តើជំនួបរវាងមេដឹកនាំវៀតណាម និងកូរ៉េខាងត្បូង សម្រេចបានលទ្ធផលធំៗអ្វីខ្លះ?
ក្រុមមេដឹកនាំកូរ៉េខាងត្បូង និងវៀតណាមបានព្រមព្រៀងគ្នាក្នុងការពង្រឹងកិច្ចសហប្រតិបត្តិការឱ្យកាន់តែស៊ីជម្រៅលើវិស័យមួយចំនួនដូចជាថាមពលនុយក្លេអ៊…
នាវេទិកាពិភាក្សាស្តីពី«មាគ៌ាប្រតិបត្តិពាណិជ្ជកម្ម និងវិនិយោគ ២០២៥» អ្នកឧកញ៉ា សៀ ឬទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុនវើលដ៍ប្រ៊ីដ គ្រុប បានចាត់ទុកអត្រាពន្ធគយចំនួន ១៩% ដែលសហរដ្ឋអាម៉េរិកបានដាក់មកលើទំនិញកម្ពុជា គឺជាអត្រាដ៏ល្អប្រសើរមួយដែលជួយឱ្យកម្ពុជា អាចប្រកួតប្រជែងជាមួយបណ្តាប្រទេសដៃគូនានាដែលមានអត្រាពន្ធប្រហាក់ប្រហែលគ្នាបាន។ តាមរយៈអត្រាពន្ធក្នុងកម្រិតនេះ អ្នកជំនាញរូបនេះ ជឿជាក់ថា កម្ពុជា នៅតែអាចរក្សាបាននូវរោងចក្រសហគ្រាសដែលមានស្រាប់ ប៉ុន្តែទំនិញមួយចំនួនដូចជាសម្លៀកបំពាក់ និងស្បែកជើងជាដើម ទំនងជាអាចបាត់បង់ឱកាសនាំចេញទៅកាន់ទីផ្សារអាម៉េរិកមួយចំនួន ដោយសារអ្នកបញ្ជាទិញអាចនឹងងាកចេញទៅកាន់ប្រទេសកេនយ៉ា ដែលមានអត្រាពន្ធពីអាម៉េរិក ត្រឹម១០%។
ជាមួយគ្នានេះ ឯកឧត្តមសាស្ត្រាចារ្យបណ្ឌិតសភាចារ្យ សុក ស៊ីផាន់ណា ទេសរដ្ឋមន្ត្រីទទួលបន្ទុកបេសកកម្មពិសេស បានវាយតម្លៃថា អត្រាពន្ធ ១៩% ដែលអាម៉េរិក ក្រោមការដឹកនាំរបស់រដ្ឋបាលរបស់លោក ដូណាល់ ត្រាំ ដាក់មកលើកម្ពុជា ទំនងជាអាចបន្តអនុវត្តនៅអាណត្តិមេដឹកនាំអាម៉េរិកក្រោយៗទៀត។ សម្រាប់អ្នកជំនាញរូបនេះ អត្រាពន្ធ ១៩% នេះ មិនមែនជាកម្រិតអាក្រក់ពេកនោះទេសម្រាប់កម្ពុជា ពោលគឺមិនអាចធ្វើឱ្យរោងចក្រសហគ្រាសនានារើចេញពីកម្ពុជា នោះទេ ប៉ុន្តែវាអាចធ្វើឱ្យការបញ្ជាទិញទំនិញរបស់កម្ពុជា ពីសហរដ្ឋអាម៉េរិក មានការប្រែប្រួល និងមិនមានកំណើនខ្ពស់ដូចមុន ខណៈស្ថានភាពសេដ្ឋកិច្ចពិភពលោកបច្ចុប្បន្នមិនទាន់មានស្ថិរភាពនៅឡើយ ក្រោមឥទ្ធិពលនៃគំនាបពន្ធរបស់លោក ដូណាល់ ត្រាំ។
ដោយឡែក លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ីយល់ឃើញថា ស្របពេលកម្ពុជា រងសម្ពាធពន្ធគយពីអាម៉េរិក រាជរដ្ឋាភិបាលកម្ពុជា គួរងាកទៅរកប្រភពកំណើនថ្មី តាមរយៈការជំរុញការផលិតទំនិញនាំចេញថ្មីៗ ដែលមានតម្លៃបន្ថែមខ្ពស់ និងផ្តល់ការលើកទឹកចិត្តដល់វិស័យឯកជន។ យ៉ាងណាមិញ អ្នកជំនាញរូបនេះយល់ឃើញថា ការទៅគោះទ្វារអ្នកវិនិយោគនៅក្រៅប្រទេស និងស្វែងយល់ឱ្យច្បាស់អំពីតម្រូវការរបស់ទីផ្សារទាំងនោះ ដើម្បីយកមកផលិត និងនាំចេញទៅកាន់ទីផ្សារទាំងនោះវិញ ក៏ជាកត្តាសំខាន់ផងដែរ ដែលរាជរដ្ឋាភិបាលត្រូវធ្វើនៅក្នុងបរិបថដែលមានការប្រកួតប្រជែងខ្ពស់ដោយសារសម្ពាធពន្ធគយអាម៉េរិកនេះ។
គួរជម្រាបថា នៅក្នុងរយៈពេល៧ខែ ឆ្នាំ២០២៥ ការដោះដូរពាណិជ្ជកម្មទ្វេភាគីរវាងកម្ពុជា និងសហរដ្ឋអាម៉េរិក សម្រេចបានទំហំទឹកប្រាក់ជាង៧ពាន់លានដុល្លារ កើនឡើងជាង ២៥% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជា នាំចេញទៅទីផ្សារអាម៉េរិក មានទំហំជិត៧ពាន់លានដុល្លារ កើនឡើងជាង ២៥% ខណៈអាម៉េរិក នាំចូលមកកម្ពុជាវិញ មានទំហំជាង២រយលានដុល្លារកើនឡើងជាង៣០%។ នេះបើយោងតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជា៕
