តើគំនាបពន្ធគយរបស់លោក ត្រាំ នឹងរុញឱ្យប្រទេសតូចធំនៅអាស៊ីរត់ទៅអែបចិន កាន់តែច្រើន ឬយ៉ាងណា?
គណបក្សកាន់អំណាចនៃប្រទេសជប៉ុន បានព្រមានថា ពន្ធគយបដិការខ្ពស់កប់ពពកដែលប្រធានាធិបតីអាម៉េរិក លោក ដូណាល់ ត្រាំ បានដាក់លើបណ្ដាប្រទេសជាដៃគូពា…
ធនាគារយក្សអាម៉េរិក Goldman Sachs ដែលជាធនាគារវិនិយោគធំបំផុតទី២ របស់ពិភពលោកបានព្រមានថា ពន្ធគយរបស់សហរដ្ឋអាម៉េរិក អាចធ្វើឱ្យពលរដ្ឋចិន រហូតដល់១៦លាននាក់ប្រឈមហានិភ័យបាត់បង់ការងារ។ តាមរយៈរបាយការណ៍ស្រាវជ្រាវរបស់ខ្លួនដែលបានចេញផ្សាយកាលពីថ្ងៃទី២៧ ខែមេសា ធនាគារ Goldman Sachs បានព្រមានថា ប្រសិនបើពន្ធគយបដិការខ្ពស់កប់ពពក ដែលសហរដ្ឋអាម៉េរិក និងមហាយក្សចិន ដាក់លើគ្នាទៅវិញទៅមកនៅតែបន្តកើតមាន ហើយការនាំចេញរបស់មហាយក្សចិន ធ្លាក់ចុះយ៉ាងគំហុក នោះទីផ្សារការងារចិន ប្រាកដជាទទួលរងផលប៉ះពាល់ខ្លាំង។
ធនាគារនេះ បានបន្ថែមទៀតថា ជាលទ្ធផលពលរដ្ឋចិន រហូតដល់ទៅ១៦លាននាក់ ប្រឈមហានិភ័យបាត់បង់ការងារ ជាពិសេសការងារពាក់ព័ន្ធការផលិតទំនិញសម្រាប់នាំចេញទៅកាន់សហរដ្ឋអាម៉េរិក ហើយក្នុងនោះគ្រាន់តែក្នុងឧស្សាហកម្មផលិតទំនិញសម្រាប់លក់រាយ និងបោះដុំមានរហូតដល់ទៅជិត១ភាគ៤ឯណោះ។
ធនាគារ Goldman Sachs បានមើលឃើញថា ទំនិញសំខាន់ៗមួយចំនួន រួមមានឧបករណ៍ទូរគមនាគមន៍ សម្លៀកបំពាក់ និងផលិតផលគីមី គឺងាយរងគ្រោះជាងទំនិញផ្សេងៗទៀត ដោយសារតែទំនិញទាំងនោះមានចំណែកធំសម្រាប់ការនាំចេញពីប្រទេសចិន ទៅកាន់សហរដ្ឋអាម៉េរិក។
គួររំឭកថា ប្រធានាធិបតីអាម៉េរិក លោក ដូណាល់ ត្រាំ បានដំឡើងពន្ធគយខ្ពស់លើទំនិញនាំចូលរបស់ចិន ក្នុងឆ្នាំ២០២៥ នេះ ដើម្បីកាត់បន្ថយឱនភាពពាណិជ្ជកម្ម និងដើម្បីបង្កើនផលិតកម្មក្នុងស្រុក។ លោក ដូណាល់ ត្រាំ បានដាក់ពន្ធសរុប១៤៥% លើទំនិញចិន គិតមកទល់ពេលនេះ ដែលធ្វើឱ្យអត្រាពន្ធជាមធ្យមឡើងដល់ប្រមាណ១៥៦%។ បើយោងតាមរបាយការណ៍ពីសេតវិមាន ពេលនេះមហាយក្សចិន ប្រឈមនឹងការបង់ពន្ធខ្ពស់រហូតដល់២៤៥%ឯណោះសម្រាប់ទំនិញមួយចំនួន។ ជាការឆ្លើយតប ក្រុងប៉េកាំង បានដាក់ពន្ធ១២៥% លើទំនិញទាំងអស់របស់សហរដ្ឋអាម៉េរិក បន្ថែមពីលើពន្ធចាស់ៗ ដែលខ្លួនដាក់លើសហរដ្ឋអាម៉េរិក៕
ដោយ: តែម សុខុម
