ការអះអាង របស់អគ្គនាយកផ្សារមូលបត្រកម្ពុជាយ៉ាងដូច្នេះ គឺធ្វើឡើងបន្ទាប់ពីថ្នាក់ដឹកនាំជាន់ខ្ពស់នៃក្រសួងសេដ្ឋកិច្ចនិងហិរញ្ញវត្ថុថ្មីៗនេះ បានបង្ហើបពីផែនការខ្ចីកម្ចីពីទីផ្សារក្នុងស្រុក ដែលអាចនឹងសាកល្បងចាប់ផ្ដើមនៅឆ្នាំ២០២២ ដើម្បីប្រមែរប្រមូលធនធានហិរញ្ញវត្ថុទាំងនោះមកស្ដារសេដ្ឋកិច្ចឡើងវិញ ពីវិបត្តិកូវីដ-១៩។
ឯកឧត្តម ហុង សុហួរ អគ្គនាយកនៃក្រុមហ៊ុនផ្សារមូលបត្រកម្ពុជាបានបញ្ជាក់ប្រាប់ខេមបូណូមីស ថា ការដែលរាជរដ្ឋាភិបាលមានផែនការក្នុងការខ្ចីបំណុលពីទីផ្សារក្នុងស្រុកនេះ វាគឺជាជម្រើសបន្ថែដ៏ល្អមួយសម្រាប់កម្ពុជា ខណៈដែលនៅមួយរយៈពេលចុងក្រោយនេះ វិស័យទីផ្សារមូលបត្រនៅកម្ពុជា បាននិងកំពុងមានភាពរីកចម្រើនយ៉ាងខ្លាំង។
កាលពីពេលថ្មីៗ នេះ ឯកឧត្តមបណ្ឌិត វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានអះអាងថា នៅឆ្នាំ២០២២ ខាងមុខ រដ្ឋាភិបាលកម្ពុជា នឹងមានគម្រោងក្នុងការខ្ចីថវិកាបន្ថែម ដើម្បីទ្រទ្រង់សេដ្ឋកិច្ចជាតិរហូតឆ្នាំ២០៣០។ បើតាមឯកឧត្តម វង្សី វិស្សុត បានសង្កត់ធ្ងន់ថា កម្ចីទាំងនោះ នឹងត្រូវយកមកប្រើប្រាស់ឱ្យមានប្រសិទ្ធិភាព សម្រាប់ជំរុញដល់ការទ្រទ្រង់សេដ្ឋកិច្ចជាតិ។ ដូច្នេះ ការបោះផ្សាយលក់បណ្ណបំណុលនៅក្នុងផ្សារមូលបត្រកម្ពុជា អាចនឹងក្លាយជាជម្រើសដ៏ប្រសើរមួយសម្រាប់ការប្រមូលធនធានហិរញ្ញវត្ថុ។
អត្ថបទគួរអាន
ចំពោះស្ថានភាពវិស័យទីផ្សារមូលបត្រនៅកម្ពុជាវិញ ត្រូវបាន អគ្គនាយកក្រុមហ៊ុនផ្សារមូលបត្រកម្ពុជា ឯកឧត្តម ហុង សុហួរ បានបញ្ជាក់ថា គឺនៅតែមានស្ថានភាពល្អប្រសើរ ពោលគឺបើទោះបីជានៅមួយរយៈនេះ កូវីដ-១៩មានការរាតត្បាតខ្លាំងក៏ដោយ។ ជាក់ស្ដែង ថ្មីៗនេះ មានក្រុមហ៊ុនមួយចំនួនទើបតែទទួលបានការអនុញ្ញាតជាគោលការណ៍ពីខាងក្រុមហ៊ុនផ្សារមូលបត្រកម្ពុជា ក្នុងការបោះផ្សាយលក់មូលបត្ររបស់ខ្លួននៅពេលឆាប់ៗខាងមុខនេះ។ បើតាមការគូសបញ្ជាក់ របស់ឯកឧត្តម ហុង សួរ នៅឆ្នាំ២០២១នេះ ក្រុមហ៊ុនផ្សារមូលបត្រកម្ពុជារំពឹងថា នឹងទទួលបានក្រុមហ៊ុនចុះបញ្ជីថ្មីចំនួន ៥ក្រុមហ៊ុនបន្ថែមទៀត ខណៈដែលកាលពីឆ្នាំ២០២០មានក្រុមហ៊ុនថ្មីចុះបញ្ជីចំនួន៥ផងដែរ។
បើតាមការអះអាងរបស់ឯកឧត្តម ហុង សុហួរ បើទោះបីជាមួយរយៈមកនេះ មានការផ្ទុះរាលដាលកូវីដ-១៩ខ្លាំងយ៉ាងណាក្ដី ប៉ុន្ដែ សកម្មភាពជួញដូរលើទីផ្សារភាគហ៊ុននៅតែកំណើនគួរឲ្យកត់សម្គាល់។ ជាក់ស្ដែង នៅត្រឹមឆមាសទី១ ឆ្នាំ២០២០១ បរិមាណជួញដូរជាមធ្យមបានកើនឡើងដល់ ១១ម៉ឺនភាគហ៊ុនក្នុងមួយថ្ងៃ កើនជាង ១៣៥% ធៀបកាលពីឆ្នាំ២០២០។ ជាមួយគ្នានេះ ទំហំជួញដូរភាគហ៊ុន ជាមធ្យម កើនឡើងប្រមាណ៧០%។
សូមបញ្ជាក់ថា រហូតមកដល់បច្ចុប្បន្ននេះ ក្រុមហ៊ុនផ្សារមូលបត្រកម្ពុជា មានក្រុមហ៊ុនសរុបចំនួន១៣ ដែលបានចុះបញ្ជី។ ក្នុងនោះ មានក្រុមហ៊ុនចំនួន៧ បានចុះបញ្ជីជាភាគហ៊ុន និងក្រុមហ៊ុនចំនួន៦ បានចុះបញ្ជីជាមូលបត្របំណុល។ ក្រុមហ៊ុន១៣នេះ បានប្រមូលទុនពីទីផ្សារមូលបត្រសរុបជាង ២៥៣លានដុល្លារអាមេរិក៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
