដល់ជូនឡើងវិញនាពេលឆាប់ៗនេះ៕
None
