យោងតាមប្រព័ន្ធផ្សព្វផ្សាយរដ្ឋវៀតណាម កាលពីពេលថ្មីៗ លោក ង្វៀន ភូ ជុង អគ្គលេខាធិការបក្សកុម្មុយនិស្តវៀតណាម បាននិយាយប្តេជ្ញាសាជាថ្មីក្នុងការកំចាត់អំពើពុករលួយឱ្យបានទាន់ពេលវេលា និងមានប្រសិទ្ធភាពជាងមុន។ លោកថា វៀតណាមនឹងមិនបញ្ឈប់ឡើយ ហើយនឹងបន្តក្នុងរយៈពេលវែងតទៅមុខទៀត។
មែនទែនទៅ ការថ្លែងប្រឆាំងអំពើពុករលួយពីសំណាក់មេដឹកនាំកំពូលវៀតណាមរូបនេះ បានកើតឡើងបន្ទាប់ពីកាលពីពេលថ្មីៗ ប៉ូលីសវៀតណាមបានប្រកាសអំពីលទ្ធផលនៃការស៊ើបអង្កេតនាពេលកន្លងទៅលើរឿងអាស្រូវក្លែងបន្លំហិរញ្ញវត្ថុចំនួនពីរក្នុងវិស័យអចនទ្រព្យ ដែលមិនធ្លាប់មានពីមុនក្នុងតម្លៃប្រមាណជិត១៣ពាន់លានដុល្លារអាម៉េរិក ឬស្មើនឹង៣,២% នៃផលិតផលក្នុងសរុបរបស់វៀតណាម។
គួរជម្រាបថា វៀតណាមបានបើកយុទ្ធនាការប្រឆាំងអំពើពុករលួយតាំងពីឆ្នាំ២០១៦ មក ប៉ុន្តែទើបទទួលបានការចាប់អារម្មណ៍ខ្លាំងកាលពីឆ្នាំមុន បន្ទាប់ពីអាជ្ញាធរប្រទេសនេះ បានរឹបអូស និងបង្ក្រាបករណីក្លែងបន្លំ និងអំពើពុករលួយធំៗមួយចំនួន ដែលពាក់ព័ន្ធនឹងនាយកប្រតិបត្តិសាជីវកម្មកំពូល ក៏ដូចជាមន្ត្រីជាន់ខ្ពស់របស់រដ្ឋាភិបាល។
យ៉ាងណាមិញ ពាក់ព័ន្ធនឹងរឿងអាស្រូវពីរកាលពីពេលថ្មីៗនេះ យោងតាមការស៊ើបអង្កេត ដែលចុះផ្សាយជាសាធារណៈកាលពីថ្ងៃអាទិត្យ លោកស្រី Truong My Lan ប្រធានក្រុមហ៊ុនអភិវឌ្ឍន៍អចលនទ្រព្យ Van Thinh Phat និងបក្ខពួកផ្សេងទៀត បានកិបកេងប្រាក់ប្រមាណ៣០៤ទ្រីលានដុង ឬស្មើនឹងជាង១២ពាន់លានដុល្លារ ពីធនាគារពាណិជ្ញ Saigon។
អត្ថបទគួរអាន
ករណីឆបោកនេះត្រូវបានផ្សព្វផ្សាយជាសាធារណៈ នៅពេលដែលលោកស្រី Lan ត្រូវបានចាប់ខ្លួនកាលពីខែតុលា ឆ្នាំមុន ដែលនាំទៅរកវិបត្តិក្នុងវិស័យអចលនទ្រព្យ និងទីផ្សារមូលបត្របំណុលសាជីវកម្មក្នុងប្រទេសវៀតណាមផងដែរ។ មិនតែប៉ុណ្ណោះ ទំហំទឹកប្រាក់ដ៏ធំ នៃការក្លែងបន្លំនេះ ក៏បានធ្វើឱ្យមានការព្រួយបារម្ភក្នុងចំណោមអ្នកជំនាញហិរញ្ញវត្ថុវៀតណាម អំពីផលប៉ះពាល់លើវិស័យធនាគារដែរ។
យោងតាមក្រុមអ្នកស្រាជ្រាវ JP Morgan បាននិយាយថា ទំហំនៃការក្លែងបន្លំនេះ អាចនាំឱ្យមានការអនុវត្តយ៉ាងតឹងរ៉ឹងជាងមុននៃច្បាប់ហិរញ្ញវត្ថុវៀតណាម ដែលនឹងនាំឱ្យមានការចំណាយខ្ពស់សម្រាប់អ្នកផ្តល់ប្រាក់កម្ចី ហើយក៏ពន្យឺតសក្តានុពលកំណើនសេដ្ឋកិច្ចផងដែរ។
ដោយឡែក នៅក្នុងរឿងអាស្រូវដាច់ដោយឡែកមួយទៀតកាលពីថ្ងៃពុធ ប៉ូលីសវៀតណាម បានចោទប្រកាន់ប្រធានក្រុមហ៊ុនអភិវឌ្ឍន៍អចលនទ្រព្យ Tan Hoang Minh Group ថា បានរៃអង្គាសប្រាក់ដោយខុសច្បាប់ជិត៩ទ្រីលានដុង ឬស្មើនឹងជាង៣៥៤លានដុល្លារ ដោយចេញមូលបត្របំណុលដល់វិនិយោគិនចំនួន៦ពាន់៦រយនាក់។ កាលពីខែកញ្ញា ធនាគារអភិវឌ្ឍន៍អាស៊ីបានព្រមានអំពីការរីករាលដាលនៃវិបត្តិក្នុងវិស័យអចលនទ្រព្យនេះចូលទៅក្នុងវិស័យធនាគារវៀតណាម ខណៈដែលសមាមាត្រនៃប្រាក់កម្ចីមិនដំណើរការបានកើនឡើង៕
None
