យោងតាមកាសែត Wall Street Journal បានឱ្យដឹងថា ធនាគារកណ្តាលថៃ កំពុងរក្សាទុកអត្រាការប្រាក់ឱ្យនៅដដែលដោយគ្មានការប្រែប្រួល ទោះបីជាអស្ថិរភាពនៅក្នុងប្រទេសថៃ កំពុងកើនឡើង រួមទាំងការលាលែងពីតំណែងរបស់សមាជិកសំខាន់ៗក្នុងជួររដ្ឋាភិបាលចម្រុះ ដែលបានធ្វើឱ្យប្រជាប្រិយភាពរបស់នាយករដ្ឋមន្ត្រីថៃ លោកស្រី ផៃថងថាន ស៊ីណាវ៉ាត្រា ដាំក្បាលចុះដែលពិបាកនឹងរក្សាតំណែងជាប់យ៉ាងណាក្ដី។
ក្រុមអ្នកជំនាញសេដ្ឋកិច្ចមកពីធនាគារ ANZ នៃប្រទេសអូស្ត្រាលី បានធ្វើការកត់សម្គាល់ថា ខណៈដែលមូលដ្ឋានគ្រឹះសេដ្ឋកិច្ចរបស់ប្រទេសថៃ រក្សាបានស្ថិរភាពនៅឡើយ ភាពចលាចលខាងនយោបាយអាចធ្វើឱ្យបញ្ហា ដែលមានស្រាប់នានា កាន់តែអាក្រក់ឡើង ហើយបានអំពាវនាវឱ្យមានការជួយគាំទ្របន្ថែមទៀតផ្នែកគោលនយោបាយរូបិយវត្ថុ។
ក្រុមហ៊ុនហិរញ្ញវត្ថុជប៉ុន Nomura បានព្រមានធ្ងន់ៗដោយនិយាយចំៗថា ភាពចលាចលនៅក្នុងប្រទេសថៃ អាចនឹងឈានទៅដល់ការពន្យារពេលអនុម័តថវិកាជាតិ ហើយអាចនឹងធ្វើឱ្យកម្រិតគុណភាពឥណទានរបស់ប្រទេសថៃ ធ្លាក់ចុះ។ លើសពីនេះប្រទេសថៃ ក៏ប្រឈមនឹងសម្ពាធខាងក្រៅពីគោលនយោបាយពាណិជ្ជកម្មរបស់សហរដ្ឋអាម៉េរិក ផងដែរ។
ក្រុមអ្នកវិភាគបានព្រមានថា ប្រសិនបើគ្មានកិច្ចព្រមព្រៀងពាណិជ្ជកម្មថ្មីរវាងប្រទេសថៃ និងសហរដ្ឋអាម៉េរិកទេ នោះការនាំចេញរបស់ថៃទៅកាន់សហរដ្ឋអាម៉េរិក អាចនឹងរងផលប៉ះពាល់ខ្លាំងដោយសារត្រូវបង់ពន្ធគយបដិការខ្ពស់រហូតដល់ទៅ៣៦% ដែលជាលទ្ធផលនឹងធ្វើឱ្យសេដ្ឋកិច្ចថៃកាន់តែយ៉ាប់យឺនថែមទៀត។
ជំហរប្រុងប្រយ័ត្នរបស់ធនាគារកណ្តាលថៃ ក្នុងការបញ្ចុះអត្រាការប្រាក់នេះឆ្លុះបញ្ចាំងពីការលំបាកក្នុងការរក្សាតុល្យភាពវាងការរក្សាស្ថិរភាពសេដ្ឋកិច្ច និងការឆ្លើយតបទៅនឹងការគំរាមកំហែងទាំងក្នុងស្រុក និងអន្តរជាតិ ដែលកំពុងកើនឡើង៕
ដោយ: តែម សុខុម
