ការរឹតត្បិតការចំណាយរបស់ពលរដ្ឋ និងការធ្លាក់ចុះចំនួនភ្ញៀវទេសចរកំពុងគំរាមកំហែងប្រាក់ចំណូលរបស់ភោជនីយដ្ឋាននៅថៃ
សមាគមភោជនីយដ្ឋានថៃ បានអះអាងថា ការធ្លាក់ចុះការចំណាយរបស់ពលរដ្ឋ និងការធ្លាក់ចុះចំនួនភ្ញៀវទេសចរបរទេស ជាពិសេសភ្ញៀវទេសចរចិន បានទាញទម្លាក់…
ប្រទេសជប៉ុន បានប្រកាសនៅថ្ងៃទី២៧ ខែឧសភា ថា ខ្លួនបានបាត់បង់ឋានៈជាម្ចាស់បំណុលកំពូលរបស់ពិភពលោកជាលើកដំបូងក្នុងរយៈពេល៣៤ឆ្នាំមកនេះ ដោយតំណែងកំពូលនេះបានធ្លាក់ទៅលើប្រទេសអាល្លឺម៉ង់ ទោះបីជាទ្រព្យសកម្មក្រៅប្រទេសរបស់ប្រទេសជប៉ុន បានកើនឡើងឈានដល់កម្រិតកំណត់ត្រាយ៉ាងណាក្ដី ហើយការជ្រុះបាត់តំណែងនេះ គឺដោយសារប្រាក់យ៉េនរបស់ជប៉ុន ធ្លាក់ថ្លៃ។
ទ្រព្យសកម្មក្រៅប្រទេសសរុបរបស់ប្រទេសជប៉ុន បានកើនឡើងជិត១៣% បើធៀបនឹងឆ្នាំ២០២៣ ឈានដល់៣,៧ទ្រីលានដុល្លារ គិតត្រឹមដំណាច់ឆ្នាំ២០២៤ ដោយកើនលើសជាង៣,៤ទ្រីលានដុល្លារជាលើកដំបូង។ ទោះជាយ៉ាងណាទំហំទ្រព្យសកម្មក្រៅប្រទេសសរុបរបស់ជប៉ុន គឺតិចជាងទ្រព្យសកម្មក្រៅប្រទេសសរុបរបស់ប្រទេសអាល្លឺម៉ង់ ដែលមានចំនួនជិត ៣,៩ទ្រីលានដុល្លារ។
ក្រសួងហិរញ្ញវត្ថុជប៉ុន បាននិយាយថា ការធ្លាក់ថ្លៃរបស់ប្រាក់យ៉េន បានជំរុញឱ្យទ្រព្យសកម្មគិតជារូបិយប័ណ្ណបរទេសរបស់ប្រទេសជប៉ុន រួមទាំងភាគហ៊ុន មូលបត្របំណុល និងទ្រព្យសកម្មផ្សេងៗទៀតហក់ឡើងថ្លៃនៅពេលប្តូរទៅជារូបិយប័ណ្ណក្នុងស្រុកហើយក្រសួងហិរញ្ញវត្ថុជប៉ុនបន្ថែមទៀតថា អាល្លឺម៉ង់ មានប្រៀបដោយសារខ្លួនមានអតិរេកពាណិជ្ជកម្មខ្ពស់ជាមួយប្រទេសជប៉ុន។
ទិន្នន័យបានបង្ហាញថា ឥណទានដុលក្រៅប្រទេសរបស់ជប៉ុន បានកើនឡើងរយៈពេល៧ឆ្នាំជាប់ៗគ្នា ខណៈដែលទ្រព្យសកម្មក្រៅប្រទេសសរុបបានហក់ឡើង១១,៤% ឈានដល់១១,៥ទ្រីលានដុល្លារ ដោយមួយភាគធំ គឺដោយសារបណ្ដាធនាគារ និងក្រុមហ៊ុនពាណិជ្ជកម្មរបស់ជប៉ុន បោះទុនវិនិយោគកាន់តែច្រើននៅលើទឹកដីសហរដ្ឋអាម៉េរិក។
ទិន្នន័យបង្ហាញទៀតថា បំណុលដែលបរទេសខ្ចីជប៉ុន ក៏បានកើនឡើង១០,៧% ឈានដល់ជាង៧,៧៩ទ្រីលានដុល្លារផងដែរ។ សូមបញ្ជាក់ថា ប្រាក់យ៉េនជប៉ុន បានធ្លាក់ថ្លៃធៀបនឹងប្រាក់ដុល្លារអាម៉េរិក ដែលបានហក់ឡើងពី១៤១,៤០យ៉េន ក្នុងមួយដុល្លារ ក្នុងឆ្នាំ២០២៣ ឈានដល់១៥៧,៨៩យ៉េន ក្នុងមួយដុល្លារ គិតត្រឹមដំណាច់ឆ្នាំ២០២៤។
នៅពេលនេះ ប្រទេសជប៉ុន គឺជាឥណទាយក ឬជាម្ចាស់បំណុលធំបំផុទី២របស់ពិភពលោកបន្ទាប់ពីប្រទេសអាល្លឺម៉ង់ ដោយមហាយក្សចិន ជាប់ចំណាត់ថ្នាក់លេខ៣។ ផ្ទុយទៅវិញ សហរដ្ឋអាម៉េរិក ដែលជាមហាអំណាចធំបំផុតទី១ បែរជាជំពាក់បំណុលបរទេសយ៉ាងសន្ធឹកសន្ធាប់រហូតដល់ទៅប្រមាណ ២៨,៥ទ្រីលានដុល្លារទៅវិញ៕
ដោយ: តែម សុខុម
_
