បើយោងតាមរយៈបទបញ្ជារបស់ទីក្រុងញូវដេលី ដែលចេញផ្សាយកាលពីថ្ងៃទី១០ ខែកញ្ញា ដែកបំពង់ទីបអ៊ីណុកនាំចូលមកពីប្រទេសចិន ដែលជាអ្នកផលិតដែកថែបដ៏ធំបំផុតរបស់ពិភពលោក និងដែករបស់ប្រទេសវៀតណាម នឹងត្រូវជាប់ពន្ធចន្លោះពី១២% ទៅ៣០% សម្រាប់រយៈពេល៥ឆ្នាំខាងមុខ។ ចំណាត់ការរបស់រដ្ឋាភិបាលឥណ្ឌានេះ ត្រូវបានគេរំពឹងថា អាចនឹងធ្វើទំទាក់ទំនងជាមួយចិន ដែលកំពុងតានតឹងស្រាប់ហើយនោះ នឹងកាន់តែតានតឹងបន្ថែមទៀត។
គួរបញ្ជាក់ថា ទំនាក់ទំនងរវាងប្រទេសដែលមានប្រជាជនច្រើនជាងគេបំផុតលើពិភពលោកទាំងពីរនេះ បានចាប់ផ្តើមមានភាពតានតឹងនឹងគ្នាចាប់តាំងពីយោធារបស់ពួកគេបានប៉ះទង្គិចគ្នានៅតាមព្រំដែននៅក្នុងឆ្នាំ២០២០ ដែលបញ្ហានេះបានជំរុញឱ្យទីក្រុងញូវដេលី បង្កើនការរឹតបន្តឹងលើការត្រួតពិនិត្យការវិនិយោគរបស់ចិន និងបានបញ្ឈប់គម្រោងធំៗរបស់ចិនជាច្រើន។
ទោះជាយ៉ាងណារដ្ឋមន្ត្រីការបរទេសឥណ្ឌា លោក ស៊ូប្រាម៉ានីយ៉ាម ចៃសានកា (Subrahmanyam Jaishankar) បាននិយាយអះអាងនៅដើមសប្តាហ៍នេះថា ទីក្រុងញូវដែលី មិនបិទទ្វារអាជីវកម្មពីប្រទេសចិន នោះឡើយ ប៉ុន្តែវាផ្អែកលើវិស័យ ដែលទីក្រុងប៉េកាំង បានធ្វើអាជីវកម្មតែប៉ុណ្ណោះ។ ទន្ទឹមនឹងនេះ រដ្ឋាភិបាលឥណ្ឌា ក៏បានផ្ដួចផ្ដើមឱ្យមានការស៊ើបអង្កេតប្រឆាំងនឹងការលក់បង្ខូចតម្លៃកាលពីខែសីហា លើផលិតផលដែកថែបមួយចំនួនដែលបាននាំចូលពីវៀតណាម ផងដែរ៕
អត្ថបទ៖ សុខ មង្គល
