ក្រុមមនុស្សស្រលាញ់ភេទដូចគ្នាអាចចាក់បញ្ចូលថវិកាលើស៤,៧ទ្រីលានដុល្លារក្នុង១ឆ្នាំទៅក្នុងសេដ្ឋកិច្ចពិភពលោក

សារព័ត៌មាន នីកេ អេស៊ា បានរាយការណ៍ថា សកម្មភាពសេដ្ឋកិច្ចឥន្ធូ ដែលសំដៅលើអាជីវកម្ម និងសេវាកម្ម ដែលបម្រើឱ្យក្រុមមនុស្សស្រលាញ់ភេទដូចគ្នានៅលើពិភពលោកមានទំហំដ៏មហាសាលរាប់ទ្រីលានដុល្លារអាម៉េរិក។ អាជីវកម្ម និងសេវាកម្មដែលមានសក្តានុពលម្រាប់ក្រុមមនុស្សស្រលាញ់ភេទដូចគ្នាមានដូចជាសេវាកម្មវះកាត់ប្តូរភេទ កម្មវិធីកម្សាន្ត សេវាកម្មគាំទ្រផ្សេងៗរាប់ទាំងការធ្វើដំណើរផងដែរ។

បើយោងតាមទិន្នន័យរបស់ក្រុមហ៊ុនគ្រប់គ្រងទ្រព្យសកម្ម LGBT Capital ដែលមានមូលដ្ឋាននៅចក្រភពអង់គ្លេស អំណាចនៃការចំណាយរបស់ក្រុមមនុស្សស្រលាញ់ភេទដូចគ្នាមានប្រមាណ៣៨៨លាននាក់ នៅទូទាំងពិភពលោកជាមួយប៉ាន់ស្មានលើសពី៤,៧ទ្រីលានដុល្លារជារៀងរាល់ឆ្នាំ។

អ្នកស្រលាញ់ភេទដូចគ្នារាប់ពាន់នាក់មកពីប្រទេសផ្សេងៗកាលពីថ្ងៃទី១ ខែមិថុនា បានប្រមូលផ្តុំគ្នានៅក្នុងប្រទេសថៃ ដើម្បីអបអរការទទួលស្គាល់ការរៀបអាពាហ៍ពិពាហ៍របស់មនុស្សស្រាលាញ់ភេទដូចគ្នារបស់រដ្ឋាភិបាលថៃ។ បើតាមការអះអាងរបស់សហស្ថាបនិកក្រុមហ៊ុន Bangkok Pride គ្រាន់តែពិធីជួបជុំក្រុមមនុស្សស្រលាញ់ភេទដូចគ្នា ដែលបានរៀបចំនៅបាងកក កាលពីខែមុន និងព្រឹត្តិការណ៍ពាក់ព័ន្ធត្រូវបានគេប៉ាន់ប្រមាណថា បានផ្តល់ប្រាក់ចំណូលរហូត១៣៨លានដុល្លារ៕

ដោយៈ សរ សុជាតិ