ថវិកា៤៤ពាន់លានដុល្លារដែលចាក់បញ្ចូលសេដ្ឋកិច្ចអាម៉េរិក តាមរយៈនិស្សិតបរទេស កំពុងរងការគំរាមកំហែងពីវិធានការរបស់លោក ត្រាំ

ទិន្នន័យរបស់សមាគមទីប្រឹក្សានិស្សិតបរទេសជាតិ របស់សហរដ្ឋអាម៉េរិក បានបង្ហាញថា នៅក្នុងឆ្នាំសិក្សា២០២៣-២០២៤ និស្សិតបរទេសប្រមាណជា១,១លាននាក់ ដែលបានទៅសិក្សានៅសហរដ្ឋអាម៉េរិក ចាក់បញ្ចូលទឹកប្រាក់ប្រមាណ៤៤ពាន់លានដុល្លារចូលទៅក្នុងសេដ្ឋកិច្ចរបស់សហរដ្ឋអាម៉េរិក។ ក្រៅពីទឹកប្រាក់ដ៏ច្រើននេះ និស្សិតបរទេសដែលបានស្នាក់នៅ និងសិក្សានៅអាម៉េរិក ក៏បានរួមចំណែកក្នុងទីផ្សារការងារនៅអាម៉េរិក​ប្រមាណជិត៤០ម៉ឺនការងារ​។ ប៉ុន្តែនៅពេលនេះអ្វីៗទាំងនេះ កំពុងស្ថិតក្នុងភាពមន្ទិលដោយសារគោលនយោបាយរបស់ប្រធានាធិបតីអាម៉េរិក លោក ដូណាល់ ត្រាំ។

ពាក់ព័ន្ធនឹងបញ្ហានេះ លោក នីកូឡាស បា (Nicholas Barr) សាស្ត្រាចារ្យនៅសកលវិទ្យាល័យសេដ្ឋកិច្ចមួយនៅទីក្រុងឡុងដ៍ បាននិយាយក្នុងបទសម្ភាស​ជាមួយ Washington Post ថា និស្សិតបរទេសទាំងអស់ដែលចូលទៅសហរដ្ឋអាម៉េរិក មិនគ្រាន់តែចំណាយប្រាក់បង់ថ្លៃសិក្សានោះទេ ពួកគេក៏បានចូលរួមចំណែកបង់ថ្លៃជួលកន្លែងស្នាក់នៅ ការហូបចុក និងការធ្វើដំណើរដ៏ច្រើនថែមទៀត។

បច្ចុប្បន្នរដ្ឋធំៗដែលមាននិស្សិតបរទេសសិក្សាច្រើនមានដូចជារដ្ឋតិចសាស់ រដ្ឋម៉ាសាឈូសេត និងកាលីហ្វ័ញ៉ាជាដើម។ បើយោងតាមស្ថិតិគ្រាន់តែរដ្ឋតិចសាស់មួយមាននិស្សិតអន្តរជាតិ ជិត៩ម៉ឺននាក់ ដែលបានមកសិក្សានៅមហាវិទ្យាល័យ និងសាកលវិទ្យាល័យជាង២៥០ ហើយបានរួមចំណែកចូលសេដ្ឋកិច្ចសរុបប្រមាណ២,៥ពាន់លានដុល្លារ។

ចំណែកនៅរដ្ឋម៉ាសាឈូសេត គឺមាននិស្សិតអន្តរជាតិ ជាង៨ម៉ឺននាក់ ជាមួយនឹងចំណូលជិត៤ពាន់លានដុល្លារ រីឯនៅរដ្ឋកាលីហ្វ័ញ៉ា មាននិស្សិតជាង១៤ម៉ឺននាក់ ដោយបានរួមចំណែកចាក់ថវិកាចូលសេដ្ឋកិច្ចប្រមាណ៦,៤ពាន់លានដុល្លារ៕

ដោយៈ សរ សុជាតិ