បំណុលរដ្ឋាភិបាលនៅលើពិភពលោកកើនដល់១១១ទ្រីលានដុល្លារ ខណៈអាម៉េរិកជំពាក់ច្រើនជាងគេ

ភាគច្រើននៃការកើនឡើងបំណុលនេះ គឺបណ្ដាលមកពីវិបត្តិសកលធំៗ។ បំណុលបានកើនឡើងខ្លាំង បន្ទាប់ពីវិបត្តិហិរញ្ញវត្ថុឆ្នាំ២០០៨ ខណៈដែលរដ្ឋាភិបាលនានាបញ្ចេញសាច់ប្រាក់យ៉ាងច្រើនដើម្បីជួយសង្គ្រោះធនាគារ និងបង្កើនការចំណាយ ហើយនៅឆ្នាំ២០២០ អំឡុងវិបត្តិកូវីដ-១៩ ប្រទេសនានាបានខ្ចីប្រាក់យ៉ាងច្រើន ដើម្បីគាំទ្រដល់អាជីវកម្ម និងគ្រួសារពលរដ្ឋ។

ទិន្នន័យបង្ហាញថា បច្ចុប្បន្នរដ្ឋាភិបាលអាម៉េរិក និងចិន ជំពាក់បំណុលច្រើនជាងគេ ក្នុងនោះអាម៉េរិក ជំពាក់បំណុលរហូតដល់ទៅជាង៣៨ទ្រីលានដុល្លារ ខណៈចិន ជំពាក់បំណុលជាង១៨ទ្រីលានដុល្លារ។ នេះមានន័យថា មហាអំណាចទាំងពីរនេះរួមបញ្ចូលគ្នាទំហំបំណុលគ្របដណ្ដប់រហូតដល់ទៅប្រមាណ ៥១% នៃបំណុលរបស់រដ្ឋាភិបាលទូទាំងពិភពលោក។

សហរដ្ឋអាម៉េរិក បានឃើញការកើនឡើងយ៉ាងខ្លាំងនៅឆ្នាំ២០២០ ដោយសារតែការចំណាយអំឡុងវិបត្តិកូវីដ-១៩ ខណៈដែលបំណុលរបស់ប្រទេសចិន បានកើនឡើងជាលំដាប់ ដែលភាគច្រើនជំរុញដោយហេដ្ឋារចនាសម្ព័ន្ធ និងការខ្ចីប្រាក់របស់រដ្ឋបាលមូលដ្ឋាន។

សេដ្ឋកិច្ចធំៗផ្សេងទៀតបង្ហាញពីនិន្នាការបំណុលកើនឡើងផ្សេងៗគ្នា។ តួយ៉ាងបំណុលរបស់ប្រទេសជប៉ុន នៅតែខ្ពស់ខ្លាំង បើប្រៀបធៀបទៅនឹងសេដ្ឋកិច្ចរបស់ខ្លួន ខណៈដែលបំណុលរបស់សហភាពអឺរ៉ុប បានកើនឡើង​បន្ទាប់ពីការចំណាយថ្មីៗលើថាមពល និងការពារជាតិ៕