តើកិច្ចព្រមព្រៀងពន្ធសាជីវកម្មសកលអាចដំណើរការបានទេ ក្រោយលោក ដូណាល់ ត្រាំ ប្រកាសដកខ្លួនចេញ?

ដំណើរការអនុវត្តយន្តការនៃការយកពន្ធសាជីវកម្មសកល ដែលមានប្រទេសចំនួន១៤០ រួមទាំងអាម៉េរិក ចិន និងសហគមន៍អឺរ៉ុប បានព្រមព្រៀងគ្នា កាលពីឆ្នាំ២០២១ កំពុងស្ថិតក្នុងភាពស្រពេចស្រពិល ក្រោយការដកខ្លួនចេញរបស់អាម៉េរិក។ ប្រទេសឥណ្ឌា ដែលជាទីផ្សារធំបំផុតនៅលើពិភពលោកបានចោទជាសំណើរថា តើកិច្ចព្រមព្រៀងពន្ធសាជីវកម្មសកល ដែលបានព្រមព្រៀងគ្នាកន្លងមកអាចដំណើរការបានដែរឬទេ បន្ទាប់ពីលោក ត្រាំ បានប្រកាសដកខ្លួនចេញ?

ក្រោយឡើងកាន់តំណែងភ្លាមៗ លោក ដូណាល់ ត្រាំ បានលើកឡើងថា កិច្ចព្រមព្រៀងអនុវត្តកាតព្វកិច្ចពន្ធអប្បបរមាលើសាជីវកម្មសកល១៥% មិនមានឥទ្ធិពលនៅក្នុងសហរដ្ឋអាម៉េរិកឡើយ ពីព្រោះលោកបានដកខ្លួនចេញពីអនុវត្តតាមកិច្ចព្រមព្រៀងនេះហើយ។

លោក ទូហ៊ីន កាន់តា ផានដេ(Tuhin Kanta Pandey ) រដ្ឋមន្រ្តីក្រសួងហិរញ្ញវត្ថុឥណ្ឌា បានលើកឡើងថា ប្រសិនបើសហរដ្ឋអាម៉េរិ កដកខ្លួនចេញហើយ លោកគិតថា ឥណ្ឌានឹងត្រូវវាយតម្លៃថា តើក្របខណ្ឌទាំងមូលនឹងដំណើរការឬអត់។

បន្ទាប់ពីចុះហត្ថលេខានៅក្នុងឆ្នាំ២០២១ ក្រោមការផ្តួចផ្តើមដោយអង្គការអភិវឌ្ឈន៍ និងសហប្រតិបត្តិការសេដ្ឋកិច្ច (OECD) ដែលមានមូលដ្ឋាននៅទីក្រុងប៉ារីស ការអនុវត្តកិច្ចព្រមព្រៀងនេះហាក់មិនទាន់ទៅមុខនៅឡើយទេ ទោះបីប្រទេសមួយចំនួននៅអាស៊ានដូចជាវៀតណាម និងថៃ បានប្តេជ្ញាថា នឹងអនុវត្តនៅក្នុងឆ្នាំ២០២៥ នេះក៏ដោយ។

ពាក់ព័ន្ធបញ្ហានេះ ស្នងការសេដ្ឋកិច្ចសហភាពអឺរ៉ុប លោក វាល់ឌីស ដូមប្រូស្គី (Valdis Dombrovskis) បានសម្តែងការសោកស្តាយ ចំពោះការសម្រេចចិត្តរបស់លោក ត្រាំ ហើយបានអះអាងថា ចំពោះសហភាពអឺរ៉ុបនៅតែប្តេជ្ញាចិត្តចំពោះការអនុវត្តតាមកាតព្វកិច្ចពន្ធអន្តរជាតិ៕

ដោយៈ សរ សុជាតិ