ហុងកុងប្តេជ្ញាពង្រឹងកិច្ចសហប្រតិបត្តិការជាមួយកម្ពុជា ដើម្បីជំរុញការអភិវឌ្ឍសេដ្ឋកិច្ចកម្ពុជា

លោក John Lee ប្រធានប្រតិបត្តិនៃតំបន់រដ្ឋបាលពិសេសហុងកុង បានដឹកនាំគណៈប្រតិភូរបស់ហុងកុង និងតំណាងក្រុមហ៊ុនហុងកុងធំៗជាង៣០ក្រុមហ៊ុន ដែលកំពុងប្រតិបត្តិការផ្នែកផ្សេងៗគ្នា ទាំងក្នុងវិស័យហិរញ្ញវត្ថុនិងធានារ៉ាប់រង នវានុវត្តនិងបច្ចេកវិទ្យា សេវាកម្មវិជ្ជាជីវៈ ហេដ្ឋារចនាសម្ព័ន្ធ ការដឹកជញ្ជូន និងភស្តុភារ ថាមពល និងបដិសណ្ឋារកិច្ចជាដើម ដើម្បីមកបំពេញទស្សនៈកិច្ចនៅកម្ពុជា។ លោក John Lee បានវាយតម្លៃខ្ពស់ចំពោះការរីកចម្រើនផ្នែកសេដ្ឋកិច្ចរបស់កម្ពុជា និងបានគូសបញ្ជាក់អំពីគោលបំណងនៃដំណើរទស្សនកិច្ចនេះថា គឺដើម្បីដើម្បីពង្រឹង និងពង្រីកចំណងទំនាក់ទំនងរវាងតំបន់រដ្ឋបាលពិសេសហុងកុង និងកម្ពុជា ជាពិសេសក្នុងវិស័យធុរកិច្ច វិនិយោគ និងការតភ្ជាប់រវាងប្រជាជន និងប្រជាជន។

លោក John Lee បានចាត់ទុកការតភ្ជាប់រវាងហុងកុង និងកម្ពុជានេះ គឺជាការតភ្ជាប់មួយដ៏អស្ចារ្យ ដ្បិតថា ហុងកុងគឺជាទីក្រុងមួយក៏មានភាពល្បីល្បាញដោយសារភាពខ្លាំងរបស់ខ្លួនដូចជាវិស័យហិរញ្ញវត្ថុ ពាណិជ្ជកម្ម ភស្តុភាកម្ម និងសេវាកម្មវិជ្ជាជីវៈ ដែលនឹងអាចជួយជំរុញឱ្យកិច្ចសហប្រតិបត្តិការរវាងកម្ពុជា និងហុងកុងកាន់តែមានការរីកចម្រើនបន្ថែមទៀត។ ជាមួយគ្នានេះ លោក John Lee បានអះអាងថា ជាលទ្ធផលនៃបេសកម្មនៅកម្ពុជានេះ រដ្ឋបាលពិសេសហុងកុង និងកម្ពុជា ក៏បានចុះអនុសារណៈយោគយល់គ្នាចំនួន១៣ផងដែរ ទៅលើវិស័យសំខាន់ៗមួយចំនួន ដូចជាពាណិជ្ជកម្ម និងវិនិយោគ ហិរញ្ញវត្ថុ និងធនាគារ បច្ចេកវិទ្យា និងសេដ្ឋកិច្ចឌីជីថល ទេសចរណ៍ ក៏ដូចជាវិស័យអាកាសចរណ៍ផងដែរ។

ទន្ទឹមនេះឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ក្រុមប្រឹក្សាអភិវឌ្ឍន៍កម្ពុជាបានគូសបញ្ជាក់ថា ការវិនិយោគរបស់វិនិយោគិនហុងកុងក្នុងទីផ្សារកម្ពុជា គឺនឹងផ្តល់ឱកាសឱ្យវិនិយោគិនហុងកុងបានចូលមកក្នុងទីផ្សារសេដ្ឋកិច្ចមួយដែលកំពុងមានការអភិវឌ្ឍខ្លាំងនៅក្នុងតំបន់ ដែលមានបរិយាកាសវិនិយោគដែលគាំទ្រពីការគិតគូរបរិស្ថាន និងរាជរដ្ឋាភិបាលដែលមានជំនាញសម្រាប់ជួយសម្របសម្រួលដល់វិស័យឯកជនផងដែរ។ ជាមួយគ្នានេះ ឯកឧត្តម ស៊ុន ចាន់ថុល ក៏បានស្នើដល់វិនិយោគិនហុងកុងឱ្យជួយបន្តការវិនិយោគរបស់ខ្លួននៅកម្ពុជាឱ្យកាន់តែច្រើនថែមទៀតផងដែរ។

ជាមួយគ្នានេះ លោកបណ្ឌិត Peter K N Lam ប្រធានក្រុមប្រឹក្សាអភិវឌ្ឍន៍ពាណិជ្ជកម្មហុងកុង (HKTDC) បានគូសបញ្ជាក់ថា ក្រុមប្រឹក្សាអភិវឌ្ឍន៍ពាណិជ្ជកម្មហុងកុង នឹងបង្កើតការិយាល័យទីប្រឹក្សា HKTDC ថ្មីមួយនៅរាជធានីភ្នំពេញ ដើម្បីជួយជំរុញឱ្យមានកិច្ចសហការបន្ថែមទៀតរវាងកម្ពុជា និងហុងកុង ដ្បិតថាបច្ចុប្បន្ន HKTDC មានការិយាល័យចំនួន៥០នៅទូទាំងពិភពលោក ក្នុងនោះការិយាល័យចំនួន៦ នៅក្នុងតំបន់អាស៊ាន ដូចជាទីក្រុងបាងកក ហូជីមិញ ហ្សាកាតា គូឡាឡាំពួ ម៉ានីល និងសិង្ហបុរី៕

អត្ថបទ សោម ស្រីពេជ្រ និងរូបភាព តែន ចិន